ອະນາຄົດໃນການໃຊ້ເງິນຕາສະກຸນດຽວຂອງອາຊຽນມີຄືແນວໃດ?
(GMT+08:00) 2011-12-06 15:04:28 cri
ການບັນລຸເປົ້າໝາຍການໃຊ້ເງິນຕາສະກຸນດຽວພາຍໃນພາກພື້ນອາຊຽນ,ແມ່ນຄວາມໃຝ່ຝັນທີ່ບຸກຄົນໃນວົງການການເງິນແລະວົງການເສດຖະກິດການຄ້າຂອງອາຊຽນມີຄວາມສະແຫວງຫາມາໂດຍຕະຫຼອດ. ໃນຫຼາຍປີຜ່ານມາ,ອົງການຄົ້ນຄວ້າແລະພາກສ່ວນລັດຖະບານຂອງບັນດາປະເທດອາຊຽນບໍ່ເຄີຍໄດ້ປະຖິ້ມຫົວຂໍ້ປຶກສາຫາລືກ່ຽວກັບບັນຫານີ້ຈັກເທື່ອ. ໂດຍສະເພາະແມ່ນໃນຊຸມປີຜ່ານມານີ້ ເສດຖະກິດຟື້ນຕົວຂຶ້ນມີທ່າອ່ຽງທີ່ເຂັ້ມແຂງ,ຍິ່ງເຮັດໃຫ້ສຽງຮຽກຮ້ອງໃຫ້ມີການສ້າງລະບົບເງິນຕາສະກຸນດຽວຂອງອາຊຽນໂດຍໄວນັບມື້ນັບເພີ່ມຂຶ້ນຕື່ມອີກ. ໃນການສຳມະນາກ່ຽວກັບເສດຖະກິດອາຊຽນທີ່ຈັດຂຶ້ນຢູ່ນະຄອນຫຼວງຈາກກາຕາຂອງອິນໂດເນເຊຍໃນຫວ່າງມໍ່ໆນີ້,ບັນຫາກ່ຽວກັບການໃຊ້ເງິນຕາສະກຸນດຽວຂອງອາຊຽນໄດ້ຮັບຄວາມສົນໃຈຢ່າງກວ້າງຂວາງອີກເທື່ອໜຶ່ງ.
ປະຈຸບັນນີ້,ຄວາມເຫັນກ່ຽວກັບບັນຫາການໃຊ້ເງິນຕາສະກຸນດຽວ,ອາຊຽນໄດ້ແບ່ງເປັນ2ພາກສ່ວນຄື: ພາກສ່ວນທີ່ສະໜັບສະໜູນແລະພາກສ່ວນທີ່ປະຕິເສດ. ຜູ້ສະໜັບສະໜູນເຫັນວ່າ,ຄຽງຄູ່ກັບເສດຖະກິດພາກພື້ນເຊື່ອມໂຍງເຂົ້າເປັນອັນໜຶ່ງອັນດຽວກັນໄດ້ພັດທະນາເຂົ້າສູ່ລວງເລິກ,ການຕິດຕໍ່ພົວພັນດ້ານເສດຖະກິດການຄ້າພາຍໃນອາຊຽນນັບມື້ນັບແໜ້ນແຟ້ນຂຶ້ນຕື່ມ, ຂົງເຂດການຮ່ວມມືນັບມື້ນັບກວ້າງຂວາງກວ່າເກົ່າ,ການໄປມາຫາສູ່ກັນລະຫວ່າງປະຊາຊົນບັນດາປະເທດຍິ່ງຫຼາຍຂຶ້ນກວ່າເກົ່າ. ການບັນລຸການໃຊ້ເງິນຕາສະກຸນດຽວພາຍໃນອາຊຽນ,ມີຜົນດີຕໍ່ການເຄື່ອນໄຫວດ້ານເສດຖະກິດການຄ້າສອງຝ່າຍ,ຫຼາຍຝ່າຍ,ການໄປມາຫາສູ່ກັນລະຫວ່າງຜູ້ຄົນ,ແລະທັງເປັນການຫຼຸດຕົ້ນທຶນໃນການເຮັດວຽກຂອງອົງການແລະພາກສ່ວນຂອງລັດຖະບານເຊັ່ນ: ທະນາຄານ,ດ່ານພາສີເປັນຕົ້ນ,ຊຸກຍູ້ການຮ່ວມມືດ້ານເສດຖະກິດການຄ້າແລະການພັດທະນາຂະແໜງການທ່ອງທ່ຽວ. ພ້ອມກັນນັ້ນ,ເງິນຕາສະກຸນດຽວກໍ່ສາມາດຍົກສູງຄວາມສາມາດໃນການຕ້ານຄວາມສ່ຽງໂດຍລວມຂອງບັນດາປະເທດອາຊຽນ. ໂດຍສະເພາະແມ່ນຫຼັງຈາກປະຊາຄົມອາຊຽນສ້າງຕັ້ງຂຶ້ນໃນປີ2015ແລ້ວ,ໃນດ້ານການຕິດຕໍ່ພົວພັນດ້ານເສດຖະກິດການຄ້າຕໍ່ພາຍນອກ,ເງິນຕາສະກຸນດຽວອາດຈະຍົກສູງຖານະເສດຖະກິດໂດຍລວມຂອງອາຊຽນຂຶ້ນຮອດລະດັບສູງຄັ້ງໃໝ່.
ແຕ່ຜູ້ປະຕິເສດພັດເຫັນວ່າ,ການສ້າງລະບົບເງິນຕາສະກຸນດຽວແມ່ນໂຄງການລະບົບທີ່ໃຫຍ່ຫຼວງແຫ່ງໜຶ່ງ,ຢ່າງໜ້ອຍຕ້ອງມີການຄ້ຳຊູຂອງ2ປັດໄຈພື້ນຖານ: ໜຶ່ງ ມີທ່າແຮງຕົວຈິງທາງເສດຖະກິດລວມທີ່ເຂັ້ມແຂງ; ສອງບັນດາປະເທດທີ່ເຂົ້າຮ່ວມລະບົບເງິນຕາສະກຸນດຽວລ້ວນແຕ່ຄວນກ້າວຂຶ້ນຮອດມາດຕະຖານຫຼືລະດັບຢ່າງເປັນເອກະສັນກັນໃນຂົງເຂດເສດຖະກິດທັງໝົດແລະຂົງເຂດອື່ນທີ່ກ່ຽວຂ້ອງ. ແຕ່ໃນປະຈຸບັນ, ຢູ່ໃນອາຊຽນຍັງມີຄວາມຫຼຸດໂຕນກັນຢ່າງຫຼວງຫຼາຍໃນ2ດ້ານດັ່ງກ່າວນີ້. ນອກນີ້,ວິກິດການໜີ້ສິນພາກລັດທີ່ຮ້າຍແຮງຂຶ້ນຢ່າງສືບເນື່ອງຂອງເຂດໃຊ້ເງິນເອີໂຣກໍ່ໄດ້ກາຍເປັນບົດຮຽນທາງລົບ.
ສະນັ້ນ,ຜູ້ຊ່ຽວຊານເຫັນວ່າ,ບໍ່ວ່າເບິ່ງຈາກຄວາມຕ້ອງການທາງພາວະວິໄສຫຼືວ່າເງື່ອນໄຂທາງອັດຕະວິໄສ,ປະຈຸບັນ, ການປຶກສາຫາລືກ່ຽວກັບການສ້າງລະບົບເງິນຕາສະກຸນດຽວຂອງອາຊຽນຍັງບໍ່ເຖິງເວລາເທື່ອ. ໂດຍປະເຊີນໜ້າສະພາບການເສດຖະກິດທີ່ມີການປ່ຽນແປງຢ່າງຫຼວງຫຼາຍໃນໂລກປະຈຸບັນ,ຢູ່ຕໍ່ໜ້າເປົ້າໝາຍທີ່ຍິ່ງໃຫຍ່ທີ່ສ້າງປະຊາຄົມອາຊຽນໃນປີ2015,ບັນດາປະເທດອາຊຽນຍັງຕ້ອງພະຍາຍາມເຮັດສຳເລັດໜ້າທີ່ທີ່ສຳຄັນແລະຮີບດ່ວນຫຼາຍຢ່າງໂດຍໄວ.
