ຈີນເພີ່ມທະວີການແລກປ່ຽນກັບ5ປະເທດຢູ່ເຂດລ້ອງແມ່ນ້ຳຂອງໃນດ້ານເຕັກນິກທາງຊົນລະປະທານ
(GMT+08:00) 2011-11-29 15:11:59 cri
ຕາມຂ່າວສານຊີນຮວາ: ນັກວິຊາການດ້ານຊົນລະປະທານ11ຄົນທີ່ມາຈາກ5ປະເທດຢູ່ເຂດລ້ອງແມ່ນ້ຳຂອງເຊັ່ນ:ຫວຽດນາມ,ກຳປູເຈຍ,ໄທ,ລາວ,ມຽນມາແລະອື່ນໆແລະກອງເລຂາ ຄະນະກຳມະການແມ່ນ້ຳຂອງໄດ້ສິ້ນສຸດການຝຶກອົບຮົມຢູ່ຈີນໃນອາທິດແລ້ວນີ້. ນີ້ແມ່ນຈີນຈັດການຝຶກອົບຮົມດ້ານເຕັກນິກທາງຊົນລະປະທານລຽນຕິດເປັນປີທີ2ໃຫ້ແກ່ປະເທດຢູ່ເຂດລ້ອງແມ່ນ້ຳຂອງ.
ໃນການຝຶກອົບຮົມເທື່ອນີ້ໄດ້ດຳເນີນເປັນເວລາ10ວັນ,ຜູ້ເຂົ້າຮ່ວມການຝຶກອົບຮົມໄດ້ຮຽນຮູ້ຢ່າງເປັນລະບົບໃນດ້ານເຕັກນິກການພະຍາກອນໄພນ້ຳຖ້ວມ,ແລະທັດສະນະ
ສຶກສາໂຄງການປ້ອງກັນໄພນ້ຳຖ້ວມແມ່ນ້ຳຢາງຊີກຽງ,ປະຕູນ້ຳສາຂານ້ຳຈິ່ງຈ່ຽງ,ເຂດເກັບນ້ຳນອງສາຂາແມ່ນ້ຳຈິ່ງຈ່ຽງ,ໂຄງການສ່ານເຊຍແລະສະຖານີອຸທົກກະສາດຂອງເມືອງຊ່າຊື້.
ຜູ້ເຂົ້າຮ່ວມການຝຶກອົບຮົມກ່າວວ່າ,ໃນການຝຶກອົບຮົມເທື່ອນີ້ເຂົາເຈົ້າໄດ້ຮັບຄວາມຮູ້ຢ່າງຫຼວງຫຼາຍ,ເພາະວ່າເຂດລ້ອງແມ່ນ້ຳລ້ານຊ້າງຫາແມ່ນ້ຳຂອງກັບເຂດລ້ອງແມ່ນ້ຳຢາງຊີກຽງມີລັກສະນະດ້ານພູມສັນຖານທີ່ຄ້າຍຄືກັນ,ບົດຮຽນທີ່ໄດ້ຮັບໃນການຝຶກອົບຮົມເທື່ອນີ້ບໍ່ພຽງແຕ່ຈະມີຜົນດີຕໍ່ວຽກງານຂອງຕົນ,ແຕ່ຍັງຈະເຮັດໃຫ້ປະເທດທີ່ຢູ່ຕາມແຄມແມ່ນ້ຳລ້ານຊ້າງຫາແມ່ນ້ຳຂອງລວມທັງມຽນມາ,ລາວ,ໄທ,ກຳປູເຈຍແລະຫວຽດນາມໄດ້ຮັບຜົນປະໂຫຍດອີກດ້ວຍ.
ຍ້ອນໄດ້ຮັບຜົນກະທົບຈາກການປ່ຽນແປງຂອງດິນຟ້າອາກາດ,ເຂດອາຊີຕາເວັນອອກສຽງໃຕ້ໄດ້ເກີດໄພນ້ຳຖ້ວມແລະໄພແຫ້ງແລ້ງທີ່ຮຸນແຮງເລື້ອຍໆ. ໄພນ້ຳຖ້ວມຍັງແມ່ນໄພຂົ່ມຂູ່ອັນໃຫຍ່ຫຼວງຕໍ່ການພັດທະນາເສດຖະກິດສັງຄົມແບບຍືນຍົງຢູ່ເຂດດັ່ງກ່າວ. ໃນລະດູຝົນຂອງປີນີ້,ຢູ່ເຂດລ້ອງແມ່ນ້ຳເຈົ້າພະຍາຂອງໄທໄດ້ເກີດໄພນ້ຳຖ້ວມທີ່ບໍ່ເຄີຍມີມາກ່ອນໃນ50ປີຜ່ານມາ,ໃນ24ແຂວງແລະນະຄອນຂອງກຳປູເຈຍມີ 19ແຂວງແລະນະຄອນເກີດໄພນ້ຳຖ້ວມ,ເຂດສາມຫຼ່ຽມປາກແມ່ນ້ຳຂອງຍ່ານຫວຽດນາມກໍ່ໄດ້ເກີດໄພນ້ຳຖ້ວມໃນຫຼາຍລະດັບຕ່າງກັນ.
ທ່ານກ່າວປົ່ວ, ຫົວໜ້າກົມການຮ່ວມມືສາກົນແລະເຕັກນິກວິທະຍາສາດຂອງກະຊວງຊົນລະປະທານຈີນກ່າວວ່າ,ໄພນ້ຳຖ້ວມເກີດຂຶ້ນເລື້ອຍໆ,ເຮັດໃຫ້ປະຊາຊົນແລະປະເທດທີ່ຢູ່ຕາມເຂດລ້ອງແມ່ນ້ຳແຫ່ຼງດຽວກັນໄດ້ຮັບຄວາມລຳບາກຄືກັນ,ຈີນຍິນດີແລກປ່ຽນບົດຮຽນທີ່ສຳເລັດຜົນແລະເຕັກນິກກັບປະເທດຕ່າງໆທີ່ຢູ່ເຂດລ້ອງແມ່ນ້ຳຂອງໃນວຽກງານຕ້ານໄພແລະຫຼຸດຜ່ອນໄພພິບັດໂດຍຜ່ານການຈັດຊຸດຝຶກອົບຮົມດ້ານເຕັກນິກແບບນີ້,ເພື່ອສະໜອງການຊ່ວຍເຫຼືອຕາມຄວາມສາມາດຂອງຕົນໃຫ້ແກ່ປະເທດຕ່າງໆຢູ່ເຂດລ້ອງແມ່ນ້ຳຂອງໃນການຍົກສູງຄວາມສາມາດໃນດ້ານການຕ້ານໄພແລະຫຼຸດຜ່ອນໄພພິບັດ.
ຂ່າວແຈ້ງວ່າ, ຈີນໄດ້ເລີ່ມເຂົ້າຮ່ວມການເຈລະຈາປະຈຳປີທີ່ເລີ່ມດຳເນີນໃນປີ1996ກັບຄະນະກຳມະການແມ່ນ້ຳຂອງ,ມີຈຸດປະສົງເພື່ອປະກອບສ່ວນຂອງຕົນເຂົ້າໃນການພັດທະນາພາກພື້ນນີ້. ປີ2002,ກະຊວງຊົນລະປະທານຈີນໄດ້ເຊັນສັນຍາແຈ້ງສະພາບຍາມນ້ຳຂຶ້ນກັບກອງເລຂາຄະນະກຳມະການແມ່ນ້ຳຂອງ,ໄດ້ສະໜອງຂໍ້ມູນຂ່າວສານດ້ານອຸທົກກະສາດເປັນໄລຍະ9ປີລຽນຕິດໃຫ້ແກ່ປະເທດຕ່າງໆຢູ່ເຂດລ້ອງແມ່ນ້ຳຂອງ.
