ຜູ້ນຳຂອງຝລັ່ງແລະເຢຍລະມັນຈະຍື່ນຂໍ້ສະເໜີຮ່ວມທີ່ດັດແກ້ສົນທິສັນຍາສະຫະພາບເອີລົບ
(GMT+08:00) 2011-12-06 11:19:39 cri
ວັນທີ5ທັນວານີ້, ທ່ານນີໂຄລັສ ຊາໂຄຊີ, ປະທານາທິບໍດີຝລັ່ງແລະທ່ານນາງແອງເຈີລາ ເມີເຄວ, ນາຍົກລັດຖະມົນຕີເຢຍລະມັນກ່າວຢູ່ປາຣີວ່າ,ຝລັ່ງແລະເຢຍລະມັນຈະຍື່ນຂໍ້ສະເໜີຮ່ວມທີ່ດັດແກ້ສົນທິສັນຍາສະຫະພາບເອີລົບໄປຍັງທ່ານແຮັກ ມານ ວັນ ຣົມປຸຍ, ປະທານສະຫະພາບເອີລົບກ່ອນໄຂກອງປະຊຸມສຸດຍອດສະຫະພາບເອີລົບທີ່ຈະຈັດຂຶ້ນໃນອາທິດນີ້,ເພື່ອຮັບມືກັບວິກິດການໜີ້ສິນສາທາລະນະຂອງເອີລົບໂດຍຜ່ານຊ່ອງທາງທີ່ເພີ່ມທະວີກົດລະບຽບດ້ານການເງິນຂອງສະຫະພາບເອີລົບ.
ມື້ດຽວກັນ, ໃນກອງປະຊຸມຂ່າວທີ່ຈັດຂຶ້ນຫຼັງການເຈະລຈາ, ທ່ານນີໂຄລັສ ຊາໂຄຊີແລະທ່ານນາງແອງເຈີລາ ເມີເຄວກ່າວວ່າ,ຈະສົ່ງຈົດໝາຍໄປຍັງທ່ານແຮັກມານ ວັນ ຣົມປຸຍໃນວັນທີ7ທັນວານີ້,ເພື່ອແຈ້ງຂໍ້ສະເໜີທີ່ລະອຽດກ່ຽວກັບການດັດແກ້ສົນທິສັນຍາສະຫະພາບເອີລົບ. ຝລັ່ງແລະເຢຍລະມັນຫວັງໃຫ້27ປະເທດສະມາຊິກສະຫະພາບເອີລົບມີຄວາມເຫັນເປັນເອກະສັນກັນໂດຍໄວເທົ່າທີ່ໄວໄດ້ກ່ຽວກັບການດັດແກ້ສົນທິສັນຍາສະບັບດັ່ງກ່າວ,ຢ່າງໜ້ອຍຄວນມີ17ປະເທດສະມາຊິກຂອງເຂດໃຊ້ເງິນເອີໂຣເຊັນສັນຍາຮ່ວມກັນກ່ອນເດືອນມີນາປີ2012ກ່ຽວກັບເລື່ອງນີ້,ແລະແຈ້ງໃຫ້ປະເທດສະມາຊິກອື່ນຂອງສະຫະພາບເອີລົບ,ດຶງດູດເອົາຫຼາຍປະເທດໃນສະຫະພາບເອີລົບທີ່ມີຄວາມປາຖະໜາເຂົ້າເປັນສະມາຊິກໃນເຂດໃຊ້ເງິນເອີໂຣ.
ມື້ດຽວກັນ,ຜູ້ນຳຂອງສອງປະເທດຝລັ່ງແລະເຢຍລະມັນຍັງໄດ້ຖະແຫຼງຂ່າວຮ່ວມວ່າ,ຝລັ່ງແລະເຢຍລະມັນໄດ້ເຫັນຂ່າວທີ່ອົງການປະເມີນຜົນສາກົນໄດ້ປະເມີນຄວາມໜ້າເຊື່ອຖືຕໍ່ໜີ້ສິນສາທາລະນະຂອງຫຼາຍປະເທດໃນເຂດໃຊ້ເງິນເອີໂຣຕາມມາດຕະຖານຂອງStandard Poorsເຂົ້າໃນບັນຊີລາຍຊື່ການປະເມີນຜົນໄປ "ທາງລົບໃນການເບິ່ງອະນາຄົດ". ແຈ້ງການກ່າວວ່າ,ຝລັ່ງແລະເຢຍລະມັນຈະຮ່ວມກັບປະເທດສະມາຊິກອື່ນໆໃນເຂດໃຊ້ເງິນເອີໂຣແລະອົງການຂອງສະຫະພາບເອີລົບ,ໃຊ້ມາດຕະການທີ່ຈຳເປັນຕ່າງໆ,ເພື່ອຮັບປະກັນຄວາມໝັ້ນຄົງຂອງເຂດໃຊ້ເງິນເອີໂຣ.
