ກອງປະຊຸມສຸດຍອດEUຕົກລົງສ້າງສົນທິສັນຍາໃໝ່ເພື່ອເພີ່ມຄວາມເຂັ້ມງວດໃນການປະຕິບັດລະບຽບວິໄນທາງດ້ານການເງິນ
(GMT+08:00) 2011-12-09 15:23:52 cri
ທ່ານແຮັກມານ ວັນ ຣົມປຸຍ ປະທານຖາວອນສະຫະພາບເອີລົບປະກາດໃນຕອນຂ້ອນແຈ້ງວັນທີ9ທັນວານີ້ວ່າ,ຜູ່ນຳປະເທດສະມາຊິກສະຫະພາບເອີລົບເຫັນດີໃນການສ້າງສົນທິສັນຍາສະບັບໃໝ່ເພື່ອເພີ່ມຄວາມເຂັ້ມງວດໃນການປະຕິບັດລະບຽບວິໄນດ້ານການເງິນເພື່ອຫຼີກລ່ຽງບໍ່ໃຫ້ວິກິດການໜີ້ສິນເກີດຂຶ້ນອີກ.
ສົນທິສັນຍາໃໝ່ສະບັບນີ້ນອກຈາກເໝາະສົມໃນການນຳໃຊ້ກັບ17ປະເທດສະມາຊິກໃນເຂດໃຊ້ເງິນເອີໂຣແລ້ວ,ຍັງເປັນການເປີກວ້າງ ຕໍ່ປະເທດສະມາຊິກສະຫະພາບເອີລົບທີ່ບໍ່ຢູ່ໃນເຂດໃຊ້ເງິນເອີໂຣ,ແລະໄດ້ຢືນຢັນແລ້ວວ່າມີ6ປະເທດຍິນດີເຂົ້າຮ່ວມສົນທິສັນຍາໃໝ່.
ພາຍຫຼັງກອງປະຊຸມ,ທ່ານນີໂຄລັສ ຊາໂກຊີ ປະທານາທິບໍດີຝະຣັ່ງເຜີຍໃຫ້ຮູ້ວ່າ,ເນື່ອງຈາກວ່າເງື່ອນໄຂເພີ່ມເຕີມທີ່ທ່ານເດວິດ ຄາເມຣອນ ນາຍົກລັດຖະມົນຕີອັງກິດສະເໜີອອກຢູ່ທີ່ປະຊຸມນັ້ນແມ່ນບໍ່ສາມາດຮັບເອົາໄດ້,ສະນັ້ນ,ຈິ່ງຈຳເປັນຕ້ອງປະຖິ້ມຈຸດປະສົງໃນເບື້ອງຕົ້ນທີ່ຢາກດັດແກ້ສົນທິສັນຍາລິສບອນ,ເພາະວ່າການດັດແກ້ສົນທິສັນຍາລິສບອນຕ້ອງໄດ້ຜ່ານການອະນຸມັດຈາກປະເທດສະມາຊິກທັງໝົດ27ປະເທດຂອງສະຫະພາບເອີລົບ.
ຕາມສົນທິສັນຍາສະບັບໃໝ່,ຈະປະຕິບັດລະບຽບວິໄນດ້ານການເງິນທີ່ເຂັ້ມງວດກວ່າເກົ່າຕໍ່ປະເທດໃນເຂດໃຊ້ເງິນເອີໂຣພ້ອມດ້ວຍປະເທດສະມາຊິກອື່ນໆຂອງສະຫະພາບເອີລົບທີ່ຍິນດີເຂົ້າຮ່ວມໃນສົນທິສັນຍາສະບັບໃໝ່,ເຊັ່ນວ່າ,ກຳນົດໃຫ້ປະເທດທີ່ກ່ຽວຂ້ອງຕ້ອງຈັດເອົາເນື້ອໃນກ່ຽວກັບການບັນຈຸໃຫ້ງົບປະມານມີຄວາມດຸນດ່ຽງກັນນັ້ນບັນລຸໄວ້ໃນລັດຖະທຳມະນູນ,ປະເທດທີ່ກ່ຽວຂ້ອງຕ້ອງຍື່ນແຜນງົບປະມານໃຫ້ຄະນະກຳມາທິການສະຫະພາບເອີລົບເພື່ອສຳຫຼວດກວດກາ,ຕໍ່ປະເທດທີ່ລະເມີດລະບຽບວິໄນດ້ານການເງິນນັ້ນຈະຖືກລົງໂທດໂດຍອັດຕະໂນມັດແລະອື່ນໆ.
ນອກຈາກມາດຕະການປະຕິຮູບໃນໄລຍະຍາວກ່ຽວກັບການເພີ່ມຄວາມເຂັ້ມງວດໃນການປະຕິບັດລະບຽບວິໄນດ້ານການເງິນແລ້ວ,ປະເທດໃນເຂດໃຊ້ເງິນເອີໂຣຍັງຈະລະດົມທຶນ200ຕື້ເອີໂຣເພື່ອສະໜອງໃຫ້ອົງການກອງທຶນເງິນຕາສາກົນຫຼືIMFເພື່ອຊ່ວຍເຫຼືອປະເທດໃນເຂດໃຊ້ເງິນເອີໂຣຮັບມືກັບວິກິດການໜີ້ສິນພາກລັດ.
