ນາຍົກລັດຖະມົນຕີໄທກ່າວວ່ານ້ຳຖ້ວມຢູ່ເຂດປະສົບໄພຈະຖືກລະບາຍອອກກ່ອນທ້າຍປີນີ້
(GMT+08:00) 2011-12-07 10:06:35 cri
ວັນທີ6ທັນວານີ້, ທ່ານນາງຍິ່ງລັກ ຊິນນະວັດ, ນາຍົກລັດຖະມົນຕີໄທກ່າວວ່າ, ລັດຖະບານໄທຈະປະຕິບັດຕາມຄວາມເຫັນຂອງເຈົ້າຊີວິດສົມເດັດພູມິພົນ ອະດຸນຍະເດດ, ພະຍາຍາມລະບາຍນ້ຳທີ່ຍັງຂັງຢູ່ບາງເຂດສູ່ທະເລເພື່ອແກ້ໄຂຄວາມຫຍຸ້ງຍາກຂອງປະຊາຊົນ, ນ້ຳຖ້ວມຂັງຢູ່ເຂດປະສົບໄພທັງໝົດຈະຖືກລະບາຍອອກກ່ອນທ້າຍປີນີ້.
ທ່ານນາງຍິ່ງລັກ ຊິນນະວັດກ່າວວ່າ, ປັດຈຸບັນ, ໃນທົ່ວປະເທດໄທຍັງມີ80ຫາ100ບ້ານແລະເຂດຊຸມຊົນຖືກນ້ຳຖ້ວມຢູ່, ດັ່ງນັ້ນຕ້ອງເຮັດໃຫ້ເຂດຊຸມຊົນແລະບ້ານເຫຼົ່ານີ້ສາມາດຟື້ນຟູການຜະລິດແລະການດຳລົງຊີວິດໃຫ້ເປັນປົກກະຕິກ່ອນທ້າຍປີນີ້, ເພື່ອເຮັດໃຫ້ປະຊາຊົນຜູ້ປະສົບໄພຈະໄດ້ສະຫຼອງບຸນປີໃໝ່ສາກົນຢູ່ໃນເຮືອນຂອງຕົນຢ່າງມ່ວນຊື່ນ.
ວັນທີ6ທັນວານີ້, ກອງປ້ອງກັນແລະບັນເທົາໄພສາທາລະນະຂອງກະຊວງມະຫາດໄທປະກາດຂໍ້ມູນໂດຍສະແດງໃຫ້ຮູ້ແລະຢືນຢັນວ່າມີຜູ້ເສຍຊີວິດ684ຄົນໃນໄພນ້ຳຖ້ວມ, ເຊິ່ງເພີ່ມອີກ18ຄົນຈາກຕົວເລກ666ຄົນທີ່ໄດ້ປະກາດໃນວັນທີ3ທັນວານີ້, ແລະມີຜູ້ຫາຍສາບສູນ3ຄົນ.
