ຕາມຂ່າວCRI: ວັນທີ 2 ທັນວານີ້, ທ່ານວາງເກີ່ງນຽນ ຜູ່ອຳນວຍການໃຫຍ່ວິທະຍຸສາກົນແຫ່ງປະເທດຈີນ ຫຼື CRI ໄດ້ພົບປະທ່ານສີພາ ນົງລາດ ຜູ່ອຳນວຍການໃຫຍ່ກະຈາຍສຽງວິທະຍຸແຫ່ງຊາດລາວທີ່ມາປັກກິ່ງເຂົ້າຮ່ວມ"ເວທີປຶກສາຫາລືຮ່ວມມືສື່ມວນຊົນວິທະຍຸຕົວເມືອງສາກົນ",ສອງຝ່າຍໄດ້ປຶກສາຫາລືກັນກ່ຽວກັບການເພິ່ມທະວີການຮ່ວມມືຕື່ມອີກ.
ກ່ອນອື່ນໝົດ, ທ່ານວາງເກີ່ງນຽນຍິນດີຕ້ອນຮັບໝູ່ເພື່ອນລາວທີ່ມາຢາມຢ່າງສຸດອົກສຸດໃຈ, ທ່ານກ່າວວ່າ, ໄມຕີຈິດມິດຕະພາບລະຫວ່າງວິທະຍຸສາກົນແຫ່ງປະເທດຈີນກັບວິທະຍຸກະຈາຍສຽງແຫ່ງຊາດລາວມີປະຫວັດຍາວນານມາແຕ່ບູຮານນະການ, ການແລກປ່ຽນ ແລະ ການຮ່ວມມືລະຫວ່າງວິທະຍຸສອງແຫ່ງໃນຫຼາຍປີມໍ່ໆມານີ້ຂະຫຍາຍຕົວຢ່າງບໍ່ຢຸດຢັ້ງ, ໄດ້ຮັບຜົນສຳເລັດສູງຕື່ມອີກ. ປີ 2006, ລາຍການFMຂອງCRIທີ່ນະຄອນຫຼວງວຽງຈັນເລິ່ມອອກອາກາດ, ປີ2011, ສຳນັກງານຜູ່ຕາງໜ້າCRIທີ່ວຽງຈັນສ້າງຕັ້ງຂຶ້ນຢ່າງເປັນທາງການ, ພາຍໃຕ້ການສະໜັບສະໜູນອັນແຂງແຮງຂອງວິທະຍຸກະຈາຍສຽງແຫ່ງຊາດລາວ, ລາຍການແບບທ້ອງຖິ່ນຂອງCRIນັບມື້ນັບໄດ້ຮັບຄວາມຕີລາຄາສູງ ແລະ ຄວາມນິຍົມຊົມຊອບຂອງປະຊາຊົນລາວ. ທ່ານວາງເກີ່ງນຽນກ່າວວ່າ, ຫວັງໃຫ້ສອງຝ່າຍສາມາດຜ່ານການຕິດຕໍ່ພົວພັນກັນເພື່ອດຳເນີນການຮ່ວມມືດ້ວຍຊ່ອງທາງຫຼາຍກວ່າເກົ່າຕື່ມອີກ.
ທ່ານສີພາ ນົງລາດສະແດງຄວາມຊົມເຊີຍຕໍ່ວິທະຍຸສາກົນແຫ່ງປະເທດຈີນສ້າງຕັ້ງຂຶນຄົບຮອບ 70 ປີ, ພ້ອມທັງຍ້ອງຍໍລາຍການFMຂອງCRIທີ່ນະຄອນຫຼວງວຽງຈັນມີຄຸນນະພາບດີ, ໄດ້ຮັບນິຍົມຊົມຊອບຂອງປະຊາຊົນລາວ. ພ້ອມກັນນັ້ນ, ທ່ານກ່າວວ່າ, ການຮ່ວມມືລະຫວ່າງວິທະຍຸສາກົນແຫ່ງປະເທດຈີນ ກັບ ວິທະຍຸກະຈາຍສຽງແຫ່ງຊາດລາວແມ່ນສາຍພັນທີ່ດີງາມ, ຫວັງໃຫ້ສອງຝ່າຍສາມາດເພິ່ມທະວີການຮ່ວມມືຕື່ມອີກ ແລະ ບັນລຸໃຫ້ຕ່າງຝ່າຍຕ່າງມີຜົນປະໂຫຍດໃນອະນາຄົດ.
"ເວທີປຶກສາຫາລືຮ່ວມມືສື່ມວນຊົນວິທະຍຸຕົວເມືອງສາກົນ"ແມ່ນຈັດຂຶ້ນດ້ວຍວິທະຍຸສາກົນແຫ່ງປະເທດຈີນ, ພາຍໃຕ້ຫົວຂໍ້ວ່າ"ການຮ່ວມມືແລະການພັດທະນາຂອງສື່ມວນຊົນວິທະຍຸຕົວເມືອງສາກົນໃນສະໄໝໂລກາວິວັດ", ໄດ້ດຶງດູດຜູ່ຕາງໜ້າ 100 ກວ່າທ່ານທີ່ມາຈາກສື່ມວນຊົນວິທະຍຸຕົວເມືອງ 40 ກວ່າແຫ່ງຂອງຈີນແລະຕ່າງປະເທດມາເຂົ້າຮ່ວມ.
