ຈີນຮຽກຮ້ອງໃຫ້ປະຊາຄົມໂລກເພີ່ມທະວີການຮ່ວມມືຫຼາຍຝ່າຍ, ຮັບມືກັບການຂົ່ມຂູ່ຄວາມໝັ້ນຄົງໃນທົ່ວໂລກ
(GMT+08:00) 2011-11-24 17:42:11 cri
ວັນທີ 23 ພະຈິກນີ້, ໃນເວລາກ່າວຄຳປາໄສໃນກອງປະຊຸມສົນທະນາແລກປ່ຽນຄຳຄິດຄຳເຫັນກ່ຽວກັບບັນຫາ "ສິ່ງທ້າທາຍໃໝ່ຕໍ່ຄວາມໝັ້ນຄົງ" ຂອງສະພາຄວາມໝັ້ນຄົງສະຫະປະຊາຊາດ, ທ່ານຫຼີປາວຕົ່ງ, ຜູ້ຕາງໜ້າຖາວອນຂອງຈີນປະຈຳສະຫະປະຊາຊາດກ່າວວ່າ, ໂດຍປະເຊີນໜ້າກັບການຂົ່ມຂູ່ແລະສິ່ງທ້າທາຍໃໝ່ປະເພດຕ່າງໆທີ່ມີຕໍ່ຄວາມໝັ້ນຄົງຂອງທົ່ວໂລກ, ປະຊາຄົມໂລກຄວນເພີ່ມທະວີການຮ່ວມມືຫຼາຍຝ່າຍ, ໂດຍສະເພາະແມ່ນຕ້ອງຍຶດໝັ້ນຈຸດປະສົງແລະຫຼັກການໃນ "ກົດບັດສະຫະປະຊາຊາດ", ຮັບມືດ້ວຍການເຄື່ອນໄຫວຮ່ວມກັນ.
ກ່ຽວກັບການປ່ຽນແປງຂອງດິນຟ້າອາກາດ, ທ່ານຫຼີປາວຕົ່ງກ່າວວ່າ, ຈີນໄດ້ເຂົ້າຮ່ວມການເຈລະຈາແລະການຮ່ວມມືສາກົນກ່ຽວກັບການປ່ຽນແປງຂອງດິນຟ້າອາກາດດ້ວຍຄວາມຕັ້ງໜ້າແລະໃນທາງສ້າງສັນມາໂດຍຕະຫຼອດ, ສະເໜີໃຫ້ຮັບມືກັບການປ່ຽນແປງຂອງດິນຟ້າອາກາດພາຍໃຕ້ຂອບການພັດທະນາແບບຍືນຍົງ, ຍຶດໝັ້ນຫຼັກການສະເໝີພາບກັນແລະ "ຮັບຜິດຊອບທີ່ຮ່ວມກັນແຕ່ມີຄວາມແຕກຕ່າງກັນ".
ທ່ານຫຼີປາວຕົ່ງຍັງຮຽກຮ້ອງໃຫ້ປະຊາຄົມໂລກໃຊ້ມາດຕະການອັນຕັ້ງໜ້າໃນດ້ານທຶນຮອນແລະເຕັກນິກ, ສະໜອງການຊ່ວຍເຫຼືອແກ່ປະເທດທີ່ພວມພັດທະນາ.
