ວັນທີ7ທັນວານີ້, ຂ່າວສານຫລູມເບີກລາຍງານວ່າ, ຕົວເລກຂອງບໍລິສັດMOODYສະແດງໃຫ້ເຫັນວ່າ, ປະຈຸບັນ, ລະດັບໜີ້ສິນໃນໄລຍະເວລາ5ປີຂອງຈີນ, ສ.ເກົາຫລີ, ອິນໂດເນເຊຍ, ມະເລເຊຍ, ຟີລິບປິນແລະໄທຕໍ່າກວ່າລະດັບໜີ້ສິນຂອງປະເທດເຂດໃຊ້ເງິນເອີໂຣ, ລະດັບຄວາມໝັ້ນຄົງຂອງໜີ້ສິນອົງກອນເສດຖະກິດອາຊີໃນໄລຍະສັ້ນສູງກວ່າປະເທດເຂດໃຊ້ເງິນເອີໂຣທີ່ຢູ່ໃນວິກິດການໜີ້ສິນຢ່າງຫລວງຫລາຍ, ຄວາມສາມາດໃນການຮັບມືກັບຜົນກະທົບຈາກວິກິດການໜີ້ສິນໃນເອີລົບຂອງອົງກອນເສດຖະກິດອາຊີມີຄວາມເຂັ້ມແຂງຫລາຍ, ບໍລິສັດMOODYກໍາລັງຄໍານຶງເຖິງການຍົກສູງລະດັບຄວາມໜ້າເຊື່ອຖືດ້ານໜິ້ສິນຂອງປະເທດອາຊີ.
ນັກວິເຄາະເຫັນວ່າ,ສາເຫດສໍາຄັນຂອງຄວາມໜ້າເຊື່ອຖືດ້ານໜີ້ສິນພາກລັດຂອງອາຊີດີກວ່າເອີລົບແມ່ນເສດຖະກິດຂອງອົງກອນເສດຖະກິດມີທ່າອຽງເຕີບໂຕຢ່າງວ່ອງໄວ, ອັດຕາເງິນຝາກສູງ,ມີຄັງສໍາຮອງເງິນຕາຕ່າງປະເທດຫລາຍ, ໜີ້ສິນໃນGDPກວມອັດຕາສ່ວນໜ້ອຍ ,ແລະສຸມກໍາລັງເຂົ້າໃນການພັດທະນາຕາມຄວາມຕ້ອງການພາຍໃນ. ໃນໄຕມາດທີ3ຂອງປີນີ້, ອັດຕາເຕີບໂຕສະເລ່ຍຂອງGDPອົງກອນເສດຖະກິດອາຊີທີ່ບໍ່ລວມທັງຍີ່ປຸ່ນແມ່ນ5,4%, ແມ່ນ3ເທົ່າຂອງປະເທດເຂດໃຊ້ເງິນເອີໂຣ. ຍອດມູນຄ່າຄັງສໍາຮອງເງິນຕາຕ່າງປະເທດຂອງທະນາຄານກາງໂລກແມ່ນ1ໝື່ນ200ຕື້ໂດລາ, ທະນາຄານກາງອາຊີກວມ5200ຕື້ໂດລາ, ຫລາຍກວ່າ50%. ສາເຫດເຫລົ່ານີ້ໄດ້ຊ່ວຍເຫລືອອາຊີຮັບມືກັບຄວາມສ່ຽງທາງເສດຖະກິດຈາກພາຍນອກ.
ວັນທີ6ທັນວານີ້, ທະນາຄານພັດທະນາອາຊີຫລືADBໄດ້ປະກາດບົດລາຍງານປະຈໍາໄຕມາດ,ໂດຍຂຽນວ່າ, ຍ້ອນໄດ້ຮັບຜົນກະທົບຈາກປັດໄຈຕ່າງໆເຊັ່ນ,ວິກິດການໜີ້ສິນເອີລົບແລະອື່ນໆ, ສະຖານະການຂອງເສດຖະກິດໂລກຊຸດໂຊມລົງ, ຈັງຫວະການເຕີບໂຕດ້ານເສດຖະກິດຂອງອົງກອນເສດຖະກິດຈະເລີນໃໝ່ຂອງອາຊີຕາເວັນອອກໃນປີ2012ອາດຈະຊ້າລົງ. ໃນ "ບົດລາຍງານຕິດຕາມກວດກາເສດຖະກິດອາຊີ", ທະນາຄານພັດທະນາອາຊີຄາດຄະເນວ່າ, ເສດຖະກິດຂອງອົງກອນເສດຖະກິດຈະເລີນໃໝ່ໃນອາຊີຈຕາເວັນອອກຈະເຕີບໂຕ7,2%ໃນປີໜ້າ. ກ່ອນໜ້ານີ້, ໃນ ບົດລາຍງານປະຈໍາໄຕມາດທີ3ໃນຂອງປີນີ້, ທະນາຄານພັດທະນາອາຊີຄາດຄະເນວ່າ,ເສດຖະກິດຂອງອົງກອນເສດຖະກິດຈະເລີນໃໝ່ໃນອາຊີຕາເວັນອອກຈະເຕີບໂຕ7,5%ໃນປີ2012, ຈັງຫວະເຕີບໂຕໃນປີ2011ແມ່ນ7,5%.
