ປາກີສະຖານປະກາດວ່າຈະບໍ່ເຂົ້າຮ່ວມກອງປະຊຸມບອນເພື່ອປະທ້ວງນາໂຕ
(GMT+08:00) 2011-11-30 10:37:35 cri
ລັດຖະບານປາກີສະຖານປະກາດໃນວັນທີ29ພະຈິກນີ້ວ່າຈະບໍ່ເຂົ້າຮ່ວມກອງປະຊຸມບອນກ່ຽວກັບອະນາຄົດຂອງອັຟການີສະຖານທີ່ຈະຈັດຂຶ້ນໃນອາທິດໜ້າ,ເພື່ອເປັນການປະທ້ວງຕໍ່ນາໂຕທີ່ຫຼອນໂຈມຕີທາງອາກາດຕໍ່ດ່ານກວດກາທາງການທະຫານຂອງປາກີສະຖານໃນເມື່ອບໍ່ດົນມານີ້.
ວັນທີ29ພະຈິກນີ້,ລັດຖະບານປາກີສະຖານໄດ້ອອກຖະແຫຼງການວ່າ,ປາກີສະຖານຫວັງວ່າກອງປະຊຸມບອນຈະໄດ້ຮັບຜົນສຳເລັດ,ແຕ່ເນື່ອງຈາກວ່າ ໄດ້ພິຈາລະນາເຖິງການຂະຫຍາຍຕົວຂອງສະຖານະການໃນປະຈຸບັນ,ປາກີສະ ຖານຈິ່ງຕັດສິນໃຈບໍ່ເຂົ້າຮ່ວມກອງປະຊຸມໃນຄັ້ງນີ້.ຖະແຫຼງການຍັງແຈ້ງວ່າ,ຄະນະລັດຖະບານປາກີສະຖານກ່າວປະນາມຕໍ່ນາໂຕທີ່ສົ່ງຍົນເຮລິກົບແຕຕິດອາວຸດຫຼອນໂຈມຕີດ່ານກວດກາທາງການທະຫານຂອງປາກີສະຖານໃນວັນທີ26ພະຈິກນີ້ຊຶ່ງເຮັດໃຫ້ທະຫານປາກີສະຖານເສຍຊີວິດ24ຄົນ,ຖະແຫຼງການແຈ້ງວ່າການຫຼອນໂຈມຕີເທື່ອນີ້ເປັນການລ່ວງລ້ຳເອກກະລາດອະທິປະໄຕຂອງປາກີສະຖານ.
ວັນທີ29ພະຈິກນີ້,ອາເມລິກາພະຍາຍາມເກ້ຍກ່ອມໃຫ້ປາກີສະຖານເຂົ້າຮ່ວມກອງປະຊຸມບອນ.ທ່ານມາກ ໂທເນີ ໂຄສົກກະຊວງການຕ່າງປະເທດອາເມລິກາກ່າວໃນກອງປະຊຸມຂ່າວໃນມື້ດຽວກັນວ່າ,ກອງປະຊຸມບອນຈະປຶກສາຫາລືບັນຫາກ່ຽວກັບຈະເຮັດແນວໃດເພື່ອສ້າງອັຟການີສະຖານໃຫ້ມີຄວາມໝັ້ນຄົງແລະຄວາມຈະເລີນຮຸ່ງເຮືອງຫຼາຍກວ່າເກົ່າ.ສະນັ້ນ,ການເຂົ້າຮ່ວມກອງປະຊຸມເທື່ອນີ້ແມ່ນສອດຄ່ອງກັບຜົນປະໂຫຍດຂອງປາກີສະຖານ.
