ສື່ມວນຊົນອີຣານລາຍງານວ່າ, ວັນທີ 29 ພະຈິກນີ້, ຕຳຫຼວດເຕເຮຣານຂອງອີຣານໄດ້ຈັບຜູ່ປະທ້ວງ 12 ຄົນທີ່ໂຈມຕີສຳນັກງານສະມາຄົມວັດທະນະທຳອັງກິດປະຈຳອີຣານ.
ຕອນຄ່ຳມື້ດຽວກັນ, ກະຊວງການຕ່າງປະເທດອີຣານອອກຖະແຫຼງການ ສະແດງຄວາມເສຍໃຈຕໍ່ເຫດການທີ່ມີຜູ່ປະທ້ວງຈຳນວນໜຶ່ງໂຈມຕີສະຖານທູດອັງກິດປະຈຳອີຣານ. ຖະແຫຼງການກ່າວເນັ້ນວ່າ, ການໂຈມຕີສະຖານທູດຕ່າງປະເທດແມ່ນການກະທຳທີ່"ບໍ່ສາມາດຮັບເອົາໄດ້", ກະຊວງການຕ່າງປະເທດອີຣານຈະແກ້ໄຂເຫດການເທື່ອນີ້ໂດຍທາງກົດໝາຍ.
ໂດຍແນໃສ່ເຫດການເທື່ອນີ້, ສະພາຄວາມໝັ້ນຄົງສະຫະປະຊາຊາດ, ອາເມລິກາ ແລະ ອັງກິດຕ່າງໄດ້ອອກຖະແຫຼງການກ່າວປະນາມ. ຖະແຫຼງການອາເມລິກາຂຽນວ່າ, ກະຊວງການຕ່າງປະເທດ ກັບ ລັດຖະບານອັງກິດຮັກສາຕິດຕໍ່ກັນຢ່າງໃກ້ຊິດ, ກຽມສະໜອງການຊ່ວຍເຫຼືອຕໍ່ປະເທດພັນທະມິດໃນເວລາທີ່ທຸກຍາກລຳບາກ.ວັນທີ 29 ພະຈິກນີ້, ນັກສຶກສາ ແລະ ມວນຊົນຫຼາຍພັນຄົນໃນນະຄອນຫຼວງເຕເຮຣານໄດ້ຈັດງານຊຸມນຸມປະທ້ວງຢູ່ໜ້າປະຕູສະຖານທູດອັງກິດປະຈຳອີຣານ, ເພື່ອປະທ້ວງທີ່ລັດຖະບານອັງກິດປະຕິບັດມາດຕະການລົງໂທດຝ່າຍດຽວຕໍ່ອີຣານໃນເມື່ອບໍ່ດົນມານີ້. ມື້ດຽວກັນ, ຜູ່ປະທ້ວງຫຼາຍຮ້ອຍຄົນຍັງໄດ້ຈັດໂຮມຊຸມນຸມປະທ້ວງຢູ່ສຳນັກງານສະມາຄົມວັດທະນະທຳອັງກິດປະຈຳອີຣານແລະມີນັກສຶກສາຈຳນວນໜຶ່ງໄດ້ບຸກເຂົ້າໃນອາຄານຂອງສຳນັກງານ.
