ວັນທີ 26 ພະຈິກນີ້, ຍົນເຮລິກົບແຕປະກອບອາວຸດຂອງອົງການປ້ອງກັນອັດລັງຕິກເໜືອ ຫຼື ນາໂຕໄດ້ໂຈມຕີທາງອາກາດໃສ່ສະຖານີກວດການທະຫານແຫ່ງໜຶ່ງທີ່ຕັ້ງຢູ່ພາກຕາເວັນຕົກສຽງເໜືອຂອງປາກີສະຖານ, ເຮັດໃຫ້ທະຫານປາກີສະຖານ 26 ຄົນເສຍຊີວິດ, ແລະບາດເຈັບ 13 ຄົນ.
ມື້ດຽວກັນ, ລັດຖະບານປາກີສະຖານໄດ້ປະທ້ວງຢ່າງຮຸນແຮງຕໍ່ອາເມລິກາແລະນາໂຕ, ແລະຕົກລົງປິດເສັ້ນທາງລຳລຽງໃນອັຟການີສະຖານຂອງນາໂຕ, ຮຽກຮ້ອງໃຫ້ອາເມລິກາຖອນທະຫານອອກຈາກຖານທັບອາກາດຊາມຊີທີ່ຕັ້ງຢູ່ແຂວງບາລູຊິສຕັນ, ພາກຕາເວັນຕົກສຽງໃຕ້ປາກີສະຖານພາຍໃນ 15 ມື້.
ຕາມຖະແຫຼງການຂອງປາກີສະຖານແຈ້ງວ່າ, ປາກີສະຖານຍັງຈະພິຈາລະນາແລະດຳເນີນການປະເມີນຄືນໃໝ່ຕໍ່ໂຄງການ, ກິດຈະກຳແລະສັນຍາການຮ່ວມມືທີ່ອາເມລິກາ, ນາໂຕແລະພັດທະມິດຊ່ວຍເຫຼືອຄວາມປອດໄພສາກົນດຳເນີນຢູ່ປາກີສະຖານ, ເນື້ອໃນຈະລວມທັງການທູດ, ການເມືອງ, ການທະຫານແລະຂ່າວລັບເປັນຕົ້ນ.
ຕໍ່ເລື່ອງນີ້, ມື້ດຽວກັນ, ເຈົ້າໜ້າທີ່ອາເມລິກາແລະນາໂຕໃຫ້ຄຳໝັ້ນສັນຍາວ່າ, ຈະສຳຫຼວດກວດກາເບີ່ງເຫດການທີ່ເກີດຂຶ້ນຢ່າງລະອຽດ. ພ້ອມກັນນັ້ນ, ກໍ່ສະແດງຄວາມໄວ້ອາໄລຢ່າງສຸດຊຶ້ງຕໍ່ຜູ້ເສຍຊີວິດແລະຜູ້ບາດເຈັບໃນເຫດການຫຼອນໂຈມຕີທາງອາກາດເທື່ອນີ້.
