ວັນທີ1ທັນວານີ້, ກອງປະຊຸມລັດຖະມົນຕີການຕ່າງປະເທດສະມາຊິກສະຫະພາບເອີລົບໄດ້ຕົກລົງວ່າຈະເປີດກວ້າງການລົງໂທດຕໍ່ອີຣານ, ໃນນັ້ນ,ມີວິສາຫະກິດ143ແຫ່ງແລະບຸກຄົນອີກ37ຄົນຖືກຈັດເຂົ້າໃນບັນຊີລາຍຊື່ທີ່ຈະຖືກລົງໂທດ
ມະຕິທີ່ປະກາດຫລັງກອງປະຊຸມຂຽນວ່າ, ວິສາຫະກິດແລະບຸກຄົນດັ່ງກ່າວເປັນຜູ້ທີ່ໄດ້ເຂົ້າຮ່ວມແຜນການນິວເຄຼຍອີຣານໂດຍກົງ, ແລະກໍມີມາຈາກກອງປ້ອງກັນປະຕິວັດອີຣານແລະລະບົບຂົນສົ່ງທາງອາກາດ.
ໃນກອງປະຊຸມເທື່ອນີ້, ລັດຖະມົນຕີການຕ່າງປະເທດຂອງ27ປະເທດສະມາຊິກສະຫະພາບເອີລົບບໍ່ມີຄວາມເຫັນເປັນເອກະສັນກັນກ່ຽວກັບການຫ້າມນໍາເຂົ້ານໍ້າມັນເຊື້ອໄຟຈາກອີຣານ. ມະຕິທີ່ປະກາດຫລັງກອງປະຊຸມຂຽນວ່າ, ບົນພື້ນຖານທີ່ຮ່ວມມືກັບປະຊາຄົມໂລກຢ່າງໃກ້ຊິດ, ສະຫະພາບເອີລົບອາດຈະນໍາໃຊ້ມາດຕະການລົງໂທດຕື່ມອີກຕໍ່ພາກສ່ວນການເງິນ, ຄົມມະນາຄົມ, ພະລັງງານແລະກອງປ້ອງກັນປະຕິວັດຂອງອີຣານ.
ລັດຖະມົນຕີການຕ່າງປະເທດທີ່ເຂົ້າຮ່ວມປະຊຸມໄດ້ອອກຖະແຫລງການວ່າ, ກ່າວປະນາມຕໍ່ເຫດການໂຈມຕີສະຖານທູດອັງກິດປະຈໍາອີຣານຢູ່ນະຄອນຫລວງເຕເຮຣານແລະການຕອບໂຕ້ອັງກິດຂອງອີຣານດ້ວຍການຂັບໄລ່ເອກອັກຄະລັດຖະທູດອັງກິດປະຈໍາອີຣານ.
ວັນທີ1ທັນວານີ້, ເຈົ້າໜ້າທີ່ການທູດອີຕາລີຢືນຢັນຕໍ່ນັກຂ່າວວ່າ, ກະຊວງການຕ່າງປະເທດອີຕາລີໄດ້ຕົກລົງຮຽກເອີ້ນທ່ານອັນເບີໂຕ ບຮາດານີນີ, ເອກອັກຄະລັດຖະທູດອີຕາລີປະຈໍາອີຣານກັບຄືນປະເທດ. ກ່ອນໜ້ານີ້, ເຢຍລະມັນ, ຝະຣັ່ງ,ໂຮນລັງກໍໄດ້ຮຽກເອີ້ນເອກອັກຄະລັດຖະທູດຂອງຕົນປະຈໍາອີຣານກັບຄືນປະເທດແລ້ວ.
