ລາວຍິນດີກັບຈີນຊຸກຍູ້ໃຫ້ການພົວພັນລະຫວ່າງສອງລັດສອງກອງທັບຂະຫຍາຍຕົວກ້າວໄປໜ້າຕື່ມອີກ
(GMT+08:00) 2011-12-06 11:28:49 cri
ໂດຍຕອບສະໜອງຕາມຄຳເຊີນຂອງກະຊວງປ້ອງກັນປະເທດຂອງສປປລາວ, ພົນໂທຊາຍອິງຖີງ ຮອງເສນາທິການໃຫຍ່ກອງທັບປົດປ່ອຍປະຊາຊົນຈີນໄດ້ນຳພາຄະນະຜູ້ແທນກອງທັບປົດປ່ອຍປະຊາຊົນຈີນໄປຢ້ຽມຢາມລາວໃນວັນທີ5ທັນວານີ້. ຕອນບ່າຍມື້ດຽວກັນ, ຢູ່ນະຄອນຫຼວງວຽງຈັນ, ທ່ານຊາຍອີງຖີງໄດ້ເຂົ້າຢ້ຽມຄຳນັບພົນໂທດວງໃຈ ພິຈິດ ຮອງນາຍົກລັດຖະມົນຕີ ທັງເປັນລັດຖະມົນຕີວ່າການກະຊວງປ້ອງກັນປະເທດລາວແລະພົນຕີສັນຍາຮັກ ພົມວິຫານ ລັດຖະມົນຕີຊ່ວຍວ່າການກະຊວງປ້ອງກັນປະເທດລາວ.
ໃນການຕ້ອນຮັບການເຂົ້າຢ້ຽມຄຳນັບ, ພົນໂທດວງໃຈ ພິຈິດກ່າວວ່າ, ລາວຂອບໃຈນຳຈີນທີ່ໄດ້ໃຫ້ການສະໜັບສະໜູນແລະຊ່ວຍເຫຼືອລາວໃນການພັດທະນາເສດຖະກິດສັງຄົມແລະການສ້າງສາກອງທັບປະຊາຊົນລາວຕະຫຼອດມາ. ພັກ, ລັດແລະກອງທັບປະຊາຊົນລາວເອົາໃຈໃສ່ໃນລະດັບສູງນຳການຂະຫຍາຍການພົວພັນກັບຈີນ, ຍິນດີຮ່ວມກັນພະຍາຍາມກັບຈີນ, ຊຸກຍູ້ການພົວພັນລະຫວ່າງສອງລັດສອງກອງທັບຂະຫຍາຍຕົວກ້າວໄປໜ້າຕື່ມອີກ.
ພົນຕີສັນຍາຮັກກ່າວວ່າ, ປະຊາຊົນແລະກອງທັບລາວຈີນມີມິດຕະພາບທີ່ເປັນມູນເຊື້ອມາແຕ່ດົນນານ. ບໍ່ວ່າສະຖານະການສາກົນແລະພາກພື້ນມີການປ່ຽນແປງແນວໃດ, ມິດຕະພາບແບບນີ້ຈະບໍ່ມີການປ່ຽນແປງ. ລາວຍິນດີຮັດແໜ້ນການພົວພັນປະສານສົມທົບກັບຈີນ, ລົງເລິກການແລກປ່ຽນແລະຮ່ວມມືໃນຂົງເຂດຕ່າງໆລະຫວ່າງສອງກອງທັບ, ປັບປຸງຄວາມສາມັກຄີແລະມິດຕະພາບລະຫວ່າງສອງກອງທັບຢ່າງບໍ່ຢຸດຢັ້ງ.
ທ່ານຊາຍອີງຖີງກ່າວວ່າ, ຈີນລາວມີມິດຕະພາບມາແຕ່ດົນນານ. ເປັນເວລາດົນນານມາແລ້ວ, ສອງປະເທດໄດ້ມີຄວາມເຄົາລົບເຊິ່ງກັນແລະກັນ, ຕ່າງສະໜັບສະໜູນແລະຊ່ວຍເຫຼືອເຊິ່ງກັນແລະກັນ. ໂດຍສະເພາະແມ່ນຊຸມປີມໍ່ໆມານີ້, ພາຍໃຕ້ຄວາມພະຍາຍາມຮ່ວມຂອງສອງຝ່າຍ, ການພົວພັນຄູ່ຮ່ວມມືຍຸດທະສາດຮອບດ້ານຈີນລາວທີ່ທ່ານຫູຈີນທາວ ເລຂາທິການໃຫຍ່ສູນກາງພັກກອມມູນິດຈີນແລະທ່ານຈູມມາລີ ໄຊຍະສອນ ເລຂາທິການໃຫຍ່ຄະນະບໍລິຫານງານສູນກາງພັກປະຊາຊົນປະຕິວັດລາວຮ່ວມກັນປະກາດນັ້ນ ໄດ້ຂະຫຍາຍໄປໜ້າຢ່າງບໍ່ຢຸດຢັ້ງ. ຈີນລາວມີລະບອບສັງຄົມຄືກັນ, ສອງກອງທັບມີພາລະໜ້າທີ່ຮ່ວມກັນ. ຈີນຍິນດີເພີ່ມທະວີການໄປມາຫາສູ່ກັນລະຫວ່າງການນຳລະດັບສູງ, ຊຸກຍູ້ການຮ່ວມມືທີ່ຕິດແທດຕົວຈິງ, ເພີ່ມທະວີການປະສານສົມທົບກັນ, ເພື່ອປະກອບສ່ວນເທົ່າທີ່ຄວນຕໍ່ການຂະຫຍາຍການພົວພັນສອງລັດສອງກອງທັບ, ບັນລຸການພັດທະນາແລະຄວາມຈະເລີນຮຸ່ງເຮືອງຮ່ວມກັນແລະປົກປັກຮັກສາສັນຕິພາບແລະສະຖຽນລະພາບຂອງພາກພື້ນນີ້.
