ວັນທີ26ພະຈິກນີ້, ທ່ານນາງຍິ່ງລັກ ຊິນນະວັດ,ນາຍົກລັດຖະມົນຕີໄທກ່າວວ່າ, ນາງເປັນຫ່ວງຫລາຍຕໍ່ໄພນໍ້າຖ້ວມຢູ່ພາກໃຕ້ຂອງໄທ, ນາງໄດ້ໃຫ້ກະຊວງມະຫາດໄທຕິດຕາມກວດກາສະພາບໄພນໍ້າຖ້ວມຂອງເຂດເກີດໄພນໍ້າຖ້ວມອັນໜັກໜ່ວງຢ່າງໃກ້ຊິດ.
ທ່ານນາງຍິ່ງລັກໄດ້ເຕືອນປະຊາຊົນຢູ່ເຂດທີ່ມີຄວາມສ່ຽງເກີດໄພນໍ້າຖ້ວມສູງ, ໂດຍສະເພາະແມ່ນປະຊາຊົນທີ່ຢູ່ແຄມແມ່ນໍ້າແລະເຂດທີ່ເກີດໄພນໍ້າຖ້ວມງ່າຍ, ຕ້ອງລະມັດລະວັງໄພພິບັດໃນທຸກເວລາ.
ສໍາລັບສະພາບຕ້ານໄພນໍ້າຖ້ວມຢູ່ພາກກາງນະຄອນຫລວງບາງກອກ, ທ່ານນາງຍິ່ງລັກກ່າວວ່າ, ສະພາບຕ້ານໄພນໍ້າຖ້ວມຢູ່ນະຄອນຫລວງບາງກອກໄດ້ດີຂຶ້ນຢ່າງຈະແຈ້ງ, ແຕ່6ຈັງຫວັດທີ່ຢູ່ອ້ອມຂ້າງນະຄອນຫລວງບາງກອກເຊັ່ນ,ຈັງຫວັດປະທຸມ ທານີແລະອື່ນໆຍັງຕ້ອງປັບປຸງ, ອົງການປົກຄອງນະຄອນຫລວງບາງກອກຄວນພິຈາລະນາກັບ6ຈັງຫວັດທີ່ຢູ່ອ້ອມຂ້າງ,ເພື່ອຊອກຫາວິທີຕ້ານໄພນໍ້າຖ້ວມ.
ຕົວເລກທີ່ກະຊວງມະຫາດໄທປະກາດໃນວັນທີ25ພະຈິກນີ້ສະແດງໃຫ້ເຫັນວ່າ, ມາຮອດປະຈຸບັນ, ມີ615ຄົນເສຍຊີວິດໃນໄພນໍ້າຖ້ວມທີ່ເກີດຂຶ້ນຢ່າງຕໍ່ເນື່ອງເປັນເວລາ4ເດືອນ.
