ວັນທີ9 ທັນວານີ້,ໃນກອງປະຊຸມຂ່າວຂອງພິທີອັດກອງປະຊຸມສຸດຍອດສະຫະພາບເອີລົບ, ທ່ານເຮີມັນ ວັນ ຣົມປຸຍ ປະທານສະພາມົນຕີເອີລົບກ່າວວ່າ, ເຖິງວ່າບັນດາຜູ່ນຳຂອງປະເທດສະຫະພາບເອີລົບບໍ່ໄດ້ບັນລຸແຜນການທີ່ປັບປຸງສົນທິສັນຍາຢ່າງຮອບດ້ານໃນກອງປະຊຸມສຸດຍອດເທື່ອນີ້ກໍ່ຕາມ, ແຕ່ກໍໄດ້ຜົນທີ່ລະດົມໃຈຄົນ.
ຜົນປະຈັກຕາຄົນທີ່ສຸດຂອງກອງປະຊຸມຄັ້ງນີ້ກໍ່ແມ່ນ23ປະເທດຂອງສະຫະພາບເອີລົບເຊິ່ງລວມທັງ17ປະເທດເຂດໃຊ້ເງິນເອີໂຣກັບ6ປະເທດເຂດບໍ່ໃຊ້ເງິນເອີໂຣເຫັດດີເຊັນສົນທິສັນຍາລະຫວ່າງລັດຖະບານ, ນັ້ນກໍ່ຄືສັນຍາທາງການເງິນສະບັບໃໝ່, ເພື່ອປະຕິບັດລະບຽບວິໄນດ້ານການເງິນເຂັ້ມງວດກວ່າເກົ່າ. ທ່ານວັນຣົມປຸຍກ່າວວ່າ, ກົດລະບຽບການເງິນໃນສັນຍາຈະຖືກຂຽນເຂົ້າໃນກົດໝາຍຂອງປະເທດສະມາຊິກ, ນີ້ຈະເຮັດໃຫ້ມີລະບຽບວິໄນການເງິນທີ່ເຂັ້ມງວດກວ່າເກົ່າ, ມີກົນໄກລົງໂທດໂດຍອັດຕະໂນມັດທີ່ສົມບູນກວ່າເກົ່າ, ແລະມີການຕິດຕາມຄຸ້ມຄອງອັນເຄັ່ງຄັດກວ່າເກົ່າ. ສົນທິສັນຍາລະຫວ່າງລັດຖະບານຂອງປະເທດເຂດໃຊ້ເງິນເອີໂຣຈະເຮັດໃຫ້ກົດລະບຽບເຫຼົ່ານີ້ມີກຳລັງພູກມັດຫຼາຍກວ່າເກົ່າ, ບວກກັບການນິຕິບັນຍັດຊັ້ນສອງແລະຄຳໝັ້ນສັນຍາດ້ານການເມືອງຂອງລັດຖະບານປະເທດຕ່າງໆ, ທັງໝົດເຫຼົ່ານີ້ລ້ວນແຕ່ຈະເຮັດໃຫ້ສົນທິສັນຍາການເງິນມີປະສິດທິຜົນຢ່າງສົມບູນ. ທ່ານກ່າວວ່າ, ສົນທິສັນຍາດັ່ງກ່າວຈະເຊັນກັນຊ້າສຸດໃນເດືອນມີນາປີ2012.
ເຖິງວ່າຜົນຂອງກອງປະຊຸມສຸດຍອດສະຫະພາບເອີລົບບໍ່ໄດ້ບັນລຸຜົນທີ່ດີທີ່ສຸດຕາມຄວາມປາຖະໜາຂອງຕະຫຼາດ, ແຕ່ກໍໄດ້ຊຸກຍູ້ໃຫ້ຕະຫຼາດຫຸ້ນສ່ວນແລະລາຄານ້ຳມັນໃນຕະຫຼາດສາກົນຍົກສູງຂຶ້ນໂດຍທົ່ວໄປ.
ນອກນີ້, ວັນທີ9 ທັນວານີ້, ໂກຼອາຊີໄດ້ເຊັນສົນທິສັນຍາເຂົ້າຮ່ວມສະຫະພາບເອີລົບຢູ່ສຳນັກງານໃຫຍ່ສະຫະພາບເອີລົບທີ່ຕັ້ງຢູ່ນະຄອນບຣຸກແຊນ. ພາຍຫຼັງ27ປະເທດສະມາຊິກໄດ້ລົງນາມໃນສົນທິສັນຍາດັ່ງກ່າວແລ້ວ, ໂກຼອາຊີຈະເປັນປະເທດສະມາຊິກສະຫະພາບເອີລົບໃນປີ2013.
