ໜັງສືພິມເຢີນມິນຢື້ປ້າວ: ວັນທີ 1 ທັນວານີ້, ຢູ່ນະຄອນຫຼວງເນປີດໍ, ທ່ານອູເທັນເຊັນ ປະທານາທິບໍດີມຽນມາໄດ້ຕ້ອນຮັບນາງຮີລາຣີ ຄຼິນທັນ ລັດຖະມົນຕີວ່າການກະຊວງການຕ່າງປະເທດອາເມລິກາທີ່ມາຢາມ. ນາງຮີລາຣີແມ່ນເຈົ້າໜ້າທີ່ລະດັບສູງທີ່ສຸດຂອງອາເມລິກາທີ່ໄປຢ້ຽມຢາມມຽນມາໃນຮອບ 50 ປີມານີ້. ໃນເວລານາງເຂົ້າຢ້ຽມທ່ານອູເທັນເຊັນ, ນາງຮີລາຣີກ່າວວ່າ, ຮູ້ສຶກດີໃຈຕໍ່ການປະຕິຮູບຂອງມຽນມາໃນຫວ່າງມໍ່ໆມານີ້ ແລະ ຫວັງໃຫ້ມຽນມາສືບຕໍ່ດຳເນີນການປະຕິຮູບ. ທ່ານອູເທັນເຊັນກ່າວວ່າ, ການຢ້ຽມຢາມຂອງນາງຮີລາຣີເທື່ອນີ້ມີຄວາມໝາຍສຳຄັນ, ໄດ້"ເປີດໂສມໜ້າໃໝ່ຂອງການພົວພັນລະຫວ່າງສອງປະເທດ". ແຕ່ວ່າ, ນາງຮີລາຣີບໍ່ໄດ້ປະກາດມາດຕະການສຳຄັນໃດໆໃນການປັບປຸງການພົວພັນກັບມຽນມາໃຫ້ດີຂຶ້ນ, ແຕ່ສອງຝ່າຍກໍ່ບໍ່ໄດ້ມີຄວາມຫວັງໃດໆຕໍ່ທ່າອ່ຽງຂອງການພົວພັນລະຫວ່າງສອງປະເທດ.
ນາງຮີລາຣີ ຄຼິນທັນໄດ້ເດີນທາງໄປຮອດນະຄອນຫຼວງເນປີດໍໃນວັນທີ 30 ພະຈິກແລ້ວນີ້, ແລະຢ້ຽມຢາມມຽນມາເປັນເວລາ 3 ວັນ. ກ່ອນອອກເດີນທາງ,ນາງຮີລາຣີແຈ້ງໃຫ້ຮູ້ວ່າ, ສາເຫດໜຶ່ງທີ່ໄປຢ້ຽມຢາມມຽນມາແມ່ນເບິ່ງຈຸດປະສົງແທ້ຈິງຂອງມຽນມາທີ່ດຳເນີນການປະຕິຮູບ ເຈົ້າໜ້າທີ່ລັດຖະບານອາເມລິກາກ່າວວ່າ,ນັບແຕ່ລັດຖະບານໂອບາມາຂຶ້ນກຳອຳນາດກໍ່ໄດ້ເລິ່ມປະເມີນນະໂຍບາຍຕໍ່ມຽນມາ ແລະ ໄດ້ຫາລືບັນຫາມຽນມາກັບຈີນ ແລະ ບາງປະເທດໃນເອີລົບ, ປະເທດເຫຼົ່ານີ້ເຫັນວ່າການລົງໂທດທາງເສດຖະກິດຕໍ່ມຽນມາຢ່າງເຂັ້ມງວດນັ້ນບໍ່ໄດ້ຮັບຜົນຕາມທີ່ຄາດຫວັງໄວ້. ສະນັ້ນ, ລັດຖະບານໂອບາມາຈິ່ງໄດ້ປ່ຽນແປງຍຸດທະສາດ"ຫັນມາຕິດຕໍ່ພົວພັນກັບສອງຝ່າຍ"ໃນມຽນມາ, ຄື, ໃນຂະນະທີ່ສົນທະນາກັບລັດຖະບານມຽນມາ ກໍ່ຫັນມາຕິດຕໍ່ພົວພັນກັບນາງອັອງຊານຊູຈີ ຜູ່ນຳພັກສັນນິບາດແຫ່ງຊາດເພື່ອປະຊາທິປະໄຕມຽນມາໄປພ້ອມໆກັນ.
ໃນ 1 ປີຜ່ານມາ, ມຽນມາໄດ້ດຳເນີນການປະຕິຮູບດ້ານຕ່າງໆ. ພາຍໃຕ້ເບື້ອງຫຼັງນີ້, ຫຼາຍຄົນເຫັນວ່າ,ການຢ້ຽມຢາມຂອງນາງຮີລາຣີເທື່ອນີ້ຕົ້ນຕໍແມ່ນເພື່ອສະແດງທ່າທີຕອບໂຕ້ຕໍ່ການປະຕິຮູບຂອງມຽນມາ. ເຖິງວ່າອາເມລິກາມີຄວາມຄອງຄອຍຫຼາຍທີ່ສຸດກໍຕາມ,ແຕ່ຮອດປັດຈຸບັນຍັງບໍ່ໄດ້ມອບສິ່ງໃດທີ່ເປັນຜົນດີຄືນໃຫ້ມຽນມາ. ຫຼັງຈາກນາງຮີລາຣີພົບປະກັບທ່ານອູເທັນເຊັນ ນາງໄດ້ກ່າວຕໍ່ສື່ມວນຊົນຢ່າງແຈ່ມແຈ້ງວ່າ, ເຖິງວ່າຜູ່ນຳມຽນມາໄດ້ໃຫ້ຄຳໝັ້ນສັນຍາວ່າຈະສືບຕໍ່ດຳເນີນການປະຕິຮູບກໍ່ຕາມ, ແຕ່ປັດຈຸບັນຍັງບໍ່ແມ່ນເວລາທີ່ຈະຍົກເລີກການລົງໂທດຕໍ່ມຽນມາ. ນາງຮີລາຣີ ຄຼິນທັນກ່າວວ່າ, ຕ້ອງໄດ້ເຫັນມຽນມາດຳເນີນການປະຕິຮູບຢ່າງແທ້ຈິງຫຼາຍກວ່າເກົ່າແລ້ວຈິ່ງຈະພິຈາລະນາຍົກສູງການພົວພັນທາງການທູດກັບມຽນມາ, ດ້ວຍການສົ່ງເອກອັກຄະລັດຖະທູດເຊິ່ງກັນແລະກັນ.
ທ່ານເອີເນັສໂບເວີ ຫົວໜ້າໂຄງການອາຊີອາຄະເນຂອງສູນຄົ້ນຄວ້າຍຸດທະສາດ ແລະ ບັນຫາສາກົນຂອງອາເມລິກາເຫັນວ່າ, ການຕິດຕໍ່ພົວພັນກັບມຽນມາແມ່ນສອດຄ່ອງກັບຍຸດທະສາດຂອງອາຊີອາຄະເນຂອງລັດຖະບານໂອບາມາ, ອາເມລິກາຢາກເພິ່ມທະວີຖານະບົດບາດຂອງອາຊຽນທີ່ເປັນພື້ນຖານຂອບຄວາມປອດໄພ ແລະ ການຄ້າຂອງພາກພື້ນ, ຖ້າຢາກເພິ່ມທະວີການພົວພັນກັບອາຊຽນກໍ່ຕ້ອງປະຕິບັດການຕິດຕໍ່ພົວພັນກັບປະເທດສະມາຊິກຕ່າງໆເສຍກ່ອນ.
