ຕາມຂ່າວສານຊິນຮວາ: ວັນທີ 8 ທັນວານີ້, ທ່ານບາຣັກ ໂອບາມາ ປະທານາທິບໍດີອາເມລິກາກ່າວວ່າ, ອາເມລິກາຈະໃຊ້ທຸກວິທີທາງເພື່ອສະກັດກັ້ນບໍ່ໃຫ້ອີຣານມີອາວຸດນີວເຄຼຍໄວ້ໃນຄອບຄອງ.
ໃນກອງປະຊຸມຂ່າວທີ່ຈັດຂຶ້ນຢູ່ທຳນຽບຂາວ, ທ່ານໂອບາມາກ່າວວ່າ, ການທີ່ອີຣານສືບຕໍ່ສະແຫວງຫາການຄອບຄອງອາວຸດນີວເຄຼຍນັ້ນ ໄດ້ທຳລາຍຜົນປະໂຫຍດແລະຄວາມໝັ້ນຄົງແຫ່ງຊາດຂອງອາເມລິກາແລະປະເທດພັນທະມິດ ເຊິ່ງລວມທັງອິສຣາແອນ, ອາເມລິກາຈະຮ່ວມກັນກັບປະຊາຄົມໂລກພ້ອມກັນສະກັດກັ້ນຢ່າງສຸດຂີດ.
ວັນທີ 8 ທັນວານີ້, ຂ່າວສານສາທາລະນະລັດອິສລາມອີຣານລາຍງານວ່າ,ວັນທີ 7 ທັນວານີ້,ຢູ່ນະຄອນຫຼວງເຕເຮຣານ, ທ່ານເມ ເຮມານ ປານລັສ ໂຄສົກກະຊວງການຕ່າງປະເທດອີຣານໄດ້ກ່າວຕຳໜິການກະທຳຂອງອາເມລິກາທີ່ເປີດສະຖານທູດອາເມລິກາປະຈຳອີຣານທາງອິນເຕີເນັດ,ທ່ານກ່າວວ່າການກະທຳນີ້ທີ່ຈິງແລ້ວແມ່ນຍອມຮັບວ່າອາເມລິກາຕັດສາຍສຳພັນທາງການທູດກັບອີຣານໃນ 30 ກວ່າປີກ່ອນແມ່ນຄວາມຜິດພາດອັນຮ້າຍແຮງ. ວັນທີ 8 ທັນວານີ້, ທະຫານອີຣານໄດ້ສະເໜີພາບວິດີໂອຜ່ານທາງໂທລະພາບກ່ຽວກັບກອງທັບປ້ອງກັນອາກາດອີຣານກ່າວວ່າໄດ້ຍິງຍົນສອດແນມແບບບໍ່ມີຄົນຂັບRQ-170ຂອງອາເມລິກາລຳໜຶ່ງຕົກຢູ່ເຂດຊາຍແດນພາກຕາເວັນອອກຂອງອີຣານ.
