ໄທຫຼຸດອັດຕາດອກເບັ້ຍພື້ນຖານເພື່ອຮັບມືກັບຜົນກະທົບຈາກໄພນ້ຳຖ້ວມ
(GMT+08:00) 2011-12-01 11:50:54 cri
ຕາມໜັງສືພິມເຢິນມິນຢື້ປ້າວຂອງຈີນລາຍງານວ່າ: ໄພນ້ຳຖ້ວມຄັ້ງຮ້າຍແຮງທີ່ສຸດໃນຮອບ50ກວ່າປີຜ່ານມາໄດ້ເຮັດໃຫ້ທະນາຄານກາງຂອງໄທປ່ຽນທິດທາງນະໂຍບາຍ.ວັນທີ30ພະຈິກແລ້ວນີ້,ທະນາຄານກາງຂອງໄທໄດ້ປະກາດປັບອັດຕາດອກເບັ້ຍພື້ນຖານໃຫ້ຕ່ຳລົງ0,25%ຄືຫຼຸດລົງເຖິງ3,35%.ນີ້ແມ່ນທະນາຄານກາງຂອງໄທຫຼຸດອັດຕາດອກເບັ້ຍເປັນເທື່ອທຳອິດໃນໄລຍະ2ປີຜ່ານມາ.ທະນາຄານກາງໄທກ່າວວ່າ,ການຫຼຸດອັດຕາດອກເບັ້ຍມີຜົນດີຕໍ່ການຟື້ນຟູເສດຖະກິດແລະສ້າງຄວາມໝັ້ນໃຈ.
ໄພນ້ຳຖ້ວນຄັ້ງຮ້າຍແຮງທີ່ສຸດທີ່ແກ່ຍາວມາເປັນເວລາ4ເດືອນກວ່າໄດ້ເຮັດໃຫ້600ກວ່າຄົນເສຍຊີວິດ,ເຂດອຸດສາຫະກຳຫຼາຍແຫ່ງຖືກນ້ຳຖ້ວມ,ໂຮງຈັກໂຮງງານຫຼາຍໆແຫ່ງຢຸດການຜະລິດ,ເສດຖະກິດໄດ້ຮັບຜົນກະທົບຢ່າງໜັກໜ່ວງ.ໄພນ້ຳຖ້ວມຢູ່ໄທໄດ້ສົ່ງຜົນກະທົບອັນໜັກໜ່ວງຕໍ່ອຸດສາຫະກຳຫຼາຍຂະແໜງຊຶ່ງເປັນຂອດສຳຄັນທີ່ສຸດໃນຕ່ອງໂສ້ອຸດສາຫະກຳໃນທົ່ວໂລກເຊັ່ນອຸດສາຫະກຳລົດຍົນ,ເຄື່ອງປະກອບຊີ້ນສ່ວນຄອມພິວເຕີ້,ຜະລິດຕະພັນກະສິກຳແລະອື່ນໆ.ເຈົ້າໜ້າທີ່ທະນາຄານພັດທະນາອາຊີຫຼືADBກ່າວໃນຫວ່າງມໍ່ໆມານີ້ວ່າ,ຜົນກະທົບຈາກໄພນ້ຳຖ້ວມອາດຈະແກ່ຍາວໄປຮອດປີໜ້າເປັນເວລາຍາວສົມຄວນ.ທ່ານກ່າວວ່າ,ຄວາມຮ້າຍແຮງຈາກໄພນ້ຳຖ້ວມຢູ່ໄທທີ່ສົ່ງຜົນກະທົບເຖິງຕາໜ່າງເຄືອຂ່າຍການຜະລິດຂອງອາຊີນັ້ນອາດຈະຮ້າຍແຮງກວ່າຜົນກະທົບຈາກແຜ່ນດິນໄຫວ,ຄື້ນຊືນະມິແລະໂຮງໄຟຟ້ານີວເຄຼຍຮົ່ວໄຫຼທີ່ເກີດຂຶ້ນໃນເດືອນມີນາປີນີ້.
ຂໍ້ມູນຕົວເລກສະແດງໃຫ້ເຫັນວ່າ,ມູນຄ່າການຜະລິດທາງດ້ານອຸດສາຫະກຳແລະຕົວເລກດັດຊະນີຄວາມເຊື່ອຖືຂອງຜູ່ບໍລິໂພກຂອງໄທໃນເດືອນຕຸລາປີນີ້ໄດ້ຫຼຸດລົງເຖິງລະດັບຕ່ຳສຸດໃນຮອບ10ປີຜ່ານມາ.ທະນາຄານກາງຂອງໄທຄາດຄະເນວ່າ,ເສດຖະກິດໄທໃນໄຕມາດທີ4ຂອງປີນີ້ຈະຫຼຸດລົງ3,7%.ສະນັ້ນ,ທະນາຄານກາງຂອງໄທຈິ່ງເຫັນວ່າມີຄວາມຈຳເປັນໃນການຫຼຸດອັດຕາດອກເບັ້ຍເພື່ອເປັນການຊ່ວຍຊູການເຕີບໂຕທາງດ້ານເສດຖະກິດ.
ປະຈຸບັນ,ນ້ຳຖ້ວມຢູ່ເຂດປະສົບໄພບາງແຫ່ງຂອງໄທໄດ້ບົກແຫ້ງລົງແລ້ວ,ລັດຖະບານໄທເລີ່ມປະຕິບັດການວາງແຜນສ້າງສາຄືນໃໝ່ຫຼັງໄພນ້ຳຖ້ວມ.ທ່ານນາງຍິ່ງລັກຊິນນະວັດ ນາຍົກລັດຖະມົນຕີໄທໄດ້ມີແຜນການຈະໃຊ້ງົບປະມານ130ຕື້ບາດເຂົ້າໃນການສ້າງສາຄືນໃໝ່ແລະການປ້ອງກັນໄພນ້ຳຖ້ວມ.ສຳນັກງານທະນາຄານໂລກປະຈຳໄທ ໄດ້ສຳຫຼວດ26ຈັງຫວັດທີ່ໄດ້ຮັບຜົນກະທົບຈາກໄພນ້ຳຖ້ວມ ແລ້ວຊີ້ອອກວ່າ,ໄທຕ້ອງໃຊ້ເວລາເຖິງ2ປີຈິ່ງຈະສາມາດສຳເລັດການສ້າງສາຄືນໃໝ່ໄດ້,ຄາດວ່າຈະໃຊ້ງົບປະມານເຖິງ755ຕື້ບາດ.
ນັກຄົ້ນຄວ້າເສດຖະກິດທີ່ກ່ຽວຂ້ອງກ່າວວ່າ,ໄທພວມປະເຊີນໜ້າກັບໜ້າທີ່ອັນໜັກໜ່ວງໃນການສ້າງສາຄືນໃໝ່ຫຼັງໄພນ້ຳຖ້ວມແລະຮຳບາດແຜ,ການຫຼຸດອັດຕາດອກເບັ້ຍຈະຊ່ວຍເສດຖະກິດຂອງໄທໃຫ້ຟື້ນຕົວພາຍຫຼັງໄພນ້ຳຖ້ວມ.
