ຜູ້ແທນຈີນຮຽກຮ້ອງໃຫ້ປະຊາຄົມໂລກຈົ່ງຮັບຟັງສຽງຮຽກຮ້ອງຂອງປະເທດທີ່ພວມພັດທະນາ
(GMT+08:00) 2011-12-09 10:47:49 cri
ວັນທີ8ທັນວານີ້, ກອງປະຊຸມເວທີປຶກສາຫາລືປະຊາທິປະໄຕບາຫຼີຄັ້ງທີ4ໄດ້ຈັດຂຶ້ນຢູ່ເກາະບາຫຼີຂອງອິນໂດເນເຊຍ, ແລະຈະດຳເນີນເປັນເວລາ2ວັນ. ໃນກອງປະຊຸມເວທີປຶກສາຫາລືດັ່ງກ່າວ, ທ່ານຕົງຢຸນຫູ, ຮອງຫົວໜ້າຫ້ອງການຖະແຫຼງຂ່າວລັດຖະບານຈີນກ່າວວ່າ, ໃນເວລາສົ່ງເສີມປະຊາທິປະໄຕ, ປະຊາຄົມໂລກຄວນຮັບຟັງສຽງຮຽກຮ້ອງຂອງປະເທດທີ່ພວມພັດທະນາໃຫ້ຫຼາຍຂຶ້ນ.
ທ່ານຕົງຢຸນຫູກ່າວວ່າ, ໃນສະພາບທີ່ປະເທດທີ່ພັດທະນາແລ້ວຈຳນວນໜ້ອຍໜຶ່ງໄດ້ຜູກຂາດສິດປະກອບຄຳຄິດຄຳເຫັນແລະສິດອະທິບາຍກ່ຽວກັບປະຊາທິປະໄຕນັ້ນແມ່ນບໍ່ສອດຄ່ອງກັບຈິດໃຈປະຊາທິປະໄຕ. ເປັນເວລາດົນນານມາແລ້ວທີ່ປະເທດພວມພັດທະນາອັນກວ້າງຂວາງໄດ້ທຳຄວາມພະຍາຍາມຢ່າງໃຫຍ່ຫຼວງໃນການຊອກຫາຮູບແບບປະຊາທິປະໄຕທີ່ແທດເໝາະກັບຄວາມເປັນຈິງຂອງຕົນ. ບາງປະເທດທີ່ຈະເລີນໃໝ່ເລີ່ມຈາກຄວາມຕົວຈິງຂອງຕົນ, ຕັ້ງໜ້າຖອດຖອນບົດຮຽນທີ່ດີຈາກປະເທດທີ່ພັດທະນາແລ້ວ, ພະຍາຍາມຊອກຄົ້ນຫາເສັ້ນທາງແລະຮູບແບບພັດທະນາປະຊາທິປະໄຕທີ່ມີຈຸດພິເສດຂອງຕົນໃນຂະບວນການຊຸກຍູ້ການພັດທະນາກ້າວສູ່ທັນສະໄໝ, ໄດ້ຮັບຜົນສຳເລັດທີ່ພົ້ນເດັ່ນ.
ທ່ານຕົງຢຸນຫູຍັງໄດ້ແນະນຳບົດຮຽນການກະທຳຂອງຈີນໃນການສ້າງສາທາງການເມືອງປະຊາທິປະໄຕ. ທ່ານກ່າວວ່າ, ການພັດທະນາປະຊາທິປະໄຕຕ້ອງກຳແໜ້ນທາດແທ້ຂອງປະຊາທິປະໄຕ, ລັດຖະບານຄວນຕອບສະໜອງຄວາມປາຖະໜາຂອງປະຊາຊົນ, ປະຕິບັດວຽກງານຕາມຄວາມປາຖະໜາແລະຄວາມຮຽກຮ້ອງຂອງຄົນສ່ວນຫຼາຍ; ການພັດທະນາປະຊາທິປະໄຕຕ້ອງຢືນຢູ່ບົນຄວາມເປັນຈິງຂອງປະເທດຕົນ, ຊອກຄົ້ນຮູບແບບພັດທະນາການເມືອງທີ່ສອດຄ່ອງກັບຄວາມຕ້ອງການຂອງປະເທດຕົນ; ການພັດທະນາປະຊາທິປະໄຕຕ້ອງຍຶດໝັ້ນການປະຕິຮູບແລະປະດິດສ້າງໃໝ່, ຂະຫຍາຍຕົວເທື່ອລະກ້າວແລະເປັນລະບຽບຮຽບຮ້ອຍ.
