ຜູ່ນຳຝະຣັ່ງແລະເຢຍລະມັນຍື່ນຂໍ້ສະເໜີຮ່ວມກ່ຽວກັບການດັດແກ້ສົນທິສັນຍາສະຫະພາບເອີລົບໃຫ້EU
(GMT+08:00) 2011-12-08 18:06:25 cri
ວັນທີ7ທັນວານີ້,ທ່ານນີໂຄລັສ ຊາໂກຊີ ປະທານາທິບໍດີຝະຣັ່ງແລະທ່ານນາງແອງເຈີລາ ເມີເກວ ນາຍົກລັດຖະມົນຕີເຢຍລະມັນໄດ້ສົ່ງຈົດໝາຍໄປຍັງທ່ານແຮັກມານ ວັນ ຣົມປຸຍ ປະທານຖາວອນສະຫະພາບເອີລົບຢ່າງເປັນທາງການໂດຍສະເໜີໃຫ້ດັດແກ້ສົນທິສັນຍາສະຫະພາບເອີລົບທີ່ປະຕິບັດໃນປະຈຸບັນ,ເພີ່ມຄວາມເຂັ້ມງວດໃນການປະຕິບັດລະບຽບວິໄນທາງດ້ານການເງິນຂອງສະຫະພາບເອີລົບໂດຍສະເພາະແມ່ນເຂດໃຊ້ເງິນເອີໂຣເພື່ອຮັບປະກັນຄວາມໝັ້ນທ່ຽງແລະການເຕີບໂຕທາງດ້ານເສດຖະກິດ,ຫຼຸດພົ້ນອອກຈາກສະພາບອັດຕະຄັດໃນວິກິດການໜີ້ສິນພາກລັດຂອງເອີລົບ.
ຂໍ້ສະເໜີຂອງຝະຣັ່ງແລເຢຍລະມັນມີເນື້ອໃນຕົ້ນຕໍ4ດ້ານຄືເພີ່ມທະວີການກໍ່ສ້າງກົນໄກເຂດໃຊ້ເງິນເອີໂຣ,ກົນໄກທີ່ກໍ່ຕົວເປັນກອງປະຊຸມສຸດຍອດເຂດໃຊ້ເງິນເອີໂຣ,ກ່ອນວິກິດການໜີ້ສິນສະຫະພາບເອີລົບຈະໄດ້ຮັບການສະກັດກັ້ນໄວ້ນັ້ນ,ກອງປະຊຸມສຸດຍອດເຂດໃຊ້ເງິນເອີໂຣຈະກາຍເປັນກອງປະຊຸມປະຈຳເດືອນ.
ສ້າງຂອບປ້ອງກັນໂດຍລວມ,ເຂດໃຊ້ເງິນເອີໂຣຈະໃຊ້ນະໂຍບາຍທີ່ຄ້າຍໆກັນໃນການຕິດຕາມຄຸ້ມຄອງການເງິນ,ການປະກອບອາຊີບ,ການເກັບສ່ວຍສາອາກອນແລະຊຸກຍູ້ການເຕີບໂຕທາງດ້ານເສດຖະກິດ.
ສົນທິສັນຍາສະຫະພາບເອີລົບສະບັບດັດແກ້ຈະປະຕິບັດມາດຕະການລົງໂທດແບບອັດຕະໂນມັດຕໍ່ປະເທດທີ່ມີຂຸມການເງິນກວມGDPຫຼາຍກວ່າ3%,ເວັ້ນເສຍແຕ່ກອງປະຊຸມສຸດຍອດເຂດໃຊ້ເງິນເອີໂຣປະຕິເສດດ້ວຍຄະແນນສຽງສ່ວນຫຼາຍທີ່ສຸດ.
ແລະ ອັນສຸດທ້າຍ,ເລີ່ມປະຕິບັດກົນໄກຄວາມໝັ້ນທ່ຽງເອີລົບຊຶ່ງເປັນກົນໄກຊ່ວຍເຫຼືອຖາວອນຂອງເຂດໃຊ້ເງິນເອີໂຣກ່ອນເວລາກຳນົດ1ປີຄືເລີ່ມຕົ້ນໃນປີ2012.
ຜູ່ນຳປະເທດສະມາຊິກສະຫະພາບເອີລົບຈະຈັດກອງປະຊຸມສຸດຍອດຢູ່ນະຄອນຫຼວງບຼຸກແຊນຂອງແບນຊິກແຕ່ວັນທີ8ຫາວັນທີ9ທັນວານີ້.ຜູ່ນຳຂອງຝະຣັ່ງແລະເຢລະມັນຫວັງວ່າກອງປະຊຸມສຸດຍອດຄັ້ງນີ້ຈະມີຂໍ້ຕົກລົງກັນກ່ຽວກັບຂໍ້ສະເໜີດັ່ງກ່າວເພື່ອດັດແກ້ສົນທິສັນຍາສະຫະພາບເອີລົບໃຫ້ສຳເລັດໃນເດືອນມີນາປີ2012.
