ວັນທີ 8 ທັນວາ ນີ້, ຢູ່ ບຣຸກແຊນ ປະເທດ ແບນຊິກ, ທ່ານນາງ ຮິນລາຣີ ຄລິນຕັນ ລັດຖະມົນຕີ ວ່າ ການ ກະຊວງ ການ ຕ່າງປະເທດ ອາເມລິກາ ກ່າວ ວ່າ, ນາໂຕ ຈະ ສືບຕໍ່ ຕິດຕັ້ງ ລະບົບ ຕ້ານ ລູກສອນໄຟ ນຳ ວິຖີ ຢູ່ ເອີລົບ ຕື່ມອີກ, ປະເທດ ທີ່ ບໍ່ ເປັນ ສະມາຊິກ ນາໂຕ ບໍ່ ມີ ສິດ ປະຕິເສດ ຕໍ່ ບັນຫາ ນີ້.
ທ່ານ ນາງ ຮິນລາຣີ ຄລິນຕັນ ກ່າວ ຢໍ້າ ວ່າ, ລະບົບ ຕ້ານ ລູກສອນໄຟ ນຳວິຖີ ນາໂຕ ຈະ ບໍ່ ເປັນ ຂົ່ມຂູ່ ທາງ ອາວຸດ ຕໍ່ ຍຸດທະສາດ ຂອງ ຣັດເຊຍ, ຈະ ບໍ່ ທຳລາຍ ດຸນຍະພາບ ຍຸດທະສາດ ລະຫວ່າງ ອາເມລິກາ ກັບ ຣັດເຊຍ, ກໍ່ ຈະ ບໍ່ ກາຍ ເປັນ ເຫດຜົນ ທີ່ ຣັດເຊຍ ປະຕິບັດ ມາດຕະການ ຕອບໂຕ້ ຄືນ. ທ່ານ ນາງ ຮີນລາຣີ ຄລິນຕັນ ກ່າວ ຕື່ມ ວ່າ, ລະບົບ ຕ້ານ ລູກສອນໄຟ ນຳວິຖີ ບໍ່ ໄດ້ ແນໃສ່ ຣັດເຊຍ, ນີ້ແມ່ນ ເພື່ອ ປ້ອງກັນ ອີຣານ ແລະ ປະເທດ ຫຼື ອົງການ ຈັດຕັ້ງ ທີ່ ຢາກ ພັດທະນາ ເຕັກນິກ ລູກສອນ ໄຟ ນຳວິຖີ ທີ່ ມີ ລັກສະນະ ຂົ່ມຂູ່.
ມື້ ດຽວກັນ, ກອງປະຊຸມ ລັດຖະມົນຕີ ວ່າ ການ ກະຊວງ ການຕ່າງ ປະເທດ ສະພາມົນຕີ ນາໂຕ ຣັດເຊຍ ໄດ້ ຈັດຂຶ້ນ ຢູ່ ສຳນັກງານ ໃຫຍ່ ນາໂຕ, ແຕ່ ສອງຝ່າຍ ບໍ່ໄດ້ ຮັບ ຄວາມຄືບໜ້າ ຫຍັງ ໃນ ການເຈລະຈາ ກ່ຽວກັບ ລະບົບ ຕ້ານ ລູກສອນໄຟ ນຳວິຖີ, ທັງສອງ ຝ່າຍ ຍັງ ມີ ຄວາມເຫັນ ແຕກຕ່າງກັນ ຄື ເກົ່າ.
