ຕາມຂ່າວCRI, ວັນທີ7ທັນວານີ້, ເຂື່ອນໄຟຟ້າກອມຈາຍຢູ່ແຂວງກໍາປົດກໍາປູເຈຍທີ່ກຸ່ມບໍລິສັດກໍ່ສ້າງຊົນລະປະທານແລະໄຟຟ້ານໍ້າຕົກຈີນລົງທຶນນັ້ນໄດ້ສ້າງສໍາເລັດແລະເປີດນໍາໃຊ້ຢ່າງເປັນທາງການແລ້ວ, ໃນພິທີເປີດນໍາໃຊ້ຄັ້ງນີ້ມີທ່ານຮຸນແຊນ,ນາຍົກລັດຖະມົນຕີກໍາປູເຈຍ, ທ່ານຜ່ານກວາງເຊ, ເອກອັກຄະລັດຖະທູດຈີນປະຈໍາກໍາປູເຈຍ, ເຈົ້າໜ້າທີ່ທີ່ກ່ຽວຂ້ອງຂອງກຸ່ມບໍລິສັດກໍ່ສ້າງຊົນລະປະທານແລະໄຟຟ້ານໍ້າຕົກຈີນ,ພ້ອມດ້ວຍຜູ້ຕາງໜ້າປະຊາຊົນແຂວງກໍາປົດ, ເກືອບ2ພັນຄົນເຂົ້າຮ່ວມ.
ໃນພິທີ,ທ່ານຮຸນແຊນໄດ້ກ່າວຄໍາປາໄສ, ສະແດງຄວາມຂອບອົກຂອບໃຈຕໍ່ລັດຖະບານຈີນທີ່ຕັ້ງໜ້າລະດົມແລະຊຸກຍູ້ໃຫ້ວິສາຫະກິດຈີນໄປລົງທຶນໃນຂົງເຂດພື້ນຖານໂຄງລ່າງຢູ່ກໍາປູເຈຍ,ຊຸກຍ້ໃຫູ້ເສດຖະກິດສັງຄົມກໍາປູເຈຍພັດທະນາຢ່າງວ່ອງໄວ. ທ່ານຮຸນແຊນກ່າວວ່າ, ເຂື່ອນໄຟຟ້າກອມຈາຍມີກໍາລັງຕິດຕັ້ງເຄື່ອງຈັກຜະລິດໄຟຟ້າເກືອບ200ເມກາວັດແມ່ນເຂື່ອນໄຟຟ້າທີ່ໃຫຍ່ທີ່ສຸດຢູ່ກໍາປູເຈຍໃນປະຈຸບັນ. ເຂື່ອນໄຟຟ້ານີ້ສ້າງສໍາເລັດແລະຜະລິດໄຟຟ້າແລ້ວຈະສາມາດເສີມຂະຫຍາຍບົດບາດອັນສໍາຄັນໃນການແກ້ໄຂບັນຫາຂາດແຄນໄຟຟ້າຢູ່ແຂວງກໍາປົດ,ແຂວງຕາແກ້ວ, ແຂວງສີຫານຸແລະນະຄອນຫລວງພະນົມເປັນ, ຈະເປັນເງື່ອນໄຂເຮັດໃຫ້ການຜະລິດແລະຊີວິດການເປັນຢູ່ຂອງປະຊາຊົນໃນແຂວງເຫລົ່ານີ້ໃຫ້ດີຂຶ້ນ.
