ວັນທີ 23 ພະຈິກນີ້, ທ່ານເວີ່ນເຈ່ຍປາວ, ນາຍົກລັດຖະມົນຕີຈີນກ່າວວ່າ, ກອງປະຊຸມສຸດຍອດອາຊີຕາເວັນອອກທີ່ຫາກໍ່ສິ້ນສຸດລົງນັ້ນໄດ້ສະແດງໃຫ້ເຫັນວ່າ, ຄວາມສາມັກຄີ, ການພັດທະນາແລະການຮ່ວມມືແມ່ນຄວາມປາຖະໜາຮ່ວມກັນແລະທ່າອ່ຽງທີ່ຕ້ອງເປັນໄປ. ໃນຖານະເປັນປະເທດໃຫຍ່ທີ່ມີບົດບາດ, ຈີນແລະຍີ່ປຸ່ນຄວນຮ່ວມກັນປະກອບສ່ວນຫຼາຍກວ່າເກົ່າເຂົ້າໃນການສ້າງຄວາມຈະເລີນຮຸ່ງເຮືອງຂອງອາຊີຕາເວັນອອກ, ນີ້ສອດຄ່ອງກັບຜົນປະໂຫຍດຮ່ວມຂອງປະຊາຊົນສອງປະເທດກໍ່ຄືປະຊາຊົນໃນພາກພື້ນນີ້.
ມື້ດຽວກັນ, ຢູ່ທີ່ປັກກິ່ງ, ໃນເວລາຕ້ອນຮັບທ່ານໂຄອີຊີໂຣ ເກນບາ, ລັດຖະມົນຕີວ່າການກະຊວງການຕ່າງປະເທດຍີ່ປຸ່ນ, ທ່ານເວີ່ນເຈ່ຍປາວກ່າວວ່າ, ສອງຝ່າຍຕ້ອງເພີ່ມທະວີການແລກປ່ຽນລະຫວ່າງເຈົ້າໜ້າທີ່ລະດັບສູງ, ເພີ່ມທະວີຄວາມໄວ້ເນື້ອເຊື່ອໃຈກັນໃນດ້ານການເມືອງແລະດ້ານຍຸດທະສາດໃນຂົງເຂດເສດຖະກິດການຄ້າ, ເສີມຂະຫຍາຍທ່າແຮງຂອງຕົນຕື່ມອີກ, ເປີດກວ້າງຂົງເຂດການຮ່ວມມືໃໝ່, ບັນລຸຕ່າງຝ່າຍຕ່າງມີຜົນປະໂຫຍດ, ເພີ່ມທະວີການແລກປ່ຽນດ້ານວັດທະນະທຳ, ຊຸກຍູ້ມິດຕະພາບຕໍ່ກັນລະຫວ່າງປະຊາຊົນ. ຈີນຍິນດີຮ່ວມກັບຍີ່ປຸ່ນທຳຄວາມພະຍາຍາມເພື່ອຊຸກຍູ້ໃຫ້ການພົວພັນສອງປະເທດໄດ້ຮັບຄວາມຄືບໜ້າໃໝ່, ຕ້ອນຮັບຈີນກັບຍີ່ປຸ່ນຟື້ນຟູການພົວພັນທາງການທູດເປັນປົກກະຕິຄົບຮອບ 40 ປີ.
ທ່ານໂຄອີຊີໂຣ ເກນບາ, ລັດຖະມົນຕີວ່າການກະຊວງການຕ່າງປະເທດຍີ່ປຸ່ນກ່າວວ່າ, ການພັດທະນາຂອງຈີນແມ່ນໂອກາດຂອງຍີ່ປຸ່ນ, ການພົວພັນລະຫວ່າງຍີ່ປຸ່ນຈີນຂະຫຍາຍຕົວຢ່າງໝັ້ນທ່ຽງແລະຕໍ່ເນື່ອງ ສອດຄ່ອງກັບຜົນປະໂຫຍດອັນພື້ນຖານຂອງສອງປະເທດ, ແລະມີຄວາມໝາຍສຳຄັນຕໍ່ພາກພື້ນນີ້ກໍ່ຄືທົ່ວໂລກ. ລັດຖະບານຍີ່ປຸ່ນເອົາໃຈໃສ່ໃນລະດັບສູງແລະພະຍາຍາມລົງລຶກການພົວພັນຍຸດທະສາດທີ່ຕ່າງຝ່າຍຕ່າງມີຜົນປະໂຫຍດລະຫວ່າງຍີ່ປຸ່ນກັບຈີນ, ຍິນດີຖືປີໜ້າເຊິ່ງເປັນປີແຫ່ງການຟື້ນຟູການພົວພັນທາງການທູດລະຫວ່າງສອງປະເທດເປັນປົກກະຕິຄົບຮອບ 40 ປີ ເປັນໂອກາດທີ່ດີ, ບຳລຸງສ້າງຄວາມຮັກແພງກັນລະຫວ່າງປະຊາຊົນສອງຊາດ, ເພີ່ມທະວີການຮ່ວມມືທີ່ຕ່າງຝ່າຍຕ່າງມີຜົນປະໂຫຍດ, ເພີ່ມທະວີການແລກປ່ຽນແລະການປະສານງານໃນວຽກງານສາກົນແລະພາກພື້ນ, ຊຸກຍູ້ໃຫ້ການພົວພັນລະຫວ່າງສອງປະເທດກ້າວຂຶ້ນສູ່ລະດັບໃໝ່.
