ຈີນສະເຫນີເງື່ອນໄຂ 5 ຂໍ້ໃນການເຂົ້າຮ່ວມສັນຍາຂອບການປ່ຽນແປງຂອງດິນຟ້າອາກາດທີ່ມີການຜູກມັດດ້ານກົດຫມາຍຫຼັງປີ2020
(GMT+08:00) 2011-12-05 11:16:37 cri
ຕາມຂ່າວCRI : ໃນໄລຍະກອງປະຊຸມເດີບານກ່ຽວກັບການປ່ຽນແປງຂອງດິນຟ້າອາກາດສະຫະປະຊາຊາດ, ຜູ່ຕາງຫນ້າຂອງບາງປະເທດສະເຫນີໃຫ້ຈີນຄວນເຂົ້າຮ່ວມສັນຍາຂອບທີ່ມີການຜູກມັດດ້ານກົດຫມາຍ,ວັນທີ4ທັນວານີ້,ຢູ່ທີ່ນະຄອນເດີບານຂອງອາຟຼິກາໃຕ້,ທ່ານເຊ້ຍເຈີ້ນຮວາ, ຫົວຫນ້າຄະນະຜູ່ແທນຈີນກ່າວວ່າ,ຈີນຈະເຂົ້າຮ່ວມສັນຍາຂອບທີ່ມີການຜູກມັດດ້ານກົດຫມາຍຫຼັງຈາກປີ2020,ຕ້ອງໃຫ້ຜ່ານການເຈລະຈາເສຍກ່ອນ ຈຶ່ງ ກ້າວເຖິງຂັ້ນເຊັນສັນຍາກັນ,ແລະຕ້ອງຕອບສະຫນອງເງື່ອນໄຂ 5ຂໍ້. ໃນເວລາທ່ານເຊ້ຍເຈິ້ນຮວາປຶກສາຫາລືກັນກັບອົງການທີ່ບໍ່ຂຶ້ນກັບລັດຖະບານຫຼືNGO,ທ່ານສະເຫນີເງື່ອນໄຂ 5 ຢ່າງ,ນັ້ນກໍ່ຄື: ຫນຶ່ງແມ່ນຄວນມີອະນຸສັນຍາກຽວໂຕແລະໄລຍະທີສອງຕາມຄຳຫມັ້ນສັນຍາ; ສອງແມ່ນປະເທດທີ່ພັດທະນາແລ້ວຄວນປະຕິບັດຕໍ່ຄຳຫມັ້ນສັນຍາທີ່ຈະເລີ່ມໃຊ້ເງິນທຶນ 30ຕື້ໂດລາສະຫະລັດໂດຍໄວແລະໃຊ້ເງິນທຶນໄລຍະຍາວທີ່ມີມູນຄ່າເຖິງ 100 ຕື້ໂດລາສະຫະລັດທຸກປີກ່ອນປີ2020,ເລີ່ມໃຊ້ກອງທຶນທາງດ້ານດິນຟ້າອາກາດສີຂຽວ,ສ້າງຕັ້ງກົນໄກຕິດຕາມກວດກາແລະປະຕິບັດ; ສາມແມ່ນຈັດຕັ້ງປະຕິບັດຄວາມເຫັນທີ່ເປັນເອກະສັນກັນຕ່າງໆເຊັ່ນ:ການຖ່າຍທອດເຕັກນິກ, ປ່າໄມ້,ຄວາມໂປ່ງໃສ,ການສ້າງສາຄວາມສາມາດແລະອື່ນໆ,ສ້າງຕັ້ງກົນໄກທີ່ສົມຄູ່ກັນ; ສີ່ແມ່ນເລັ່ງລັດການປະເມີນສະພາບທີ່ປະເທດຕ່າງໆບັນລຸໃຫ້ຄຳຫມັ້ນສັນຍາແລະຈັດຕັ້ງປະຕິບັດການເຄື່ອນໄຫວໃຫ້ໄວຂຶ້ນ, ເພື່ອຮັບປະກັນໃຫ້ສຳເລັດການປະເມີນຕາມຫຼັກວິທະຍາສາດ; ແລະສຸດທ້າຍແມ່ນຂໍພຽງແຕ່ຍຶດຫມັ້ນ ຫຼັກການ"ໜ້າທີ່ຮ່ວມກັນແຕ່ມີຄວາມແຕກຕ່າງກັນ",ຄວາມຍຸດຕິທຳແລະຄວາມສາມາດຂອງປະເທດຕົນເອງແລ້ວ,ຮັບປະກັນສະພາບລວມຂອງສິ່ງແວດລ້ອມ,ຈີນຈະມີຄວາມຮັບຜິດຊອບແລະພັນທະທີ່ສອດຄ່ອງກັບໄລຍະແລະລະດັບການພັດທະນາຂອງປະເທດຕົນເອງ.
ທ່ານເຊ້ຍເຈິ້ນຮວາກ່າວວ່າ,ຫຼັກຫມັ້ນຂອງຈີນໃນການເຈລະຈາກ່ຽວກັບການປ່ຽນແປງຂອງດິນຟ້າອາກາດແມ່ນເປີດກວ້າງ,ເງື່ອນໄຂ 5 ຢ່າງບໍ່ແມ່ນເງື່ອນໄຂໃຫມ່,ແຕ່ແມ່ນຂໍ້ສະເຫນີທີ່ສົມເຫດສົມຜົນ.ຈີນຫວັງໃຫ້ຝ່າຍຕ່າງໆບັນລຸໃຫ້ຄຳຫມັ້ນສັນຍາ,ປະຕິບັດຕາມຄຳຫມັ້ນສັນຍາ,ປະເມີນຢ່າງມີປະສິດທິຜົນ,ແລະຈະສືບຕໍ່ຮ່ວມກັບປະເທດຕ່າງໆທຳຄວາມພະຍາຍາມເພື່ອເລື່ອງນີ້.
