ທ່ານຫູຈີນທາວ, ປະທານປະເທດຈີນ ຊົມເຊີຍການສ້າງຕັ້ງຂອງປະຊາຄົມປະເທດອາເມລິກາລາຕິນແລະກາລາອິບ
(GMT+08:00) 2011-12-04 14:38:58 cri
ວັນທີ 2 ທັນວານີ້, ທ່ານຫູຈີນທາວ, ປະທານປະເທດຈີນສົ່ງໂທລະເລກໄປຍັງທ່ານຮູໂກ ຈາວິສ, ປະທານາທິບໍດີເວເນຊູເອລາ ແລະທ່ານເຊບັສຕຽນ ພີເຣຣາ, ປະທານາທິບໍດີຈີເລ, ຊົມເຊີຍການສ້າງຕັ້ງຂອງປະຊາຄົມປະເທດອາເມລິກາລາຕິນແລະກາລາອິບ.
ໃນໂທລະເລກ, ທ່ານຫູຈີນທາວກ່າວວ່າ, ການສ້າງຕັ້ງຂອງປະຊາຄົມປະເທດອາເມລິກາລາຕິນແລະກາລາອິບແມ່ນຫຼັກໝາຍທາງອັນສຳຄັນໃນຂະບວນການເຊື່ອມໂຍງເຂົ້າກັນຂອງພາກພື້ນ. ຈີນຕີລາຄາສູງຕໍ່ພາກພື້ນອາເມລິກາລາຕິນແລະຄຣີບຽນທີ່ໄດ້ເສີມຂະຫຍາຍບົດບາດອັນຕັ້ງໜ້າໃນວຽກງານສາກົນແລະພາກພື້ນ, ເຊື່ອວ່າ, ການສ້າງຕັ້ງຂອງປະຊາຄົມປະເທດອາເມລິກາລາຕິນແລະກາລາອິບຈະປະກອບສ່ວນອັນສຳຄັນເຂົ້າໃນການເພີ່ມທະວີຄວາມສາມັກຄີແລະການປະສານງານຂອງພາກພື້ນ ແລະຮ່ວມກັນຮັບມືກັບສິ່ງທ້າທາຍໃນທົ່ວໂລກ.
