ວັນທີ5 ທັນວານີ້,ກະຊວງການຕ່າງປະເທດຊີຣີກ່າວວ່າ, ປັດຈຸບັນ,ລັດຖະບານຊີຣີພວມເປິກສາກັບສັນນິບາດອາລັບກ່ຽວກັບສັນຍາທີ່ສົ່ງຄະນະຜູ່ສັງເກດການ, ຝ່າຍຊີຣີມີ"ທ່າທີອັນຕັ້ງໜ້າ"ຕໍ່ຄວາມຮຽກຮ້ອງຫຼ້າສຸດຂອງສັນນິບາດອາລັບ, ແລະຫວັງໃຫ້ມີການເຊັນສັນຍາກ່ຽວຂ້ອງໃນມໍ່ໆນີ້.ແຕ່ສັນນິບາດກ່າວວ່າຈະບໍ່ຍົກເລີກການລົງໂທດຍ້ອນຊີຣີເຫັນດີເຊັນສັນຍາໃຫ້ສົ່ງຄະນະຜູ່ສັງເກດການເຂົ້າໄປໃນຊີຣີ.
ໃນງານຖະແຫຼງຂ່າວມື້ດຽວກັນ, ທ່ານຈີຮາດ ມາກດາ ໂຄສົກກະຊວງການຕ່າງປະເທດຊີຣີກ່າວວ່າ, ຊີຣີຊົມເຊີຍສັນນິບາດອາລັບທີ່ຈະສົ່ງຄະນະຜູ່ສັງເກດການມາຕິດຕາມສະພາບການໃນຊີຣີ,ແຕ່ປັດຈຸບັນ,"ເງື່ອນໄຂທີ່ຈະເຊັນສັນຍາໃນທັນທີຍັງບໍ່ເຖິງເວລາເທື່ອ". ທ່ານກ່າວວ່າ, ຄວາມເຫັນປັບປຸງທີ່ຝ່າຍຊີຣີສະເໜີອອກແມ່ນເພື່ອຊ່ອຍໃຫ້ຄະນະຜູ່ສັງເກດການສຳເລັດໜ້າທີ່, ທັງເປັນການຮັກສາອະທິປະໄຕແລະຜົນປະໂຫຍດຂອງປະຊາຊົນຊີຣີ, ຮັບປະກັນໃນການແກ້ໄຂວິກິດການພາຍໃນຂົງເຂດອາລັບ.
ທ່ານນາບີວ ອາຣາບີ ເລຂາທິການໃຫຍ່ອາລັບກ່າວວ່າ, ໃນຈົດໝາຍທີ່ຊີຣີສົ່ງໃຫ້ສັນນິບາດອາລັບນັ້ນແມ່ນຊີຣີເຫັນດີເຊັນສັນຍາໃນການສົ່ງຄະນະຜູ່ສັງເກດການຢ່າງມີເງື່ອນໄຂ, ແຕ່ການລົງໂທດຂອງສັນນິບາດອາລັບຕໍ່ຊີຣີຈະບໍ່ຢຸດຍ້ອນເຫດຜົນນີ້, ນອກຈາກຄະນະກຳມະການລະດັບລັດຖະມົນຕີສັນນິບາດອາລັບຈະສະເໜີຫຼັກໝັ້ນອັນໃໝ່ໃນຕໍ່ໜ້າ.
