ເອຢິບຈັດການເລືອກຕັ້ງສະພາປະຊາຊົນ, ຜູ້ປະທ້ວງສືບຕໍ່ປະທ້ວງຢູ່ສະໜາມຫຼວງປົດປ່ອຍເລີແກ
(GMT+08:00) 2011-11-28 16:10:32 cri
ວັນທີ 28 ພະຈິກນີ້, ເອຢິບໄດ້ຈັດການເລືອກຕັ້ງສະພາປະຊາຊົນຂຶ້ນ (ສະພາຕ່ຳ). ການເລືອກຕັ້ງສະພາປະຊາຊົນເທື່ອນີ້ເປັນການເລືອກຕັ້ງເທື່ອທຳອິດຂອງເອຢິບພາຍຫຼັງທີ່ທ່ານມູບາຣັກ, ອະດີດປະທານາທິບໍດີລາອອກຈາກຕຳແໜ່ງໃນເດືອນກຸມພາປີນີ້ເປັນຕົ້ນມາ. ໃນການເລືອກຕັ້ງເທື່ອນີ້, ພັກການເມືອງຕ່າງໆຈະຍາດຊີງທີ່ນັ່ງໃນສະພາຈຳນວນ 498 ທີ່ນັ່ງເຊິ່ງກວມເອົາສອງສ່ວນສາມຂອງທີ່ນັ່ງໃນສະພາປະຊາຊົນ, ແລະອີກໜຶ່ງສ່ວນສາມຈະເຫຼືອໃຫ້ຜູ້ສະໝັກຮັບເລືອກຕັ້ງອິດສະຫຼະ. ການເລືອກຕັ້ງສະພາປະຊາຊົນເທື່ອນີ້ຈະສິ້ນສຸດລົງໃນກາງເດືອນມັງກອນປີໜ້າ, ຜົນການເລືອດຕັ້ງຈະປະກາດໃນວັນທີ 13 ມັງກອນປີໜ້າ. ຫຼັງຈາກນັ້ນ, ກອງປະຊຸມປຶກສາຫາລືກ່ຽວກັບການເລືອກຕັ້ງລັດຖະສະພາຫຼືສະພາສູງ ຂອງເອຢິບຈະຈັດຂຶ້ນໃນວັນທີ 29 ມັງກອນປີໜ້າ. ການເລືອກຕັ້ງປະທານາທິບໍດີຈະຈັດຂຶ້ນກ່ອນວັນທີ 30 ມິຖຸນາປີໜ້າ.
ພ້ອມກັນນັ້ນ, ວັນທີ 27 ພະຈິກນີ້, ຜູ້ປະທ້ວງຫຼາຍພັນຄົນຍັງສືບຕໍ່ປະທ້ວງຢູ່ສະໜາມຫຼວງປົດປ່ອຍ, ມີຜູ້ນຳຈາກພັກເມືອງໄດ້ຮຽກຮ້ອງໃຫ້ຈັດການເດີນຂະບວນປະທ້ວງທີ່ມີຜູ້ເຂົ້າຮ່ວມເຖິງໜຶ່ງລ້ານຄົນໃນວັນທີ 28 ພະຈິກນີ້, ເພື່ອຮຽກຮ້ອງໃຫ້ທະຫານມອບສິດໃນການກຳອຳນາດໃຫ້ແກ່ປະຊາຊົນ. ອົງການພີ່ນ້ອງມຸສລິມເອຢິບຮຽກຮ້ອງໃຫ້ປະຊາຊົນຕັ້ງໜ້າເຂົ້າຮ່ວມການປ່ອນບັດ. ວັນທີ 27 ພະຈິກນີ້, ໂຄສົກອົງການພີ່ນ້ອງມຸສລິມກ່າວຕໍ່ສື່ມວນຊົນວ່າ, ລັດຖະສະພາແມ່ນຕາງໜ້າປະຊາຊົນ, ຝ່າຍທະຫານຈຳເປັນຕ້ອງມອບສິດໃຫ້ພັກການເມືອງທີ່ໄດ້ຮັບຄະແນນສຽງກວ່າໝູ່ເພື່ອນຳພາໃນການຈັດຕັ້ງລັດຖະບານຊຸດໃໝ່.
ວັນທີ 27 ພະຈິກນີ້, ທ່ານໂມຮາມັດ ຮູເຊອິນ ຕັນຕາວີ, ປະທານຄະນະກຳມະການສູງສຸດຂອງກອງທັບປະກອບອາວຸດກ່າວວ່າ, ກອງທັບປະກອບອາວຸດຈະຮ່ວມກັບກະຊວງພາຍໃນເພື່ອຮັກສາຄວາມປອດໄພໃນການເລືອກຕັ້ງ, ເຮັດໃຫ້ປະຊາຊົນສາມາດນຳໃຊ້ສິດປະຊາທິປະໄຕຂອງຕົນຢ່າງເຕັມສ່ວນເພື່ອປະກອບສ່ວນເຂົ້າໃນການເລືອກຕັ້ງດຳເນີນໄປດ້ວຍດີ..
