ວັນທີ 28 ພະຈິກນີ້, ກອງປະຊຸມຝ່າຍເຊັນ"ສົນທິສັນຍາຂອບການປ່ຽນແປງຂອງດິນຟ້າອາກາດສະຫະປະຊາຊາດ"ຄັ້ງທີ 17 ກໍ່ຄືກອງປະຊຸມຝ່າຍເຊັນ"ອະນຸສັນຍາໂຕກຽວ"ຄັ້ງທີ 7 ໄດ້ຈັດຂຶ້ນຢູ່ເດີບານ ເມືອງແຄມຝັ່ງທະເລຂອງອາຟຼິກາໃຕ້.
ນາງຄຼິສທີນາ ຟິເກີລີ ເລຂາປະຕິບັດງານຂອງກອງເລຂາ"ສົນທິສັນຍາ"ກ່າວວ່າ,ກົນໄກ"ສອງລະບົບ"ທີ່ສືບຕໍ່ປະຕິບັດ"ສົນທິສັນຍາ" ແລະ ຮັກສາການຮັບມືກັບການປ່ຽນແປງຂອງດິນຟ້າອາກາດແມ່ນໜ້າທີ່ສຳຄັນຂອງກອງປະຊຸມຄັ້ງນີ້.
ຈີນ,ອິນເດຍ,ເບຼຊິນ ແລະ ອາຟິຼກາໃຕ້ ເຊິ່ງເປັນປະເທດທີ່ຕາງໜ້າໃຫ້ຫຼັກໝັ້ນຂອງປະເທດພວມພັດທະນາກ່າວເນັ້ນວ່າ, "ອະນຸສັນຍາ"ແມ່ນພື້ນຖານໃນການເຈລະຈາກ່ຽວກັບການປ່ຽນແປງຂອງດິນຟ້າອາກາດຂອງສະຫະປະຊາຊາດ, ການກຳນົດໄລຍະໃຫ້ຄຳໝັ້ນສັນຍາໄລຍະທີສອງໃຫ້ຈະແຈ້ງແມ່ນໜ້າທີ່ສຳຄັນທີ່ສຸດຂອງກອງປະຊຸມເດີບານ.
ໄລຍະໃຫ້ຄຳໝັ້ນສັນຍາທີໜຶ່ງທີ່ຜ່ານການຮັບຮອງໃນ"ອະນຸສັນຍາໂຕກຽວ"ໃນປີ1997ຈະຮອດເວລາກຳນົດໃນປີ2012. ປະເທດພັດທະນາຈຳນວນໜຶ່ງໄດ້ສະແດງເຈດຕະນາວ່າຈະບໍ່ສະໜັບສະໜູນໄລຍະໃຫ້ຄຳໝັ້ນສັນຍາທີສອງແລ້ວ, ສະນັ້ນ, ປັດຈຸບັນ, ຈະມີໄລຍະໃຫ້ຄຳໝັ້ນສັນຍາທີສອງຫຼືບໍ່ນັ້ນຍັງບໍ່ທັນແມ່ນອນເທື່ອ.
ກອງປະຊຸມເດີບານເທື່ອນີ້ມີແຜນຈະດຳເນີນໄປເປັນເວລາ 12 ວັນ.
