ຈີນຮຽກຮ້ອງໃຫ້ຂະແໜງການຂົນສົ່ງທາງທະເລແລະຂະແໜງການຈໍລະຈອນສິນຄ້າຂອງອາຊີຮ່ວມມືກັນເພື່ອພັດທະນາສະພາບການໃໝ່
(GMT+08:00) 2011-11-26 14:23:10 cri
ວັນທີ25ພະຈິກນີ້,ຢູ່ຮົງກົງ,ທ່ານຊູຈູຢວນ,ລັດຖະມົນຕີຊ່ວຍວ່າການກະຊວງຄົມມະນາຄົມແລະ ຂົນສົ່ງຂອງຈີນກ່າວວ່າ,ປະຈຸບັນນີ້,ໂລກພວມຢູ່ໃນໄລຍະທີ່ພັດທະນາຢ່າງໃຫຍ່,ມີການປ່ຽນແປງຢ່າງໃຫຍ່ແລະປັບປຸງຢ່າງໃຫຍ່,ຂະແໜງການຂົນສົ່ງທາງທະເລແລະການຈໍລະຈອນສິນຄ້າຂອງອາຊີຄວນຮ່ວມມືກັນເພື່ອຮັບມືກັບສິ່ງທ້າທາຍອັນໃໝ່.
ທ່ານຊູຈູຢວນກ່າວວ່າ,ປະຈຸບັນນີ້,ຍ້ອນໄດ້ຮັບຜົນກະທົບຈາກປັດໄຈຕ່າງໆ,ເຊັ່ນ:ການຟື້ນຕົວຂອງເສດຖະກິດໂລກຊັກຊ້າລົງ,ຄວາມຮຽກຮ້ອງຕ້ອງການກັບຄວາມສາມາດດ້ານການຂົນສົ່ງບໍ່ດຸນດ່ຽງກັນ,ແລະຕົ້ນທຶນການທຸລະກິດສູງຂຶ້ນເປັນຕົ້ນ,ຂະແໜງການຂົນສົ່ງທາງທະເລໃນທົ່ວໂລກແມ່ນຢູ່ສະພາບອ່ອນເພຍໂດຍລວມ,ຍັງຕ້ອງການເວລາດົນສົມຄວນຈຶ່ງສາມາດຫຼຸດພົ້ນອອກຈາກສະພາບຄວາມຫຍຸ້ງຍາກແນວນີ້.
ທ່ານຊູຈູຢວນກ່າວວ່າ,ໂດຍປະເຊີນກັບການພັດທະນາແລະສິ່ງທ້າທາຍທີ່ມີຕໍ່ຂະແໜງການຂົນສົ່ງທາງທະເລແລະການຈໍລະຈອນສິນຄ້າຂອງໂລກ,ວົງການຂົນສົ່ງທາງທະເລແລະການຈໍລະ ຈອນສິນຄ້າຂອງອາຊີຄວນຮັກສາທ່າທີທີ່ໄຂປະຕູສູ່ພາຍນອກ,ເພີ່ມທະວີການປະສານສົມທົບກັນ,ສະແດງໃຫ້ເຫັນທ່າແຮງຂອງໃຜລາວໃນດ້ານແນວຄິດ,ການຄຸ້ມຄອງແລະເຕັກນິກ,ມີການປະດິດສ້າງໃໝ່,ຊຸກຍູ້ໃຫ້ອາຊີເສີມຂະຫຍາຍບົດບາດທີ່ສຳຄັນກວ່າເກົ່າໃນຂົງເຂດການຂົນສົ່ງທາງທະເລແລະການຈໍລະຈອນສິນຄ້າສາກົນ,ປະກອບສ່ວນຫຼາຍກວ່າເກົ່າເຂົ້າໃນການພັດທະນາຂອງໂລກໃນດ້ານນີ້.
