ວັນທີ 6 ທັນວານີ້, ຢູ່ທີ່ປັກກິ່ງ, ທ່ານຊີຈີ້ນຜິງ ຮອງປະທານປະເທດຈີນກ່າວວ່າ, ຈີນຍິນດີພ້ອມກັນທຳຄວາມພະຍາຍາມກັບອາເມລິກາ, ເພິ່ມທະວີການສົນທະນາ,ຄວາມໄວ້ເນື້ອເຊື່ອໃຈກັນ ແລະ ການຮ່ວມມືຢ່າງບໍ່ຢຸດຢັ້ງ, ເຄົາລົບຜົນປະໂຫຍດແກນກາງ ແລະ ຄວາມສົນໃຈອັນສຳຄັນລະຫວ່າງສອງຝ່າຍ, ແກ້ໄຂບັນຫາອ່ອນໄຫວຢ່າງເໝາະສົມ, ຄວບຄຸມຄວາມຂັດແຍ່ງຢ່າງບັງເກີດຜົນ, ຊຸກຍູ້ການພົວພັນລະຫວ່າງສອງປະເທດໃຫ້ຂະຫຍາຍຕົວຢ່າງປອດໃສແລະໝັ້ນທ່ຽງ.
ທ່ານຊີຈີ້ນຜິງທັດສະນະດັ່ງກ່າວໃນເວລາພົບປະທ່ານເຮັນລີ ພໍເຊິນ ອະດີດລັດຖະມົນຕີວ່າການກະຊວງການເງິນອາເມລິກາໃນມື້ດຽວກັນ. ທ່ານຊີ້ອອກວ່າ, ພາຍໃຕ້ສະຖານະການເສດຖະກິດໂລກທີ່ສັບສົນ ແລະ ຂ້ຽວຂາດ, ການເພິ່ມທະວີການຮ່ວມມືດ້ານເສດຖະກິດການຄ້າລະຫວ່າງຈີນກັບອາເມລິກາທີ່ຕ່າງຝ່າຍຕ່າງຈຸນເຈືອກັນແລະໄດ້ຮັບຜົນປະໂຫຍດຮ່ວມກັນ ສຳລັບສອງປະເທດແລະໂລກແມ່ນສຳຄັນຫຼາຍ. ຫວັງໃຫ້ອາເມລິກາຜ່ອນຍານການຈຳກັດການສົ່ງອອກຜະລິດຕະພັນເທັກໂນໂລຊີສູງຕໍ່ຈີນ, ອຳນວຍຄວາມສະດວກແລະໃຫ້ການສະໜັບສະໜູນແກ່ວິສາຫະກິດຈີນໄປລົງທຶນຢູ່ອາເມລິກາ, ສະກັດກັ້ນລັດທິອາປົກປ້ອງການຄ້າ ແລະ ເຮັດໃຫ້ບັນຫາເສດຖະກິດການຄ້າຫັນເປັນການເມືອງ, ສ້າງສະພາບແວດລ້ອມທີ່ດີໃຫ້ແກ່ການຮ່ວມມືດ້ານເສດຖະກິດການຄ້າລະຫວ່າງຈີນກັບອາເມລິກາ.
