ວັນທີ7ທັນວານີ້,ຢູ່ນະຄອນຫລວງປັກກິ່ງ, ທ່ານມາຊ່ຽວທ່ຽນ, ຮອງເສນາທິການ ກອງທັບປົດປ່ອຍປະຊາຊົນຈີນແລະທ່ານນາງມີເຊວ ຟຼູນອຍ, ລັດຖະມົນຕີຊ່ວຍວ່າການກະຊວງປ້ອງກັນປະເທດອາເມລິກາໄດ້ເປັນປະທານຮ່ວມໃນກອງປະຊຸມປຶກສາຫາລືວຽກງານປ້ອງກັນຊາດລະຫວ່າງກະຊວງປ້ອງກັນປະເທດຈີນກັບອາເມລິກາຄັ້ງທີ12. ສອງຝ່າຍໄດ້ແລກປ່ຽນຄວາມຄິດເຫັນຢ່າງເລິກເຊິ່ງກ່ຽວກັບການພົວພັນລະຫວ່າງ2ກອງທັບ,ໂດຍສະເພາະແມ່ນ, ອາເມລິກາຂາຍອາວຸດໃຫ້ແກ່ໄຕ້ຫວັນ,ການທ້າທາຍດ້ານຄວາມໝັ້ນຄົງຮ່ວມແລະບັນຫາສາກົນແລະພາກພື້ນທີ່ກ່ຽວຂ້ອງ.
ທ່ານນາງຟຼູນອຍກ່າວວ່າ, ເຫັນດີນໍາຄວາມເຫັນຂອງທ່ານມາຊ່ຽວທ່ຽນກ່ຽວກັບການພົວພັນລະຫວ່າງ2ກອງທັບຢ່າງເຕັມທີ່. ນາງເວົ້າວ່າ, ການພົວພັນອາເມລິກາ-ຈີນມີຄວາມສໍາຄັນຫລາຍ, ເສດຖະກິດສອງປະເທດເພິ່ງພາເຊິ່ງກັນແລະກັນ, ຜົນປະໂຫຍດເຊື່ອມໂຍງເຂົ້າກັນໃນລະດັບສູງ, ປະຈຸບັນໃນທົ່ວໂລກນີ້, ບໍ່ມີການພົວພັນໃດໆມີຄວາມສໍາຄັນເທົ່າທຽມກັບການພົວພັນເອເມລິກາ-ຈີນ. ຄວາມເຫັນກ່ຽວກັບ "ການປະທະກັນລະຫວ່າງອາເມລິກາກັບຈີນບໍ່ສາມາດຫລີກລ່ຽງໄດ້"ແມ່ນຄວາມເຫັນທີ່ຜິດພາດຫລາຍ.ນາງເຫັນວ່າ,ການພົວພັນລະຫວ່າງ2ກອງທັບທີ່ປອດໃສ,ໝັ້ນຄົງ,ໜ້າເຊື່ອຖືແລະຍືນຍົງແມ່ນສອດຄ່ອງກັບຄວາມເຫັນທີ່ເປັນເອກະສັນກັນລະຫວ່າງປະມຸກລັດຂອງສອງປະເທດ,ມີຄວາມໝາຍສໍາຄັນຕໍ່ການຮັກສາຜົນປະໂຫຍດດ້ານຄວາມໝັ້ນຄົງຂອງສອງຝ່າຍ,ແລະຮັກສາສັນຕິພາບແລະສະຖຽນລະພາບຂອງອາຊີປາຊີຟິກ, ຮ່ວມກັນຮັບມືກັບສິ່ງທ້າທາຍໃນຕໍ່ໜ້າ.
