ເຈົ້າໜ້າທີ່ຈີນກ່າວຢ້ຳວ່າຈີນຈະສືບຕໍ່ພັດທະນາພະລັງງານນິວເຄຼຍ
(GMT+08:00) 2011-11-25 11:49:44 cri
ຕາມຂ່າວCRI: ວັນທີ24ພະຈິກນີ້, ທ່ານຈາງກົວປາວຫົວໜ້າກົມພະລັງງານແຫ່ງຊາດຈີນທີ່ເດີນທາງໄປນະຄອນຫຼວງປາຣີຂອງຝຣັ່ງເພື່ອເຂົ້າຮ່ວມກອງປະຊຸມ ກອງທຶນສາກົນຂອງເວທີປຶກສາຫາລືທະວີບອາຊີໂປອາວໄດ້ກ່າວຢ້ຳວ່າ, ຈີນຈະສືບຕໍ່ພັດທະນາພະລັງງານນິວເຄຼຍ, ເຕັກໂນໂລຊີທີ່ມີໃນປະຈຸບັນນີ້ສາມາດຮັບປະກັນຄວາມປອດໄພດ້ານການຜະລິດໄຟຟ້າດ້ວຍພະລັງງານນິວເຄຼຍໄດ້ຢ່າງແນ່ນອນ.
ໃນມື້ດຽວກັນທ່ານຈາງກົວປາວໄດ້ກ່າວວ່າ, ປະຈຸບັນນີ້ອັດຕາມາດຕາສ່ວນຂອງການຜະລິດໄຟຟ້າດ້ວຍພະລັງງານນິວເຄຼຍໃນໂຄງປະກອບພະລັງງານຂອງຈີນຍັງມີໜ້ອຍ, ພະລັງງານນິວເຄຼຍຈະແມ່ນສ່ວນປະກອບທີ່ສຳຄັນດ້ານພະລັງງານໃນອານາຄົດຂອງຈີນ. ທ່ານກ່າວວ່າ, ການໃຊ້ພະລັງງານນິວເຄຼຍໂດຍສັນຕິຈະມີບົດບາດອັນສຳຄັນໃນໂຄງປະກອບພະລັງງານຂອງມະນຸດໃນອານາຄົດ. ປະຊາຊົນທົ່ວໂລກສາມາດຖອດຖອນບົດຮຽນຈາກອຸປະຕິເຫດນິວເຄຼຍທີ່ເກີດຂຶ້ນຢູ່ເກາະຟູກູຊີມາຂອງຍີ່ປຸ່ນ. ເບິ່ງທາງດ້ານເຕັກໂນໂລຊີແລ້ວ, ຖ້າວ່າເກີດໄພແຜ່ນດິນໄຫວແລະຄຶ້ນສືນາມິທີ່ຄ້າຍຄືກັບໄພທີ່ເກີດຂຶ້ນຢູ່ຍີ່ປຸ່ນ, ເຕັກໂນໂລຊີຂອງຈີນໃນປະຈຸບັນນີ້ສາມາດຮັບປະກັນຄວາມປອດໄພດ້ານການຜະລິດໄຟຟ້າດ້ວຍພະລັງງານນິວເຄຼຍໄດ້ຢ່າງແນ່ນອນ.
ທ່ານຈາງກົວປາວຍັງກ່າວເນັ້ນວ່າ, ອຸປະຕິເຫດນິວເຄຼຍມີຜົນສະທ້ອນຕໍ່ທົ່ວໂລກ. ສະນັ້ນ, ປະເທດຕ່າງໆຄວນເພີ່ມທະວີການຮ່ວມມືສາກົນໃນບັນຫາຄວາມປອດໄພດ້ານນິວເຄຼຍ.
