ຕາມຂ່າວCRI: ຕອນເຊົ້າວັນທີ 11 ທັນວານີ້, ທ່ານເຊ້ເຈີ້ນຮວາ ຫົວໜ້າຄະນະຜູ່ແທນຈີນທີ່ເຂົ້າຮ່ວມກອງປະຊຸມການປ່ຽນແປງຂອງດິນຟ້າອາກາດເດີບານສະຫະປະຊາຊາດກ່າວວ່າ, ຈີນສະໜັບສະໜູນຂໍ້ຕົກລົງຕ່າງໆຂອງກອງປະຊຸມເດີບານ.
ມື້ດຽວກັນ ກອງປະຊຸມຝ່າຍເຊັນສົນທິສັນຍາຂອບການປ່ຽນແປງຂອງດິນຟ້າອາກາດສະຫະປະຊາຊາດຄັ້ງທີ 17 ແລະ ກອງປະຊຸມຝ່າຍເຊັນອະນຸສັນຍາກຽວ ໂຕຄັ້ງທີ 7 ທີ່ໄດ້ດຳເນີນມາເປັນເວລາ 14 ວັນໄດ້ອັດລົງຢູ່ເດີບານ. ໃນເວລາໃຫ້ສຳພາດຕໍ່ສື່ມວນຊົນຫຼັງກອງປະຊຸມ, ທ່ານເຊ້ເຈີ້ນຮວາກ່າວວ່າ, ກອງປະຊຸມເທື່ອນີ້ໄດ້ຍຶດໝັ້ນອະນຸສັນຍາກຽວໂຕ, ແລະໄດ້ຈັດວາງແຜນການຕໍ່ບັນຫາການປະຕິບັດໃຫ້ຄຳໝັ້ນສັນຍາໄລຍະທີ2ຂອງອະນຸສັນຍາກຽວໂຕທີ່ປະເທດພວມພັດທະນາສົນໃຈຫຼາຍທີ່ສຸດ,ໄດ້ຮັບຄວາມຄືບໜ້າອັນສຳຄັນໃນບັນຫາເງິນທຶນ ແລະ ໄດ້ເລິ່ມນຳໃຊ້ມູນນິທິດິນຟ້າອາກາດສີຂຽວ. ທ່ານກ່າວວ່າ, ຝ່າຍຈີນຮູ້ສຶກດີໃຈຕໍ່ຜົນງານເຫຼົ່ານີ້.
ກອງປະຊຸມຍັງເຮັດໃຫ້ການຈັດວາງກົນໄກແນ່ນອນ ແລະ ລະອຽດຕື່ມອີກບົນພື້ນຖານສັນຍາຄານຄຸນ,ແລະໄດ້ລົງເລິກປຶກສາຫາລືແຜນການເພິ່ມທະວີການປະຕິບັດສົນທິສັນຍາຕື່ມອີກຫຼັງປີ2020, ເຮັດໃຫ້ຂະບວນວິວັດທີ່ກ່ຽວຂ້ອງຈະແຈ້ງແລະແນ່ນອນ, ສົ່ງສັນຍານອັນຕັ້ງໜ້າຕໍ່ປະຊາຄົມໂລກ.
ມື້ດຽວກັນ, ໃນຖະແຫຼງການສະບັບໜຶ່ງທີ່ໃຫ້ສື່ມວນຊົນ,ຄະນະຜູ່ແທນຈີນຍັງກ່າວວ່າ, ກອງປະຊຸມເດີບານຍັງບໍ່ທັນສຳເລັດການເຈລະຈາ"ແຜນດຳເນີນງານບາຫຼີ"ທັງໝົດ, ການຈັດຕັ້ງປະຕິບັດຜົນສຳເລັດຂອງກອງປະຊຸມຄານຄຸນ ແລະ ເດີບານຍັງຕ້ອງການເວລາຕື່ມອີກ.
