ວັນທີ 9 ທັນວາ 2011, ສະຖາບັນຂົງຈື້ໄດ້ຈັດພິທີເປີດຊຸດຝຶກອົບຮົມພາສາຈີນໃຫ້ຄູມັດທະຍົມທີ່ມາຈາກໂຮງຮຽນມັດທະຍົມສົມບູນສອງແຂວງຄື: ນະຄອນຫຼວງວຽງຈັນແລະແຂວງວຽງຈັນ ໂດຍການເປັນປະທານຂອງທ່ານ ນາງມະລິເຮືອງ ເລຂາທູດວັດທະນາທຳຈີນປະຈຳລາວ, ທ່ານ ຮສ ລຳໄມ ພິພັກຂະວົງ ຮອງອະທິການບໍດີມະຫາວິທະຍາໄລແຫ່ງຊາດລາວ, ຜູ້ອຳນວຍການສະຖາບັນຂົງຈື້ຝ່າຍລາວ, ທ່ານ ສຈ ຖາວຫົງ ຜູ້ອຳນວຍການສະຖາບັນຂົງຈື້ຝ່າຍຈີນ ມີບັນດາພະນັກງານຈາກພະແນກສຶກສາ, ພະແນກ ອ້ອມຂ້າງມະຫາວິທະຍາໄລແຫ່ງຊາດລາວ, ນັກສຳມະນາກອນທີ່ມາຈາກສອງແຂວງ ຈຳນວນ 20 ທ່ານ ແລະພະນັກງານ ຄູອາຈານສະຖາບັນຂົງຈື້ເຂົ້າຮ່ວມ.
ຈຸດປະສົງຂອງການຈັດຊຸດຝຶກອົບຮົມຄັ້ງນີ້ແມ່ນເພື່ອແນ່ໃສສ້າງຄູສອນພາສາຈີນໃຫ້ແກ່ໂຮງຮຽນມັດທະຍົມແຫ່ງຕ່າງໆໃນປະເທດລາວ, ຊຸດຝຶກອົບຮົມຄັ້ງນີ້ເປັນຊຸດທຳອິດ, ຈະໃຊ້ເວລາ 8 ເດືອນຮຽນສະເພາະແຕ່ວັນເສົາແລະວັນອາທິດ, ຫຼັກສູດທີ່ນຳໃຊ້ເຂົ້າໃນການສິດສອນແມ່ນຫຼັກສູດການສອນພາສາຈີນເບື້ອງຕົ້ນສຳລັບຄົນຕ່າງປະເທດ.
