ວັນທີ 24 ພະຈິກນີ້, ລັດຖະບານຊົ່ວຄາວລີບີຈັດພິທີສາບານຕົວເຂົ້າຮັບຕຳແໜ່ງຢູ່ສູນອິສລາວໃນນະຄອນຫຼວງຕຼີໂປລີ. ສະມາຊິກຄະນະລັດຖະບານຊົ່ວຄາວ 19 ຄົນເຊັ່ນ: ທ່ານອັບດູລາຮິມ ເອລ ຄິບ, ນາຍົກລັດຖະມົນຕີລັດຖະບານຊົ່ວຄາວເປັນຕົ້ນໄດ້ເຂົ້າຮ່ວມພິທີ, ມີຮອງນາຍົກລັດຖະມົນຕີໜຶ່ງທ່ານແລະລັດຖະມົນຕີວ່າການກະຊວງອີກ 7 ທ່ານບໍ່ໄດ້ເຂົ້າຮ່ວມພິທີສາບານຕົວ. ໃນເວລາປະກອບພິທີ, ມືຂວາຂອງເຂົາເຈົ້າວາງໄວ້ຢູ່ເທີງຄຳພີໂກຣານ, ສາບານຕົວຢູ່ຕໍ່ໜ້າທ່ານມຸສຕາຟາ ອັບດຸນ ຈາລີ, ປະທານ "ກຳມະການຊົ່ວຄາວແຫ່ງຊາດ" ລີບີແລະທຸງຂອງຄະນະກຳມະການຊົ່ວຄາວແຫ່ງຊາດ.
ເມື່ອພິທີສິ້ນສຸດລົງແລ້ວ, ທ່ານຄິບກ່າວວ່າ, ລັດຖະບານຊົ່ວຄາວມີຕຳແໜ່ງລັດຖະມົນຕີວ່າການກະຊວງ 24 ຕຳແໜ່ງ, ດັ່ງນັ້ນຈຶ່ງບໍ່ສາມາດກວມເອົາທຸກເຂດຂອງລີບີໄດ້, ແຕ່ "ຂ້າພະເຈົ້າແມ່ນລູກຊາຍຂອງລີບີ, ຂ້າພະເຈົ້າຕາງໜ້າໃຫ້ຄະນະລັດຖະບານທຸກທ່ານ ຂໍສາບານຕໍ່ປະຊາຊົນລີບີໝົດທຸກຄົນວ່າ, ຈະປະຕິບັດສິດແລະໜ້າທີຮັບຜິດຊອບຂອງລັດຖະບານເປັນຢ່າງດີ, ຈະເອົາໃຈໃສ່ຕໍ່ທຸກກຸ່ມຄົນ."
ທ່ານອາຊູ ເບັນ ຄາຍອານ, ລັດຖະມົນຕີວ່າການກະຊວງການຕ່າງປະເທດທີ່ຫາກໍ່ຂຶ້ນຮັບຕຳແໜ່ງຂອງລັດຖະບານຊົ່ວຄາວກ່າວວ່າ, ປະຈຸບັນ, ລີບີກຳລັງຢູ່ໃນໄລຍະສ້າງສາຄືນໃໝ່, ຍິນດີຕ້ອນຮັບປະເທດແລະອົງການຈັດຕັ້ງສາກົນຕ່າງໆທີ່ໃຫ້ການຊ່ວຍເຫຼືອ. ທ່ານຍັງກ່າວວ່າ, ທ່ານຄອງຄອຍພົບປະກັບເຈົ້າໜ້າທີ່ລັດຖະບານຈີນ.
ວັນທີ 23 ພະຈິກນີ້, ໂຄສົກກະຊວງການຕ່າງປະເທດຈີນກ່າວວ່າ, ການສ້າງຕັ້ງລັດຖະບານຊົ່ວຄາວລີບີຂຶ້ນເປັນຂີດໝາຍສະແດງໃຫ້ເຫັນວ່າ, ຂະບວນການຂ້າມຜ່ານທາງການເມືອງຂອງລີບີໄດ້ມີຄວາມຄືບໜ້າທີສຳຄັນ, ຈີນສະແດງຄວາມຊົມເຊີຍຕໍ່ເລື່ອງນີ້. ຈີນຈະທຳຄວາມພະຍາຍາມຮ່ວມກັນກັບລີບີ, ຊຸກຍູ້ໃຫ້ການພົວພັນມິດຕະພາບລະຫວ່າງຈີນກັບລີບີຂະຫຍາຍຕົວຢ່າງບໍ່ຢຸດຢັ້ງ, ແລະຍິນດີເສີມຂະຫຍາຍບົດບາດໃນທາງສ້າງສັນເຂົ້າໃນການສ້າງສາຄືນໃໝ່ຂອງລີບີ.
