ຈີນເປີດເຜີຍປຶ້ມປົກຂາວ"ການຄ້າກັບຕ່າງປະເທດຂອງຈີນ"
(GMT+08:00) 2011-12-07 11:45:37 cri
ຕາມຂ່າວCRI, ວັນທີ7ທັນວານີ້, ຫ້ອງການຖະແຫຼງຂ່າວຄະນະລັດຖະບານຈີນໄດ້ເປີດເຜີຍປຶ້ມປົກຂາວ"ການຄ້າກັບຕ່າງປະເທດຂອງຈີນ", ໄດ້ແນະນຳສະພາບການທີ່ຈີນເປີດກວ້າງການໄຂປະຕູສູ່ພາຍນອກເລື້ອຍໆແລະດຳເນີນການຮ່ວມມືທາງເສດຖະກິດການຄ້າກັບປະເທດຕ່າງໆໃນໂລກຢ່າງຕັ້ງໜ້າບົນພື້ນຖານສະເໝີພາບແລະຕ່າງຝ່າຍຕ່າງມີຜົນປະໂຫຍດ ນັບແຕ່ຈີນໄດ້ປະຕິຮູບແລະໄຂປະຕູສູ່ພາຍນອກ, ໂດຍສະເພາະແມ່ນຈີນເຂົ້າເປັນສະມາຊິກອົງການການຄ້າໂລກໃນ10ປີມານີ້.
ປຶ້ມປົກຂາວຊີ້ອອກວ່າ, ໂດຍຜ່ານການພັດທະນາມາເປັນເວລາຫຼາຍປີ, ການຄ້າກັບຕ່າງປະເທດໄດ້ກາຍເປັນພາກສ່ວນໜຶ່ງທີ່ເຂັ້ມແຂງກວ່າໝູ່ແລະເຕີບໂຕໄວກວ່າໝູ່ໃນເສດຖະກິດຈີນ, ຈີນໄດ້ກາຍເປັນປະເທດການຄ້າໃຫຍ່ຂອງໂລກ. ການພັດທະນາການຄ້າກັບຕ່າງປະເທດຂອງຈີນໄດ້ເຮັດໃຫ້ຈີນມີສາຍພົວພັນທີ່ແໜ້ນແຟ້ນກວ່າເກົ່າກັບໂລກ, ໄດ້ຊຸກຍູ້ການພັດທະນາທີ່ທັນສະໄໝຂອງຈີນຢ່າງແຂງແຮງ, ແລະຊຸກຍູ້ໃຫ້ໂລກມີຄວາມຈະເລີນຮຸ່ງເຮືອງແລະກ້າວໄປໜ້າ.
ປຶ້ມປົກຂາວກ່າວເນັ້ນວ່າ, ຈີນຈະເປີດກວ້າງການໄຂປະຕູສູ່ພາຍນອກຕື່ມອີກ. ຈີນຍິນດີຮ່ວມກັບຄູ່ການຄ້າ, ພ້ອມກັນຮັບມືກັບສິ່ງທ້າທາຍນາໆປະການທີ່ເສດຖະກິດໂລກແລະການຄ້າໂລກພວມປະເຊີນຢູ່, ຊຸກຍູ້ໃຫ້ການຄ້າກັບຕ່າງປະເທດດຸນດ່ຽງກວ່າເກົ່າ, ກົມກຽວກວ່າເກົ່າແລະພັດທະນາແບບຍືນຍົງ, ຈະເລີນຮຸ່ງເຮືອງຮ່ວມກັນກັບຄູ່ການຄ້າແລະຕ່າງຝ່າຍຕ່າງໄດ້ຮັບຜົນປະໂຫຍດ.
