ເຮືອລາດຕະເວນຮ່ວມຂອງ4ປະເທດເຂົ້າສູ່ແມ່ນ້ຳຂອງຕອນທາງລາວແລະມຽນມາ
(GMT+08:00) 2011-12-11 19:24:13 cri
ວັນທີ10ທັນວານີ້,ຈີນ,ລາວ,ມຽນມາແລະໄທເລີ່ມດຳເນີນການລາດຕະເວນຮ່ວມຕາມລຳແມ່ນ້ຳຂອງຢ່າງເປັນທາງການ,ເພື່ອຮ່ວມກັນປົກປ້ອງແລະຮັບປະກັນຄວາມປອດໄພດ້ານການຂົນສົ່ງທາງນ້ຳຕາມລຳແມ່ນ້ຳຂອງ.
ຕອນເຊົ້າວັນທີ10ທັນວານີ້,ເຮືອສິນຄ້າ10ລຳພ້ອມກັບເຮືອລາດຕະເວນຮ່ວມໄດ້ເດີນທາງອອກຈາກດ່ານກວ່ນເຫຼີຍຂອງສິບສອງພັນນາຂອງຈີນ,ແລະຜ່ານຫຼັກໝາຍຊາຍແດນເລກທີ244ທີ່ຢູ່ເປັນຈຸດເຊື່ອມຕໍ່ກັນລະຫວ່າງຈີນ,ລາວແລະມຽນມາ,ເຂົ້າສູ່ທາງເດີນເຮືອສາກົນແມ່ນ້ຳຂອງທີ່ເປັນຈຸດເຊື່ອມຕໍ່ກັນລະຫວ່າງລາວແລະມຽນມາ,ດ້ວຍໄລຍະທາງ150ກວ່າກິໂລແມັດກໍ່ເຂົ້າສູ່ລາວໃນເວລາ17ໂມງກວ່າ.
ຕາມກົນໄກຮ່ວມມືປະຕິບັດກົດໝາຍແລະປ້ອງກັນຄວາມປອດໄພຕາມລຳແມ່ນ້ຳຂອງລະຫວ່າງຈີນ,ລາວ,ມຽນມາແລະໄທ,ອີງຕາມຖະແຫຼງການຮ່ວມແລະບົດບັນທຶກໃນກອງປະຊຸມທີ່ກ່ຽວຂ້ອງ,ຈະຕັ້ງກອງບັນຊາການຮ່ວມຢູ່ດ່ານກວ່ນເຫຼີຍຂອງຈີນ,ຕັ້ງຈຸດຕິດຕໍ່ພົວພັນຢູ່ລາວ,ມຽນມາແລະໄທ,ເພື່ອແລກປ່ຽນຂໍ້ມູນຂ່າວຢ່າງທັນການ,ຈັດຕັ້ງແລະປະສານສົມທົບການກະທຳຂອງທຸກຝ່າຍ;ສ້າງຕັ້ງຊ່ອງທາງຕິດຕໍ່ພົວພັນກັນຕະຫຼອດ24ຊົ່ວໂມງກ່ຽວກັບການລາດຕະເວນຕາມລຳແມ່ນ້ຳຂອງທີ່ປະກອບດ້ວຍພາກສ່ວນຮັບຜິດຊອບຄຸ້ມຄອງຂອງ4ປະເທດ.
ນອກນີ້,ຕາມສື່ມວນຊົນໄທລາຍງານວ່າ,ທ່ານສະເຫຼີມ ຢູ່ບຳລຸງ,ຮອງນາຍົກລັດຖະມົນຕີໄທທີ່ຮັບຜິດຊອບວຽກສຳຫຼວດຄະດີທີ່ລູກເຮືອຈີນຖືກສັງຫານຕາມລຳແມ່ນ້ຳຂອງນັ້ນກ່າວວ່າ,ວຽກງານສຳຫຼວດຊອກຫາຫຼັກຖານໄດ້ສຳເລັດແລ້ວ,ຜົນສຳຫຼວດເບື້ອງຕົ້ນສະແດງໃຫ້ເຫັນວ່າ, ລູກເຮືອຈີນບໍ່ມີສ່ວນພົວພັນເຖິງຢາເສບຕິດ,ຄະດີນີ້ໄດ້ເຂົ້າສູ່ລະບຽບການທາງດ້ານກົດໝາຍແລ້ວ.
