ເວທີປຶກສາຫາລືຂັ້ນສູງເພື່ອລະລຶກຈີນເຂົ້າເປັນສະມາຊິກອົງການການຄ້າໂລກ ຫຼື WTO ຄົບຮອບ 10 ປີໄດ້ຈັດຂຶ້ນໃນວັນທີ 11 ທັນວານີ້ ຢູ່ຫໍສະພາປະຊາຊົນແຫ່ງຊາດທີ່ນະຄອນຫຼວງປັກກິ່ງ. ທ່ານຫູຈີນທາວ ປະທານປະເທດຈີນໄດ້ເຂົ້າຮ່ວມ ແລະ ກ່າວປາຖະກະຖາໃນເວທີປຶກສາຫາລືຄັ້ງນີ້.
ທ່ານວາງຊີສ່ານ ຮອງນາຍົກລັດຖະມົນຕີຈີນໄດ້ເປັນປະທານໃນເວທີປຶກສາຫາລືຄັ້ງນີ້. ຜູ່ຕາງໜ້າຈາກວົງການຕ່າງໆຂອງຈີນແລະຕ່າງປະເທດ ເຊັ່ນ,ທ່ານປັສການ ລາມີ ຜູ່ອຳນວຍການໃຫຍ່ອົງການການຄ້າໂລກ, ທ່ານສຸພະໄຊ ພານິດຊະພັກ ເລຂາທິການໃຫຍ່ສະພາພັດທະນາການຄ້າຂອງສະຫະປະຊາຊາດ, ພ້ອມທັງຜູ່ຮັບຜິດຊອບຈາກທະນາຄານໂລກ ແລະ ອົງການກອງທຶນເງິນຕາສາກົນ ຫຼື IMF ກໍ່ໄດ້ເຂົ້າຮ່ວມເວທີປຶກສາຫາລື.
ວັນທີ 11 ທັນວາ ປີ2001, ຈີນໄດ້ເຂົ້າເປັນສະມາຊິກWTOຢ່າງເປັນທາງການ. ໃນ 10 ປີມານີ້, ເສດຖະກິດ ແລະ ການຄ້າຕໍ່ຕ່າງປະເທດຂອງຈີນໄດ້ພັດທະນາຢ່າງວ່ອງໄວ. ປັດຈຸບັນ, ຈີນໄດ້ກາຍເປັນອົງກອນເສດຖະກິດໃຫຍ່ອັນດັບ 2 ໃນໂລກ, ເປັນປະເທດສົ່ງອອກສິນຄ້າໃຫຍ່ທີ່ສຸດ ແລະ ນຳເຂົ້າສິນຄ້າອັນດັບ 2 ຂອງໂລກ, ການຮ່ວມມືດ້ານການຄ້າມີຢູ່ທົ່ວໂລກ.
