ລັດຖະບານຈີນຍົກສູງມາດຖານແຫ່ງການຊ່ວຍເຫຼືອປະຊາຊົນຜູ່ທຸກຍາກແຫ່ງຊາດ
(GMT+08:00) 2011-11-30 17:13:00 cri
ວັນທີ29ພະຈິກນີ້,ກອງປະຊຸມກ່ຽວກັບວຽກງານຊ່ວຍເຫຼືອເຂດທຸກຍາກແລະປະຊາຊົນຜູ່ທຸກຍາກຂອງສູນກາງຈີນໄດ້ຈັດຂຶ້ນຢູ່ປັກກິ່ງ.ກອງປະຊຸມຕົກລົງວ່າ,ຈະປັບລາຍໄດ້ສຸດທິສະເລ່ຍຕໍ່ຫົວຄົນຂອງຊາວກະສິກອນຈາກ1274ຢວນໃນປີ2010ຂຶ້ນເປັນ2300ຢວນ,ຊຶ່ງຈະເປັນມາດຖານໃໝ່ແຫ່ງການຊ່ວຍເຫຼືອປະຊາຊົນຜູ່ທຸກຍາກແຫ່ງຊາດ.ມາດຖານນີ້ໄດ້ພຸ່ງສູງຂຶ້ນ92%ເມື່ອທຽບໃສ່ປີ2009,ມີປະຊາຊົນຜູ່ມີລາຍໄດ້ຕ່ຳຈຳນວນຫຼາຍກວ່າເກົ່າຖືກຈັດເຂົ້າໃນຂອບເຂດທີ່ຈະໄດ້ຮັບການຊ່ວຍເຫຼືອ.
ທ່ານຖ່າງໝີນ,ທີ່ປຶກສາແຫ່ງລັດຈີນ,ຮອງປະທານສະພາມົນຕີປະຈຳມູນນິທິຊ່ວຍເຫຼືອຄວາມທຸກຍາກໂຢເຊິງເຫັນວ່າ,ລັດຖະບານເພີ່ມງົບປະມານເຂົ້າໃນການຊ່ວຍເຫຼືອປະຊາຊົນຜູ່ທຸກຍາກແລະຍົກສູງມາດຖານແຫ່ງການຊ່ວຍເຫຼືອປະຊາຊົນຜູ່ທຸກຍາກ,ແມ່ນສອດຄ່ອງກັບການປ່ຽນແປງລັກສະນະຂັ້ນຕອນໃນການພັດທະນາເສດຖະກິດສັງຄົມ, ການພັດທະນາເພື່ອບຳບັດຄວາມທຸກຍາກ,ແລະທິດທາງໃນການປັບປຸງນະໂຍບາຍກ່ຽວກັບການບຳບັດຄວາມທຸກຍາກໃຫ້ສົມບູນຂຶ້ນຢ່າງບໍ່ຢຸດຢັ້ງ. ສາມາດຄາດຄະເນໄດ້ວ່າ,ຄຽງຄູ່ກັບເສດຖະກິດພັດທະນາແລ້ວ,ມາດຖານດັ່ງກ່າວຍັງຈະຍົກສູງຂຶ້ນຕື່ມອີກ,ນີ້ຈະເຮັດໃຫ້ຜູ່ທຸກຍາກຈຳນວນຫຼາຍກວ່າເກົ່າກາຍເປັນຜູ່ທີ່ໄດ້ຮັບການຊ່ວຍເຫຼືອ,ແລະເຮັດໃຫ້ຊີວິດການເປັນຢູ່ຂອງເຂົາເຈົ້າດີຂຶ້ນ.
ກອງປະຊຸມຄັ້ງນີ້ໄດ້ນຳສະເໜີເປົ້າໝາຍລວມຂອງວຽກງານຊ່ວຍເຫຼືອເຂດທຸກຍາກແລະ ປະຊາຊົນຜູ່ທຸກຍາກໃນ10ປີຂ້າງໜ້າຂອງຈີນ,ຄື:ຮອດປີ2020,ເຮັດໃຫ້ຜູ່ທຸກຍາກທີ່ໄດ້ຮັບການຊ່ວຍເຫຼືອສາມາດກິນອີ່ມນຸ່ງອຸ່ນ,ຮັບປະກັນໃຫ້ພວກເຂົາເຈົ້າຈະໄດ້ຮັບການສຶກສາພາກບັງຄັບ,ການປິ່ນປົວພະຍາດພື້ນຖານແລະມີເຮືອນຢູ່.ນອກນີ້,ຍັງຈະເຮັດໃຫ້ລະດັບການເພີ່ມຂຶ້ນຂອງລາຍໄດ້ສຸດທິສະເລ່ຍຕາມຫົວຄົນຂອງຊາວກະສິກອນຢູ່ເຂດທຸກຍາກສູງກວ່າລະດັບສະເລ່ຍຂອງທົ່ວປະເທດ,ດັດຊະນີພື້ນຖານຂອງຂົງເຂດການບໍລິການສາທາລະນະໃກ້ກັບລະດັບສະເລ່ຍຂອງທົ່ວປະເທດ,ຫັນປ່ຽນລະດັບຄວາມຜິດໂຕນກັນດ້ານການພັດທະນາຂະຫຍາຍກວ້າງອອກ.
