ພາຍຫຼັງທ່ານນີໂຄລັສ ຊາໂກຊີ ປະທານາທິບໍດີຝະຣັ່ງແລະທ່ານນາງແອງເຈີລາ ເມີເຄວ ນາຍົກລັດຖະມົນຕີເຢຍລະມັນໄດ້ພົບປະປຶກສາຫາລືກັນໃນວັນທີ5ທັນວານີ້ຢູ່ນະຄອນຫຼວງປາຣີຂອງຝະຣັ່ງແລ້ວ,ທັງສອງທ່ານປະກາດວ່າ,ຝະຣັ່ງແລະເຢຍລະມັນຈະຍື່ນຂໍ້ສະເໜີຮ່ວມກ່ຽວກັບການດັດແກ້ສົນທິສັນຍາສະຫະພາບເອີລົບຫຼືEUເພື່ອເພີ່ມຄວາມເຂັ້ມງວດລະບຽບວິໄນດ້ານການເງິນ,ຮັບມືກັບວິກິດການໜີ້ສິນພາກລັດທີ່ແຜ່ລາມຢ່າງຮ້າຍແຮງຢູ່ເຂດໃຊ້ເງິນເອີໂຣ.ເຖິງວ່າເນື້ອໃນການດັດແກ້ຍັງບໍ່ຮູ້ແຈ້ງເທື່ອກໍ່ຕາມ,ແຕ່ພາຍໃນສະຫະພາບເອີລົບໄດ້ມີຄວາມເຫັນທີ່ຂັດແຍ່ງກັນຕໍ່ການກະທຳຫຼ້າສຸດຂອງຝະຣັ່ງແລະເຢຍລະມັນ.
ແຟງລັງແລະດານມາກເຫັນດີນຳຂໍ້ສະເໜີຂອງທ່ານຊາໂກຊີແລະທ່ານເມີເຄວ.ໂອຕຼີສເຖິງວ່າເຫັນດີນຳການດັດແກ້ສົນທິສັນຍາກໍ່ຕາມ,ແຕ່ຍັງເຫັນວ່າພາຍໃນໄລຍະເວລາສັ້ນໆ,ການດັດແກ້ສົນທິສັນຍາສະຫະພາບເອີລົບຈະບໍ່ມີຜົນດີປານໃດຕໍ່ການແກ້ໄຂວິກິດການໜີ້ສິນຂອງສະຫະພາບເອີລົບ.
ຢູ່ເຂດໃຊ້ເງິນເອີໂຣກໍ່ມີບາງປະເທດບໍ່ເຫັນດີນຳການດັດແກ້ສົນທິສັນຍາສະຫະພາບເອີລົບ.ນາຍົກລັດຖະມົນຕີຊູແອັດກໍ່ກ່າວວ່າຫວັງຢາກແກ້ໄຂວິກິດການໜີ້ສິນສະຫະພາບເອີລົບພາຍໃຕ້ກໍລະນີທີ່ບໍ່ດັດແກ້ສົນທິສັນຍາສະຫະພາບເອີລົບ.
ອີຕາລີ,ໂປໂລຍແລະປະເທດອື່ນໆອີກຈຳນວນໜຶ່ງເປັນຫ່ວງວ່າ,ຂໍ້ສະເໜີທີ່ໃຫ້ດັດແກ້ສົນທິສັນຍາສະຫະພາບເອີລົບຍິ່ງຈະເຮັດໃຫ້ຄວາມຂັດແຍ່ງພາຍໃນສະຫະພາບເອີລົບຮຸນແຮງຂຶ້ນຕື່ມອີກ.
