ໃນໄລຍະ10ປີທີ່ຈີນເຂົ້າເປັນສະມາຊິກWTOໄດ້ນຳເອົາຜົນປະໂຫຍດຢ່າງຫຼວງຫຼາຍໄປໃຫ້ປະເທດອື່ນໆ
(GMT+08:00) 2011-12-09 16:19:29 cri
ເນື່ອງໃນໂອກາດວັນລະລຶກຈີນເຂົ້າເປັນສະມາຊິກອົງການການຄ້າໂລກຫຼືWTOຄົບຮອບ10ປີໃກ້ຈະວຽນມາເຖິງ,ທ່ານຫຼົງຢົງຖູ ອະດີດຫົວໜ້າຜູ່ຕາງໜ້າເຈລະຈາ,ອະດີດລັດຖະມົນຕີຊ່ວຍວ່າການກະຊວງເສດຖະກິດການຄ້າກັບຕ່າງປະເທດຂອງຈີນກ່າວວ່າ,ໃນເວລາຈີນເຂົ້າເປັນສະມາຊິກWTOເປັນເວລາ10ປີຜ່ານມານີ້,ການເປີດປະຕູສູ່ພາຍນອກໄດ້ເຮັດໃຫ້ຈີນກາຍເປັນຜູ່ໄດ້ຮັບຜົນປະໂຫຍດ,ແລະກໍ່ໄດ້ນຳເອົາຜົນປະໂຫຍດຢ່າງຫຼວງຫຼາຍໄປໃຫ້ປະເທດອື່ນໆ.
ໃນເວລາໃຫ້ສຳພາດຕໍ່ນັກຂ່າວໃນເມື່ອບໍ່ດົນມານີ້,ທ່ານຫຼົງຢົງຖູກ່າວວ່າ,ພາຍຫຼັງເຂົ້າເປັນສະມາຊິກ WTOແລ້ວ,ເວົ້າໃນລະດັບໃດໜຶ່ງແລ້ວ,ຈີນເປັນຜູ່ໄດ້ຮັບຜົນປະໂຫຍດຫຼາຍກວ່າໝູ່,ແຕ່ນີ້ແມ່ນຍ້ອນວ່າຈີນໄດ້ປະຕິບັດນະໂຍບາຍເປີດປະຕູສູ່ພາຍນອກຢ່າງກວ້າງຂວາງທີ່ສຸດ,ຫາກບໍ່ແມ່ນໄດ້ຮັບຜົນປະໂຫຍດຍ້ອນເສຍສະຫຼະຜົນປະໂຫຍດຂອງປະເທດອື່ນ.ໃນຂະນະທີ່ຕົນເອງໄດ້ຮັບຜົນປະໂຫຍດນັ້ນ,ຈີນກໍ່ໄດ້ສ້າງຜົນປະໂຫຍດໃຫ້ແກ່ປະເທດອື່ນໆເຊັ່ນດຽວກັນ,ຕົວຢ່າງວ່າປະຈຸບັນ,ມູນຄ່າການນຳເຂົ້າສິນຄ້າຂອງຈີນໄດ້ຫຼາຍກວ່າ1000ຕື້ໂດລາຕໍ່ປີ,ຊຶ່ງໄດ້ສ້າງຕະຫຼາດອັນໃຫຍ່ຫຼວງພໍສົມຄວນໃຫ້ທົ່ວໂລກ.ບວກກັບວິສາຫະກິດຈີນໄປລົງທຶນຢູ່ຕ່າງປະເທດໃນຊຸມປີມໍ່ໆມານີ້,ກໍ່ໄດ້ນຳເອົາເງິນທຶນແລະໂອກາດການປະກອບອາຊີບຢ່າງຫຼວງຫຼາຍໃຫ້ແກ່ຕ່າງປະເທດ.
ທ່ານຫຼົງຢົງຖູຍັງຊີ້ອອກວ່າ,ຈີນເຂົ້າເປັນສະມາຊິກWTOເປັນເວລາ10ປີຜ່ານມາ,ຜົນສະທ້ອນຈາກຄວາມຂັດແຍ່ງດ້ານການຄ້າຖືກເວົ້າເກີນຄວາມຈິງ,ໃນເວລາພັດທະນາເສດຖະກິດ,ຈີນກໍ່ໄດ້ເສຍຄ່າທົດແທນຈຳນວນໜຶ່ງທາງດ້ານສິ່ງແວດລ້ອມທີ່ບໍ່ສາມາດຫຼີກລ່ຽງໄດ້.ແຕ່ທ່ານຫຼົງຢົງຖູກ່າວເນັ້ນວ່າ,ເນື້ອໃນຕົ້ນຕໍຂອງການເຂົ້າເປັນສະມາຊິກ WTOແມ່ນລະບຽບການແລະການເປີດປະຕູສູ່ພາຍນອກ,ສະນັ້ນ,ພຽງແຕ່ເພີ່ມເນື້ອໃນອັນໃໝ່ເຂົ້າໃນດ້ານນີ້ໃຫ້ເພີ່ມຫຼາຍຂຶ້ນເລື້ອຍໆ,ຜົນປະໂຫຍດຈາກການເຂົ້າເປັນສະມາຊິກWTOກໍ່ຈະມີຢູ່ຕໍ່ໄປ.
