ສະຫະປະຊາຊາດຈັດພິທີລະລຶກ"ວັນສາກົນສະໜັບສະໜູນປະຊາຊົນປາແລັສຕິນ"
(GMT+08:00) 2011-11-30 11:00:46 cri
ພິທີລະລຶກ"ວັນສາກົນສະໜັບສະໜູນປະຊາຊົນປາແລັສຕິນ"ຂອງສະຫະປະຊາຊາດໄດ້ຈັດຂຶ້ນໃນວັນທີ29ພະຈິກນີ້ຢູ່ສຳນັກງານໃຫຍ່ສະຫະປະຊາຊາດທີ່ນີວຢອກ,ຜູ່ເຂົ້າຮ່ວມໃນພິທີໄດ້ຮຽກຮ້ອງໃຫ້ປາແລັສຕິນແລະອິສຣາແອນເລັ່ງລັດພະຍາຍາມທັບມ້າງສະພາບຢຸດຈຶ້ງຢູ່ບ່ອນເກົ່າໃນການພົວພັນລະຫວ່າງສອງຝ່າຍໂດຍໄວເທົ່າທີ່ຈະໄວໄດ້.
ມື້ດຽວກັນ,ທ່ານບານກີມູນ ເລຂາທິການໃຫຍ່ສະຫະປະຊາຊາດໄດ້ຮຽກຮ້ອງໃຫ້ຜູ່ນຳຂອງອິສຣາແອນແລະປາແລັສຕິນຈົ່ງສະແດງໃຫ້ເຫັນຄວາມກ້າຫານແລະຄວາມຕັດສິນໃຈໃນການສ້າງແຜນການອັນຈິງຈັງກ່ຽວກັບບັນຫາຊາຍແດນແລະແລະຄວາມປອດໄພ,ດຳເນີນການເຈລະຈາໂດຍກົງໂດຍປະຕິບັດຕາມຄຳໝັ້ນສັນຍາຮ່ວມຊ້າສຸດໃຫ້ໄດ້ເຊັນສັນຍາໃນທ້າຍປີ2012.
ທ່ານເວິ່ນເຈ່ຍປາວ ນາຍົກລັດຖະມົນຕີຈີນທີ່ຕາງໜ້າລັດຖະບານຈີນໄດ້ສົ່ງໂທລະເລກອວຍພອນໄປຍັງພິທີລະລຶກໃນຄັ້ງນີ້.ເນື້ອໃນໂທລະເລກໄດ້ຂຽນວ່າ,ລັດຖະບານຈີນເດັດດ່ຽວສະໜັບສະໜູນພາລະກິດອັນເປັນທຳຂອງປະຊາຊົນປາແລັສຕິນໃນການຟື້ນຟູສິດທີ່ຊອບດ້ວຍກົດໝາຍຂອງປະຊາຊາດນັ້ນມາໂດຍຕະຫຼອດ.ໃນຖານະເປັນປະເທດສະມາຊິກຖາວອນຂອງສະພາຄວາມໝັ້ນຄົງສະຫະປະຊາຊາດ,ຈີນຈະສະໜັບສະໜູນສະຫະປະຊາຊາດເສີມຂະຫຍາຍບົດບາດສຳຄັນໃນບັນຫາຕາເວັນອອກກາງຄືໄລຍະຜ່ານມາ,ແລະຍິນດີຮ່ວມກັບປະຊາຄົມໂລກສືບຕໍ່ທຳຄວາມພະຍາຍາມຢ່າງບໍ່ລົດລະເພື່ອຊຸກຍູ້ໃຫ້ບັນຫາປາແລັສຕິນໄດ້ຮັບການແກ້ໄຂຢ່າງຍຸດຕິທຳ,ປົກປັກຮັກສາສັນຕິພາບ,ສະຖຽນລະພາບແລະການພັດທະນາຂອງພາກພື້ນຕາເວັນອອກກາງ.
