ກອງປະຊຸມລະດັບລັດຖະມົນຕີຮ່ວມກັນລາດຕະເວນແລະປະຕິບັດກົດໝາຍຢູ່ແມ່ນໍ້າຂອງລະຫວ່າງຈີນ,ລາວ,ມຽນມາກັບໄທໄດ້ຈັດຂຶ້ນໃນວັນທີ26ພະຈິກນີ້ຢູ່ນະຄອນຫລວງປັກກິ່ງຂອງຈີນ, ກອງປະຊຸມໄດ້ຕົກລົງວ່າ, ນັບແຕ່ກາງເດືອນທັນວາປີນີ້ເປັນຕົ້ນໄປ, 4ປະເທດນີ້ຈະດໍາເນີນວຽກງານລາດຕະເວນແລະປະຕິບັດກົດໝາຍຮ່ວມຢູ່ແມ່ນໍ້າຂອງ, ເພື່ອຮ່ວມກັນຮັກສາສະຖຽນລະພາບຂອງແມ່ນໍ້າຂອງ, ແລະຊຸກຍູ້ການພັດທະນາທາງດ້ານເສດຖະກິດແລະສັງຄົມ,ແລະການໄປມາຫາສູ່ກັນຢ່າງມີໄມຕີຈິດຂອງປະຊາຊົນຕາມແມ່ນໍ້າຂອງ.
ກອງປະຊຸມຄັ້ງນີ້ຕົກລົງວ່າ, ຈະສ້າງກອງບັນຊາການຮ່ວມກັນລາດຕະເວນແລະປະຕິບັດກົດໝາຍຢູ່ແມ່ນໍ້າຂອງລະຫວ່າງຈີນ,ລາວ,ມຽນມາກັບໄທ. ຈະສ້າງກອງບັນຊາການຢູ່ຈີນ, ສ້າງສູນສາຂາຕິດຕໍ່ພົວພັນຢູ່ລາວ,ມຽນມາແລະໄທ, ແລກປ່ຽນຂໍ້ມູນແລະຂ່າວລັບຢ່າງທັນການ, ຈັດຕັ້ງແລະປະສານວຽກງານຂອງຝ່າຍຕ່າງໆ, ສ້າງຊ່ອງທາງຕິດຕໍ່ພົວພັນ24ຊົ່ວໂມງທາງດ້ານການລາດຕະເວນແລະປະຕິບັດກົດໝາຍຢູ່ແມ່ນໍ້າຂອງລະຫວ່າງພາກສ່ວນບໍລິຫານງານຂອງ4ປະເທດ.
ນອກນີ້, 4ປະເທດຍັງໄດ້ເຫັນດີນໍາໃຊ້ມາດຕະການທີ່ບັງເກີດຜົນ, ເພື່ອຮ່ວມກັນຍົກສູງຄວາມສາມາດທາງດ້ານການປະຕິບັດກົດໝາຍຢູ່ແມ່ນໍ້າຂອງ. ຈີນຈະອໍານວຍຄວາມຊ່ວຍເຫລືອແກ່ລາວແລະມຽນມາໃນດ້ານອຸປະກອນລາດຕະເວນແລະປະຕິບັດກົດໝາຍຮ່ວມແລະການຝຶກອົບຮົມພະນັກງານ. ຝ່າຍຕ່າງໆຈະຮ່ວມກັນຈັດຕັ້ງປະຕິບັດການເຄື່ອນໄຫວຮ່ວມ, ສ້າງໜ່ວຍງານປະສົມຮັກສາຄວາມສະຫງົບຂອງແມ່ນໍ້າຂອງ.
