ປອກຕຸຍການເກີດການນັດຢຸດງານເພື່ອປະທ້ວງນະໂຍບາຍຮັດກຸມການເງິນ ຄວາມໜ້າເຊື່ອຖືຕໍ່ໜີ້ສາທາລະນະຂອງລັດຖະບານຖືກຫຼຸດລົງອີກ
(GMT+08:00) 2011-11-25 11:07:15 cri
ຍ້ອນບໍ່ພໍໃຈນຳລັດຖະບານທີ່ປະຕິບັດນະໂຍບາຍຮັດກຸມການເງິນ, ວັນທີ 24 ພະຈິກນີ້, ການບິນພົນລະເຮືອນ, ທາງລົດໄຟ, ອົງການປົກຄອງລັດຖະບານ, ໂຮງຮຽນແລະອົງການບໍລິຫານສາທາລະນະອື່ນໆຫຼາຍແຫ່ງໃນປອກຕຸຍການໄດ້ຢຸດການເຮັດວຽກປະຈຳວັນ, ເຮັດໃຫ້ຊີວິດການເປັນຢູ່ຂອງປະຊາຊົນຖືກກະທົບ.
ຢູ່ນະຄອນຫຼວງລິສບອນ, ລົດໄຟໃຕ້ດິນທົ່ວເມືອງໄດ້ຢຸດການບໍລິການ, ໂຮງຮຽນຢຸດການສອນ, ອົງການລັດຖະບານຫຼາຍແຫ່ງໄດ້ຢຸດການເຮັດວຽກ, ຈົນຮອດກຳມະກອນເຮັດວຽກງານອະນາໄມກໍ່ໄດ້ເຂົ້າຮ່ວມການນັດຢຸດງານ.
ວັນທີ 24 ພະຈິກນີ້, ຟິດຈ໌ ເຣດຕິງ(Fitch Rating), ເຊິ່ງເປັນອົງການປະເມີນສາກົນໄດ້ປະກາດບົດລາຍງານສະບັບໜຶ່ງ, ໂດຍກ່າວວ່າ, ຍ້ອນປອກຕຸຍການມີໜີ້ສິນຫຼາຍແລະອະນາຄົດຂອງເສດຖະກິດບໍ່ດີປານໃດ, ສະນັ້ນ, ຈຶ່ງໄດ້ຫຼຸດຄວາມໜ້າເຊື່ອຖືຕໍ່ໜີ້ສາທາລະນະຂອງລັດຖະບານປອກຕຸຍການລົງຈາກ "BBB-" ມາເປັນ "BB+", ນີ້ເຮັດໃຫ້ການຕີລາຄາຕໍ່ຄວາມສິນເຊື່ອຂອງລັດຖະບານປອກຕຸຍການຢູ່ໃນລະດັບຂີ້ເຫຍື້ອ. ນອກນັ້ນ, ອົງການ ຟິດຈ໌ ເຣດຕິງ(Fitch Rating) ຍັງປະເມີນຄວາມໜ້າເຊື່ອຖືທາງດ້ານໜີ້ສາທາລະນະຂອງລັດຖະບານປອກຕຸຍການໃນອານາຄົດໄປໃນທາງລົບ, ນີ້ໝາຍຄວາມວ່າ, ການປະເມີນຜົນຄວາມໜ້າເຊື່ອຖືທາງດ້ານໜີ້ສາທາລະນະຂອງປອກຕຸຍການອາດຈະຖືກຫຼຸດຕ່ຳລົງອີກ.
