ໃນຕອນແລງຂອງວັນທີ 1 ທັນວາ 2011 ນີ້ ຢູ່ທີ່ ກະຊວງສຶກສາທິການແລະກິລາແຫ່ງ ສ ປປ ລາວ. ທ່ານ ລິວເຜິງ,ຫົວໜ້າກົມໃຫຍ່ກິລາແຫ່ງຊາດຈີນ ປະທານຄະນະກຳມະການໂອແລມປິກ ຈີນພ້ອມດ້ວຍຄະນະໄດ້ຮັບກຽດເຂົ້າພົບປະ ທ່ານ ດຣ ພັນຄຳ ວິພາວັນ ລັດຖະມົນຕີວ່າການກະຊວງສຶກສາທິການແລະກິລາ, ປະທານຄະນະກຳມະການໂອແລມປິກແຫ່ງຊາດລາວໃນໂອກາດທີ່ມາຢ້ຽມຢາມແລະເຮັດວຽກຢູ່ລາວເປັນເວລາ 2 ວັນ. ຈຸດປະສົງຂອງການມາຢ້ຽມຢາມລາວໃນຄັ້ງນີ້ກໍແມ່ນເພື່ອປຶກສາຫາຫຼືເພື່ອຊຸກຍູ້ການແລກປ່ຽນແລະການຮ່ວມມືດ້ານກິລາ, ປຶກສາຫາລືກ່ຽວກັບສັນຍາຄວາມເຂົ້າໃຈວ່າດ້ວຍກິລາທີ່ໄດ້ເຊັນໃນງານກິລາໂອແລມປິກປັກກິ່ງ 2008.
ໃນການພົບປະຄັ້ງນີ້ຝ່າຍລາວໄດ້ກ່າວຕ້ອນຮັບອັນອົບອຸ່ນແລະກ່າວຊົມເຊີຍຕໍ່ຜົນສຳເລັດຂອງການຮ່ວມມືລະຫວ່າງທັງສອງຝ່າຍດັ່ງທ່ານ ດຣ ພັນຄຳກ່າວວ່າ: ຕະຫລອດໄລຍະຜ່ານມາ,ສອງປະເທດລາວ-ຈີນ ໄດ້ມີການຮ່ວມມືກັນແບບຄູ່ຮ່ວມມືຍຸດທະສາດ, ເວົ້າສະເພາະດ້ານກິລາແລ້ວ ລັດຖະບານຈີນໄດ້ໃຫ້ການຊ່ວຍເຫຼືອເປັນຈຳນວນຫຼວງຫຼາຍແກ່ລາວເປັນຕົ້ນແມ່ນ: ການກະກຽມການເປັນເຈົ້າພາບຈັດຊິເກມຄັ້ງທີ 25 ຂອງລາວ, ການສົ່ງຄູຝຶກນັກກິລາແລະຮັບເອົານັກກິລາລາວໄປຝຶກຢູ່ຈີນແລະການຊ່ວຍເຫຼືອດ້ານອຸປະກອນຕ່າງໆ. ພາຍໃຕ້ການຊ່ວຍເຫຼືອຈາກລັດຖະບານຈີນ,ເຫັນວ່າວຽກງານດ້ານກິລາລາວໄດ້ມີບາດກ້າວຂະຫຍາຍຕົວຫຼາຍສົມຄວນ. ນອກນັ້ນ,ທ່ານຍັງໄດ້ສະເໜີກ່ຽວກັບການສ້າງສະຖາບັນການກິລາແຫ່ງຊາດນຳອີກ.
ໃນໂອກາດດັ່ງກ່າວ ທ່ານ ລິວເຜິງ ກໍສະແດງຄວາມຂອບໃຈເປັນຢ່າງຍິ່ງຕໍ່ການຕ້ອນຮັບຂອງຝ່າຍລາວ, ທ່ານກ່າວວ່າ: ຂ້າພະເຈົ້າຮູ້ສຶກດີໃຈແລະເປັນກຽດຢ່າງຍິ່ງທີ່ໄດ້ມາຢ້ຽມຍາມລາວໃນຄັ້ງນີ້ເຊິ່ງພໍດີກັບ ວັນຊາດຂອງລາວ ຄົບຮອບ 36 ປີ, ຂ້າພະເຈົ້າຖືໂອກາດນີ້ ອວຍພອນວັນຊາດລາວ. ຕໍ່ວຽກງານການຮ່ວມມືໃນໄລຍະຜ່ານມາເຫັນວ່າ ຝ່າຍລາວໄດ້ໃຫ້ການສະໜັບສະໜູນມາໂດຍຕະຫຼອດ,ຂ້າພະເຈົ້າຂໍສະແດງຄວາມຂອບໃຈເປັນຢ່າງຍິ່ງ.
