ຈີນຍ້ອງຍໍບຸກຄົນວົງການຕ່າງໆຂອງແນວໂຮມເອກກະພາບທີ່ໄດ້ປະກອບສ່ວນເຂົ້າໃນການສ້າງສັງຄົມອີ່ມໜຳສຳລານຮອບດ້ານ
(GMT+08:00) 2011-11-30 18:11:01 cri
ວັນທີ 30 ພະຈິກນີ້, ກອງປະຊຸມຍ້ອງຍໍບຸກຄົນພັກປະຊາທິປະໄຕຕ່າງໆ, ສະຫະພັນອຸດສາຫະກຳການຄ້າແລະບຸກຄົນທີ່ບໍ່ຂຶ້ນກັບພັກຝ່າຍໃດຂອງຈີນທີ່ໄດ້ປະກອບສ່ວນເຂົ້າໃນການສ້າງສັງຄົມອີ່ມໜຳສຳລານຮອບດ້ານໄດ້ຈັດຂຶ້ນຢູ່ປັກກິ່ງ. ໃນເວລາພົບປະກັບຜູ້ແທນທີ່ເຂົ້າຮ່ວມປະຊຸມ, ທ່ານເຈຍຊີ້ງລິນ, ກຳມະການປະຈຳກົມການເມືອງສູນກາງພັກກອມມູນິດຈີນ, ປະທານສະພາປຶກສາການເມືອງແຫ່ງຊາດຈີນກ່າວວ່າ, ບຸກຄົນພັກປະຊາທິປະໄຕຕ່າງໆ, ສະຫະພັນອຸດສາຫະກຳການຄ້າແລະບຸກຄົນທີ່ບໍ່ຂຶ້ນກັບພັກຝ່າຍໃດຂອງຈີນໄດ້ເສີມຂະຫຍາຍບົດບາດທີ່ບໍ່ມີຫຍັງຈະສາມາດທົດແທນໄດ້ເຂົ້າໃນການສ້າງສັງຄົມອີ່ມໜຳສຳລານຮອບດ້ານ, ແມ່ນກຳລັງແຮງທີ່ສຳຄັນໃນການຊຸກຍູ້ພາລະກິດສັງຄົມນິຍົມທີ່ມີເອກະລັກພິເສດຂອງຈີນ, ເຊິ່ງໄດ້ສະແດງໃຫ້ເຫັນເຖິງທ່າແຮງຂອງຈຸດພິເສດຂອງລະບອບຫຼາຍພັກຮ່ວມມືແລະປຶກສາຫາລືທາງການເມືອງທີ່ນຳພາໂດຍພັກກອມມູນິດຈີນ.
ໃນກອງປະຊຸມ, ທ່ານອີນເວີ້ຍມິນ, ລັດຖະມົນຕີວ່າການກະຊວງຊັບພະຍາກອນມະນຸດແລະປະກັນສັງຄົມຈີນໄດ້ກ່າວການຕົກລົງໃນການຍ້ອງຍໍແນວໂຮມເອກະພາບ, ກະຊວງຊັບພະຍາກອນມະນຸດແລະປະກັນສັງຄົມ, ສູນກາງພັກປະຊາທິປະໄຕຕ່າງໆແລະສະຫະພັນອຸດສາຫະກຳການຄ້າແຫ່ງຊາດ. ມີໜ່ວຍງານ 50 ຫົວໜ່ວຍໄດ້ຮັບຄຳຍ້ອງຍໍກຸ່ມຄະນະກ້າວໜ້າ, 150 ຄົນໄດ້ຮັບຄຳຍ້ອງຍໍວ່າເປັນບຸກຄົນກ້າວໜ້າ, ພ້ອມກັນນັ້ນ, ຍັງໄດ້ຍ້ອງຍໍໝາກຜົນໃຫ້ຄຳສະເໜີດີເດັ່ນ 50 ຢ່າງ, ແລະໝາກຜົນບໍລິການສັງຄົມດີເດັ່ນ 50 ຢ່າງ. ຜູ້ແທນທີ່ຮ່ວມປະຊຸມໝົດທຸກຄົນໄດ້ສະເໜີ "ໜັງສືຮຽກຮ້ອງໃຫ້ບຸກຄົນພັກປະຊາທິປະໄຕຕ່າງໆ, ສະຫະພັນອຸດສາຫະກຳການຄ້າແລະບຸກຄົນທີ່ບໍ່ຂຶ້ນກັບພັກຝ່າຍໃດຂອງຈີນປະກອບສ່ວນເຂົ້າໃນການສ້າງສັງຄົມທີ່ອີ່ມໜຳສຳລານຮອບດ້ານ" ໃຫ້ຫຼາຍຂຶ້ນກວ່າເກົ່າ.
