ວັນທີ 10 ທັນວານີ້, ກະຊວງພາຍໃນຣັດເຊຍຢືນຢັນວ່າ, ຕອນບ່າຍມື້ດຽວກັນ ມີປະຊາຊົນປະມານ 2 ໝື່ນ 5 ພັນຄົນໄດ້ຈັດງານໂຮມຊຸມນຸມປະທ້ວງສະພາດູມາສໍ້ໂກງການເລືອກຕັ້ງຢູ່ນະຄອນຫຼວງມົສກູ.
ຕາມໄດ້ຊາບ, ມື້ດຽວກັນ, ຢູ່ເມືອງອື່ນໆຂອງຣັດເຊຍ, ເຊັ່ນ, ເຊນດ໌ ປິເຕີສ໌ເບີກ ແລະ ວຸະລາດີໂວສດົກກໍ່ໄດ້ຈັດງານໂຮມຊຸມນຸມປະທ້ວງເຊັນດຽວກັນ.
ອີງຕາມຜົນການເລືອກຕັ້ງສະພາດູມາຣັດເຊຍທີ່ປະກາດໃນວັນທີ 9 ທັນວານີ້,ພັກທ້ອນໂຮມຣັດເຊຍເປັນເອກະພາບ, ພັກກອມມູນິດຣັດເຊຍ, ພັກຣັດເຊຍທ່ຽງທຳ ແລະ ພັກເສລີປະຊາທິປະໄຕຣັດເຊຍຈະເຂົ້າສູ່ສະພາດູມາຣັດເຊຍໃນຊຸດໜ້າ.ພັກທ້ອນໂຮມຣັດເຊຍເປັນເອກະພາບຍັງແມ່ນພັກໃຫຍ່ທີ່ສຸດໃນສະພາດູມາ, ແຕ່ພັກຝ່າຍຄ້ານໄດ້ຕຳໜິການປ່ອນບັດເທື່ອນີ້ໄດ້ລະເມີດຂໍ້ກຳນົດກົດລະບຽບ.
ນອກນີ້ ຂ່າວແຈ້ງວ່າ, ພັກຣັດເຊຍທ່ຽງທຳໄດ້ເລືອກເອົາທ່ານເຊີເກ ມິໂລນົຟ ຜູ່ນຳພັກດັ່ງກ່າວ ເຂົ້າຮ່ວມການເລືອກຕັ້ງປະທານາທິບໍດີຣັດເຊຍທີ່ຈະຈັດຂຶ້ນໃນເດືອນມີນາປີ2012. ກ່ອນໜ້ານີ້, ພັກທ້ອນໂຮມຣັດເຊຍເປັນເອກະພາບໄດ້ສະເໜີຊື່ທ່ານວະລາດີເມຍ ປູຕິນ ນາຍົກລັດຖະມົນຕີຣັດເຊຍຄົນປັດຈຸບັນໃນພັກຂອງຕົນເປັນຜູ່ສະໝັກຮັບການເລືອກຕັ້ງ.
