ວັນທີ6ທັນວານີ້, ລັດສານຂອງມຽນມາເຜີຍໃຫ້ຮູ້ວ່າ, ກອງທັບລັດຖະບານມຽນມາແລະອົງການປົກຄອງລັດສານໄດ້ລົງນາມໃນສັນຍາຢຸດຍິງໃນວັນທີ2ທັນວານີ້, ລັດຖະບານມຽນມາໄດ້ອອກຄໍາສັ່ງຢຸດຍິງຕໍ່ທະຫານລັດຖະບານມຽນປະຈໍາລັດສານໃນວັນທີ3ທັນວານີ້, ພາຍຫລັງໄດ້ຮັບຄໍາສັ່ງນີ້ຈາກເອກະສານສະບັບກ໋ອບປີ້ໃນມື້ວັນທີ6ແລ້ວ, ກອງທັບລັດສານກໍໄດ້ອອກຄໍາສັ່ງຢຸດຍິງຕໍ່ທະຫານຂອງຕົນ. ນີ້ແມ່ນຄວາມຄືບໜ້າໃໝ່ທີ່ສໍາຄັນໃນດ້ານວຽກງານຄວາມປອງດອງຊາດຂອງລັດຖະບານມຽນມາ.
ຂ່າວສານAFPໄດ້ອີງໃສ່ຄໍາເວົ້າຂອງຜູ້ທີ່ເປັນສັກຂີພິຍານໃນພິທີລົງນາມໃນສັນຍາມາແຈ້ງໃຫ້ຮູ້ວ່າ, ໃນກຸ່ມປະກອບອາວຸດຊົນເຜົ່າສ່ວນໜ້ອຍ5ຊົນເຜົ່າທີ່ເຂົ້າຮ່ວມການເຈລະຈາສັນຕິພາບ, ກອງທະຫານລັດສານໄດ້ລົງນາມໃນສັນຍາຢຸດຍິງເປັນຜູ້ທໍາອິດ. ກອງທະຫານລັດສານແມ່ນກຸ່ມປະກອບອາວຸດຊົນເຜົ່າສ່ວນໜ້ອຍທີ່ມີຈໍານວນຕົນຫລາຍກວ່າໝູ່ທີ່ຍັງເຮັດສົງຄາມກັບລັດຖະບານໃນມຽນມາ, ປະຈຸບັນ, ສ່ວນຫລາຍປະຈໍາຢູ່ເຂດຊາຍແດນໄທ-ມຽນມາ.
ໃນເວລາດົນນານມານີ້,ອາເມລິກາແລະບາງປະເທດຕາເວັນຕົກກໍຖື "ລັດຖະບານມຽນມາສະກັດກັ້ນຊົນເຜົ່າສ່ວນໜ້ອຍ"ເປັນສາເຫດສໍາຄັນໃນການລົງໂທດຕໍ່ມຽນມາ.ໃນເວລາຢ້ຽມຢາມມຽນມາໃນຫວ່າງກ່ອນນີ້ບໍ່ດົນ,ທ່ານນາງຮິວລາຣີ ຄຼິນຕັນ,ລັດຖະມົນຕີວ່າການກະຊວງການຕ່າງປະເທດອາເມລິກາກໍໄດ້ຮຽກຮ້ອງໃຫ້ລັດຖະບານມຽນມາຢຸດຕິການປະຕິບັດການທາງການທະຫານຕໍ່ກຸ່ມປະກອບອາວຸດຊົນເຜົ່າສ່ວນໜ້ອຍ,ແລະຖືເລື່ອງນີ້ເປັນເງື່ອນໄຂໃນການຜ່ອນຄາຍການລົງໂທດຕໍ່ມຽນມາ.
ນັກວິເຄາະເຫັນວ່າ, ຄວາມປອງດອງຊາດໃນມຽນມາແມ່ນສອດຄ່ອງກັບການພັດທະນາສັງຄົມ,ແມ່ນພື້ນຖານສໍາຄັນທີ່ມຽນມາເປີດປະຕູສູ່ພາຍນອກແລະຊຸກຍູ້ການພັດທະນາດ້ານເສດຖະກິດ. ລັດຖະບານແລະກຸ່ມປະກອບອາວຸດອິດສະຫລະຄາຊິນຊົນເຜົ່າຕ່າງໆກໍມີຈຸດປະສົງເຊັ່ນນີ້. ແຕ່ຄວາມຂັດແຍ່ງກັນລະຫວ່າງຊົນເຜົ່າຂອງມຽນມາມີສາເຫດທາງປະຫວັດສາດ, ແລະກໍ່ຖືກຈໍາກັດຈາກປັດໄຈຜົນປະໂຫຍດທີ່ສັບສົນໃນຕົວຈິງ. ປະຈຸບັນ, ກອງທະຫານລັດຖະບານມຽນມາແລະກອງທະຫານອິດສະຫລະຄາຊິນປະທະກັນເລື້ອຍໆ, ຈະບັນລຸການຢຸດຍິງຢ່າງຮອບດ້ານໃນເວລາສັ້ນໆມີຄວາມຫຍຸ້ງຍາກຫລາຍ. ການລົງນາມໃນສັນຍາຢຸດຍິງລະຫວ່າງກອງທະຫານລັດຖະບານມຽນມາກັບກອງທະຫານລັດສານສາມາດສ້າງຊ່ອງທາງໃໝ່ໃນດ້ານການບັນລຸຄວາມປອງດອງຊາດຫລືບໍ່, ຍັງຕ້ອງຕິດຕາມຕໍ່ໄປ.
