ປະທານາທິບໍດີເຢແມນລົງນາມໃນສັນຍາມອບຮັບອຳນາດ
(GMT+08:00) 2011-11-24 16:45:36 cri
ທ່ານອາລີ ອັບດູນລາ ຊາເລ ປະທານາທິບໍດີເຢແມນໄດ້ລົງນາມໃນສັນຍາໄກ່ເກ່ຍຂອງຄະນະກຳມະການຮ່ວມມືປະເທດອາຣັບອ່າວເປີເຊຍ(GCC)ທີ່ມີຈຸດປະສົງແກ້ໄຂວິກິດການເຢແມນໃນວັນທີ23ພະຈິກນີ້ຢູ່ນະຄອນຫຼວງຣີຢັດຂອງອາຣັບບີຊາອຸດິດ,ຕໍ່ມາ,ພັກກຳອຳນາດແລະພັກຝ່າຍຄ້ານຂອງເຢແມນກໍ່ໄດ້ລົງນາມໃນສັນຍາວ່າດ້ວຍການປະຕິບັດສັນຍາຄະນະກຳມະການຮ່ວມມືປະເທດອາຣັບອ່າວເປີເຊຍ.
ພາຍຫຼັງລົງນາມໃນສັນຍາແລ້ວ,ທ່ານຊາເລເຮີໄດ້ໃຫ້ສຳພາດຕໍ່ສື່ມວນຊົນໂດຍກ່າວປະນາມສະຫະພັນພັກຝ່າຍຄ້ານທີ່ປະລະການໃຊ້ວິທີປະຊາທິປະໄຕແລະການສົນທະນາ,ໄດ້ທຳລາຍສະຖຽນລະພາບແລະຄວາມເປັນເອກະພາບຂອງເຢແມນ,ຊຶ່ງການທຳລາຍແນວນີ້ຈະຕ້ອງການເວລາຫຼາຍໆປີຈິ່ງສາມາດຟື້ນຟູຄວາມເສຍຫາຍໄດ້.ແຕ່ພ້ອມກັນນັ້ນ,ທ່ານຊາເລຍັງກ່າວວ່າຈະສະໜັບສະໜູນລັດຖະບານຊຸດໃໝ່ທີ່ຈະສ້າງຕັ້ງຂຶ້ນໃນໄວໆນີ້.
ວັນທີ23ພະຈິກນີ້,ທ່ານບານກີມູນ ເລຂາທິການໃຫຍ່ສະຫະປະຊາຊາດກ່າວຢູ່ສຳນັກງານໃຫຍ່ສະຫະປະຊາຊາດທີ່ນີວຢອກວ່າ,ທ່ານຮູ້ສຶກວ່າມີຄວາມດີໃຈຫຼາຍທີ່ສະຖານະການຢູ່ເຢແມນມີຄວາມຄືບໜ້າອັນຕັ້ງໜ້າໃນປະຈຸບັນ.ສະຫະປະຊາຊາດຈະພະຍາຍາມຈົນສຸດຄວາມສາມາດເພື່ອລະດົມທັງກຳລັງຄົນແລະຊັບສິນອັນຈຳເປັນທັງໝົດເພື່ອສະໜັບສະໜູນເຢແມນ,ຊ່ວຍເຢແມນບັນລຸສັນຕິພາບແລະສະຖຽນລະພາບ.
ທ່ານຊາເລເຮີ ປະທານາທິບໍດີເຢແມັນໄດ້ຂຶ້ນກຳອຳນາດມາໄດ້33ປີແລ້ວ.ທ້າຍເດືອນມັງກອນປີນີ້,ແຂວງຕ່າງໆຂອງເຢແມນໄດ້ຕົກຢູ່ໃນສະພາບວຸ້ນວາຍຕາມລຳດັບ. ເດືອນເມສາ ,ຄະນະກຳມະການຮ່ວມມືປະເທດອາຣັບອ່າວເປີເຊຍທີ່ມີການພົວພັນສະໜິດແໜ້ນກັບເຢແມນໃນດ້ານການເມືອງແລະເສດຖະກິດນັ້ນໄດ້ສະເໜີສັນຍາໄກ່ເກ່ຍທີ່ມີຈຸດປະສົງແກ້ໄຂວິກິດການຂອງເຢແມນຊຶ່ງສັນຍານີ້ມີເນື້ອໃນຕ່າງໆເຊັ່ນທ່ານຊາເລມອບອຳນາດໃຫ້ຮອງປະທານາທິບໍດີໂດຍສັນຕິ,ແລ້ວລາອອກຈາກຕຳແໜ່ງພາຍໃນ30ວັນ,ສ້າງຕັ້ງລັດຖະບານປະສົມທີ່ນຳໂດຍຝ່າຍຕໍ່ຕ້ານລັດຖະບານແລະຈັດການເລືອກຕັ້ງປະທານາທິບໍດີແລະອື່ນໆ.
