ລາວເລື່ອນເວລາກໍ່ສ້າງເຂື່ອນໄຟຟ້າໄຊຍະບູລີ
(GMT+08:00) 2011-12-09 10:40:24 cri
ຕາມຂ່າວຈາກໜັງສືພິມປະຊາຊົນລາຍວັນຂອງຈີນ: ວັນທີ8ທັນວານີ້, ຂ່າວສານຣອຍເຕີຂອງອັງກິດໄດ້ລາຍງານຂ່າວວ່າ, ລາວຈະເລື່ອນເວລາປະຕິບັດແຜນການກໍ່ສ້າງເຂື່ອນໄຟຟ້າຕາມລຳແມ່ນ້ຳຂອງທີ່ແຂວງໄຊຍະບູລີແລະຈະມີການຕັດສິນໃຈຫຼັງຈາກປະກາດຜົນການປະເມີນຜົນກະທົບທາງສິ່ງແວດລ້ອມທີ່ຮັບຜິດຊອບໂດຍຍີ່ປຸ່ນ. ລັດຖະມົນຕີວ່າການກະຊວງສິ່ງແວດລ້ອມຂອງ4ປະເທດ, ຄື ລາວ, ໄທ, ກຳປູເຈຍແລະຫວຽດນາມພົບປະເຈລະຈາຢູ່ຊຽມຣຽບຂອງກຳປູເຈຍແລ້ວ, ໄດ້ປະກາດເລື່ອງນີ້ຕໍ່ພາຍນອກ.
ເຂື່ອນໄຟຟ້າໄຊຍະບູລີໄດ້ຮັບການລົງທຶນ3ຕື້500ລ້ານໂດລາ, ສ່ວນຫຼາຍເປັນເງິນທຶນຂອງໄທ, ຫຼັງຈາກສ້າງສຳເລັດແລ້ວໄຟຟ້າ95%ຈະສົ່ງໄປສູ່ໄທ. ແຕ່ຍ້ອນຄວາມວິຕົກກັງວົນຕໍ່ບັນຫາສິ່ງແວດລ້ອມ, ແຜນການກໍ່ສ້າງເຂື່ອນໄຟຟ້າໄຊຍະບູລີຈຶ່ງຖືກເລື່ອນເວລາອອກໄປເລື້ອຍໆ. ຜູ້ສະໜັບສະໜູນແຜນການນີ້ກ່າວວ່າ, ການກໍ່ສ້າງເຂື່ອນໄຟຟ້າດັ່ງກ່າວຈະສ້າງລາຍຮັບໃຫ້ແກ່ປະເທດທີ່ທຸກຍາກທີ່ສຸດໃນອາຊີອາຄະເນ. ແຕ່ຜູ້ຄັດຄ້ານກໍ່ກ່າວວ່າ, ການກໍ່ສ້າງເຂື່ອນໄຟຟ້າດັ່ງກ່າວຈະສ້າງຜົນກະທົບອັນໜັກໜ່ວງຕໍ່ສິ່ງແວດລ້ອມຢູ່ລ້ອງແມ່ນ້ຳຂອງ, ໂດຍສະເພາະແມ່ນຜົນກະທົບຕໍ່ຊາວປະມົງຂອງກຳປູເຈຍແລະຫວຽດນາມ.
